اس ہنستی بستی دنیا میں
ہر سو رنگ سے پھیل گئے
امیدوں کا کشکول اٹھائے
من میرا بھی چل نکلا

پھر آتے گئے ہمدرد میرے
اور بھرتے گئے کشکول میرا
ہر لفظ دعا کا پرتو تھا
اس لمحے ہر اک بول میرا

لوٹ آیا دل کی چوکھٹ پر
من اپنا بھی پھر شام ڈھلے
بے چین بہت تھا دل میرا
کہ جانے اب کیا راز کھلے

میں خوش تھا کہ غم ہار گئے
اور آج تو خوشیاں جیت گئیں
لیکن دل میں ہوک اٹھی
اور آنکھیں یکدم بھیگ گیئں

کیوں کہ

کشکول میں جھانکا تو دیکھا
وہاں آہیں تھیں وہاں آنسو تھے
کچھ ٹوٹے دل بے قابو تھے

خوشیوں کا وہاں نام نہ تھا
بس اشکوں کی برسات ملی
دل ٹوٹ کے رویا یاروں سے
کیسی یہ سوغات ملی

میں تو خوش تھا کہ
میرا درد بٹانے آئے ہیں
پر نہ جانا پاگل من نے
یہ بوجھ بڑھانے آئے ہیں

پھر ٹوٹا جام اور چھلکیں آنکھیں
تھیں قسمت میں اب لمبی راتیں
جب یاروں نے دل توڑ دیا
پھر کیسے قصے اور کیسی باتیں

امید کا ہر اک بندھن یارو
بس اک پل میں ٹوٹ گیا
یوں آیا لرزہ ہاتھوں میں
کشکول ہی ہم سے چھوٹ گیا

یہاں ملتا ہے خیرات میں کیا کیا
دل نے تو یہ جان لیا
اور آخر یارو بے بس ہو کر
ہم نے بھی یہ مان لیا

کہ

یہاں خوشیوں کے سب سانجھی ہیں
یہ غم کو بٹانا کیا جانیں
اور خوشیاں جن کی دولت ہوں
وہ ان کو لٹانا کیا جانیں ۔ ۔