خرم شہزاد خرم

پہلے انسان کا سفر

وہ پہلا انسان جس کی طاعت سبھی فرشتوں پہ فرض تھی
وہ پہلا انسان
جس کی اکلوتی ذات میں کتنی کائناتوں کو دیکھتا تھا خدا
وہ انسان
کتنا تنہا
اکیلے پن کے سمندروں میں وہ ڈوبتا اور ابھرتا
ہر اک طرف اس کی نظریں اپنے ہی جیسے انساں کو ڈھونڈھتی تھیں
مگر اسی کو تو پہلے انسان کا لقب تھا !

پھر ایک دن
بجاۓ ذہن اس کی پسلیوں سے عجیب سا اک خیال پیدا ہوا
وہ پہلا انسان
اپنی ہی پسلیاں تعجب سے دیکھتا تھا

یہ ذات سے کائنات کی سمت
پہلے انسان کا سفر تھا