َيَا بَنِي آدَمَ قَدْ انزَلْنَا عَلَيْكُمْ لِبَاسًا يُوَارِي سَوْءَاتِكُمْ وَرِيشًا وَلِبَاسُ التَّقْوَىَ ذَلِكَ خَيْرٌ ذَلِكَ مِنْ آيَاتِ اللّہ ِإِ لَعَلھمْ يَذَّكَّرُونَ يَا بَنِي آدَمَ لاَ يَفْتِنَنَّكُمُ الشَّيْطَانُ كَمَا اخْرَجَ ابَوَيْكُم مِّنَ الْجَنَّۃِ يَنزِعُ عَنْھُمَا لِبَاسَھُمَا لِيُرِيَھُمَا سَوْءَاتِتِمَا انَّہُ يَرَاكُمْ ھُوَ وَقَبِيلُہُ مِنْ حَيْثُ لاَ تَرَوْنَھُمْ انَّا جَعَلْنَا الشَّيَاطِينَ اوْلِيَاء لِلَّذِينَ لاَ يُؤْمِنُونَوَاذَا فَعَلُواْ فَاحِشَۃً قَالُواْ وَجَدْنَا عَلَيْھَا آبَاءنَا وَاللّہ امَرَنَا بِھَا قُلْ انَّ اللّہَ لاَ يَاْمُرُ بِالْفَحْشَاء اتَقُولُونَ عَلَى اللّہِ مَا لاَ تَعْلَمُونَ قُلْ امَرَ رَبِّي بِالْقِسْطِ وَاقِيمُواْ وُجُوھكُمْ عِندَ كُلِّ مَسْجِدٍ وَادْعُوہُ مُخْلِصِينَ لَہُ الدِّينَ كَمَا بَدَاكُمْ تَعُودُونَ فَرِيقًا ھَدَى َفَرِيقًا حَقَّ عَلَيْھِمُ الضَّلاَلَۃُ انَّھُمُ اتَّخَذُوا الشَّيَاطِينَ اوْلِيَاء مِن دُونِ اللّہِ وَيَحْسَبُونَ انَّھُم مُّھْتَدُونَ يَا بَنِي آدَمَ خُذُواْ زِينَتَكُمْ عِندَ كُلِّ مَسْجِدٍ وكُلُواْ وَاشْرَبُواْ وَلاَ تُسْرِفُواْ انَّہُ لاَ يُحِبُّ الْمُسْرِفِينَ (سورۃ الاعراف آیت 27 تا 31)

" اے اولاد آدم ہم نے تم پر لباس نازل کیا ہے جو تمہاری شرمگاہوں کو بھی چھپاتا ہے اور موجبِ زینت بھی ہے۔ اور بہترین لباس تقوٰی کا لباس ہے۔ یہ اللہ کی نشانیوں میں سے ہے شاید کہ لوگ اسے سے سبق لیں۔ اے بنی آدم، ایسا نہ ہو کہ شیطان تمہیں پھر اسی فتنے میں مبتلا کر دے جس طرح اس نے تمہارے والدین کو جنت سے نکلوایا تھا ور ان کے لباس ان پر سے اتروا دیے تھے تاکہ ان کی شرمگاہیں ایک دوسرے کے سامنے کھولے۔ وہ اور اس کے ساتھی تمہیں ایسی جگہ سے دیکھتے ہیں جہاں سے تم انہیں نہیں دیکھ سکتے۔ اِن شیاطین کو ہم نے ان لوگوں کا سرپرست بنا دیا ہے جو ایمان نہیں لاتے۔
یہ لوگ جب کوئی شرمناک کام کرتے ہیں تو کہتے ہیں ہم نے اپنے باپ دادا کو اسی طریقہ پر پایا ہے اور اللہ ہی نے ہمیں ایسا کرنے کا حکم دیا ہے۔ اِن سے کہو، اللہ بے حیائی کا حکم نہیں دیتا۔ کیا تم اللہ کے بارے میں وہ باتیں کہتے ہو جن کے متعلق تمہیں علم نہیں۔ ان سے کہو، میرے رب نے تو راستی و انصاف کا حکم دیا ہے اور اس کا حکم یہ ہے کہ ہر عبادت میں اپنا رخ ٹھیک رکھو اور اسی کو پکارو اپنے دین کو خالص رکھ کر۔ جس طرح اس نے تمہیں اب تخلیق کیا ہے اسی طرح تم پھر سے پیدا کیے جاؤ گے۔ ایک گروہ کو تو اس نے سیدھا راستہ دکھا دیا ہے، مگر دوسرے گروہ پر گمراہی چسپاں ہو کر رہ گئی ہے۔ کیونکہ انہوں نے اللہ کے بجائے شیاطین کو اپنا سرپرست بنا لیا ہے اور وہ سمجھ رہے ہیں کہ ہم سیدھی راہ پر ہیں۔ اے نبی آدم، ہر عبادت کے موقع پر اپنی زینت (یعنی لباس) سے آراستہ رہو اور کھاؤ پیو اور حد سے تجاوز نہ کرو، اللہ حد سے بڑھنے والوں سے محبت نہیں کرتا۔ " (سورۃ الاعراف آیت 27 تا 31)
اسلام سے قبل مشرکین کثرت کے ساتھ بیت اللہ کا ننگے ہو کر طواف کیا کرتے تھے اور عورتیں بھی ننگی طواف کرتیں، صرف اپنی شرمگاہ پر کوئی کپڑا یا چمڑے کا ٹکڑا رکھ لیتیں۔ اپنے اس شرمناک فعل کے انہوں نے دوعذر پیش کیے جو مندرجہ بالا آیات میں مذکور ہیں۔ ایک تو یہ ہم نے اپنے باپ دادا کو اسی طریقہ پر پایا ہے۔ دوسرا، یہ کہ اللہ نے ہمیں اس کا حکم دیا ہے۔ اللہ تعالیٰ نے اس کی تردید فرمائی کہ یہ کس طرح ہو سکتا ہے کہ اللہ تعالیٰ بے حیائی کا حکم دے؟ یعنی تم اللہ کے ذمے وہ بات لگاتے ہو جو اس نے نہیں کہی۔
ان آیات میں جو کچھ ارشاد ہوا ہے اس سے چند اہم حقیقتیں نکھر کر سامنے آ جاتی ہیں:
اول یہ کہ لباس انسان کے لیے ایک مصنوعی چیز نہیں ہے بلکہ انسانی فطرت کا ایک اہم مطالبہ ہے۔ اللہ تعالیٰ نے انسان کے جسم پر حیوانات کی طرح کوئی پوشش پیدائشی طور پر نہیں رکھی بلکہ حیا اور شرم کا مادہ اس کی فطرت میں ودیعت کر دیا۔ اس نے انسان کے لیے اس کے اعضائے صنفی کو محض اعضائے صنفی ہی نہیں بنایا بلکہ "سوءاۃ" بنایا ہے جس کے معنی عربی زبان میں ایسی چیز کے ہیں جن کے اظہار کا آدمی برا سمجھے۔ پھر اس فطری شرم کے تقاضے پورا کرنے کے لیے اس نے کوئی بنا بنایا لباس انسان کو نہیں دیا بلکہ اس کی فطرت پر لباس الہام کر دیا (انزلنا علیکم لباسا( تاکہ وہ اپنی عقل سے کام لیے اپنی فطرت کے اس مطالبے کو سمجھے اور پھر اللہ کے بنائے ہوئے مواد سے کام لے کر اپنے لیے فراہم کرے۔
دوم یہ کہ اس فطری الہام کی رو سے انسان کے لیے لباس کی اخلاقی ضرورت مقدم ہے۔ یعنی یہ کہ وہ اپنی شرمگاہ کو ڈھانکے اور اس کی طبعی ضرورت موخر ہے، یعنی یہ کہ اس کا لباس اس کے لیے جسم کی آرائش اور موسمی اثرات سے بدن کی حفاظت کا ذریعہ ہے۔ اس باب میں بھی فطرۃ انسان کا معاملہ حیوانات کے برعکس ہے۔ ان کے لیے پوشش کی اصل غرض موسمی اثرات سے بچاؤ اور خوبصورتی ہے ۔ ان کی جبلت میں کوئی داعیہ موجود ہی نہیں کہ اس کا تقاضا پورا کرنے کے لیے ان کے جسم پر کوئی لباس بنایا جاتا۔ لیکن جب انسانوں نے شیطانوں کی راہنمائی قبول کی تو معاملہ پھر الٹ گیا۔ اس نے اپنے شاگردوں کو اس غلط فہمی میں ڈال دیا کہ تمہارے لیے لباس کی ضرورت بعینہ وہی ہے جو حیوانات کے لیے "ریش" کی ہے۔ رہا اس کا "چھپانے والی چیز" ہونا تو یہ قطعا کوئی اہمیت نہیں رکھتا بلکہ جس طرح حیوانات کے اعضاء "سوءاۃ" یعنی شرم والے مقام نہیں ہیں اسی طرح تمہارے یہ اعضاء بھی چھپانے کے قابل نہیں محض صنفی اعضاء ہیں۔
سوم یہ کہ انسان کے لیے لباس کا صرف سترپوش اور وسیلہ زینت و حفاظت ہونا ہی کافی نہیں بلکہ اس معاملہ میں جس بھلائی تک انسان کو پہنچنا چاہیے وہ یہ ہے کہ اس کا لباس تقوٰی کا لباس ہو۔ یعنی پوری طرح ساتر ہو۔ زینت میں بھی حد سے بڑھا ہوا یا آدمی کی حیثیت سے گرا ہوا نہ ہو، فخر و غرور اور تکبر و ریا کی شان لیے ہوئے بھی نہ ہو۔ اور پھر ان ذہنی امراض کی نمائندگی بھی نہ کرتا ہو جن کی بنا پر مرد زنانہ پن اختیار کرتے ہیں، عورتیں مردانہ پن کی نمائش کرنے لگتی ہیں اور ایک قوم دوسری قوم کے مشابہہ بننے کی کوشش کر کے خود اپنی ذلت کا زندہ اشتہار بن جاتی ہے۔
چہارم یہ کہ لباس کا معاملہ بھی اللہ تعالیٰ کی ان بے شمار نشانیوں میں سے ایک ہے جو دنیا میں چاروں طرف پھیلی ہوئی ہیں اور حقیقت تک ہنچنے میںیں انسان کی مدد کرتی ہیں بشرطیکہ انسان خود ان سے سبق لینا چاہے۔ اوپر جن حقائق کی طرف اشارہ کیا گیا ہے ان پر غور کرنے سے یہ بات آسانی سے سمجھ آ سکتی ہے کہ لباس کو کس حیثیت سے ایک اہم نشانی کہا گیا ہے۔
اپنے معاشرے میں ہمیں بہت سے ایسے لوگ نظر آتے ہیں جو اللہ تعالیٰ کے اس اہم حکم اور نشانی کا انکار کرتے ہوئے عریاں رہنے کو تقرب الی اللہ کا ذریعہ سمجھتے ہیں۔ کیا ہم بھول گئے ہیں کہ مشرکین بھی اسی طرح کا عقیدہ رکھتے تھے جس پر اللہ تعالیٰ نے قرآن کریم میں‌اس کی تردید فرمائی اور اسے شیطانی کام قرار دیا۔ آج بھی جب لوگوں کو سمجھایا جائے تو وہ کہتے ہیں کہ یہ اللہ والے ہیں تم ان کی شان کیا جانو۔ اللہ والا وہ ہوتا ہے جو اللہ کے احکامات کو بجا لاتا ہے اور اس کے رسول صلی اللہ علیہ و علی آلہ وسلم کی اتباع کرتا ہے۔ جس نے ان دونوں کے احکامات کی خلاف ورزی کی وہ ہرگز اللہ والا نہیں ہو سکتا۔
معاملہ صرف اتنا ہی نہیں بلکہ ان خود ساختہ "اللہ والوں" کی عریاں تصویریں سربازار بکتی ہیں اور چوراہوں میں نصب ہوتی ہیں جنہیں دیکھ کر ایک شریف آدمی اپنی بہن یا والدہ کے ساتھ گزرنے میں‌بھی حیا محسوس کرتا ہے۔ اے امتِ محمد (صلی اللہ علیہ و علی آلہ وسلم آخر تم کب اپنے خود ساختہ نظریات کو چھوڑ کر قرآن و حدیث کا دامن تھامو گے۔ آخر کب ۔ ۔ ۔ ۔