برگد کے سائے تلے بیٹھا گرموبابا آواز لگا رہا ہے اوئے شرفو! چلم دہکا کرلے آ۔ اب کرمو بابا منج کی چارپائی پر بیٹھا حقے کی لمبی ناڑ کے ساتھ کش لگا رہا ہے۔ حقے کے پانی کی گڑ گڑ آواز آ رہی ہے۔ پاس ہی بیوی بیٹھی ہے، وہ بھی باتوں کے دوران کبھی کبھی حقے کا کش لگا لیتی ہے، گاﺅں کے ماحول میں ہم اکثر اوقات دیکھا کرتے کہ گاﺅں کی اکثر عورتیں حقہ پی لیا کرتی تھیں یا بڑی بوڑھی عورتیں سگریٹ پھونکتیں اور بہانہ کیا خوب ہوتا کہ پیٹ میں گیس ہو گئی تھی، حالانکہ یہ چیزیں تو پیٹ کے امراض کا سبب ہیں۔ سگریٹ والی ڈبی پر حکومت کی طرف سے یہ الفاظ نمایاں درج ہوتے ہیں۔
”سگریٹ نوشی صحت کے لئے مضر ہے“
حالیہ صورتحال یہ ہے کہ سگریٹ نوشی عام ہو گئی ہے، لڑکیوں میں وہ طبقہ جنہیں اللہ نے مال و دولت کی نعمت سے نواز رکھا ہے، سرعام سگریٹ نوشی اور شیشہ پیتی دیکھی جاتی ہیں، منشیات کا استعمال فیشن بنتا جا رہا ہے۔ تعلیمی اداروں کی بعض طالبات اور اپر کلاس کی خواتین بھی زندگی میں چارم اور تھرل لانے کے لئے فیشن کے طور پر رگوں میں منشیات کا زہر اتار کر زندگی تباہ کر رہی ہیں۔ ایک روز میری بیٹی جب سکول سے واپس آئی تو مجھے بتانے لگی امی آج پانچ چھ لڑکیوں کو سکول میں سزا ہوئی۔ میں نے پوچھا! بیٹا کس لئے؟ کہنے لگی یہ سب لڑکیاں چوری چھپے سکول سے باہر گئی تھیں واپس آئیں تو چوکیدار کی نظر میں آ گئیں۔ وہ انہیں پرنسپل کے پاس لے گیا۔ مزید بتلانے لگی کہ میں نے ان سے پوچھا کہ کہاں گئی تھیں تو بڑی ڈھٹائی سے اور مردانہ لہجہ اختیار کر کے بولیں، یار! کچھ بھی تو نہیں بس قریب ہی شیشہ گھر میں تو گئی تھیں، شیشہ پینے کے لئے ، پڑھائی سے دل اکتا جاتا ہے تو دل کو سکون دینے کے لئے دو کش شیشے کے لگا لیتی ہیں۔ بیٹی نے جب انہیں نصیحت کی کہ کیوں اپنے والدین کو دھوکہ دے رہی ہو تو ڈھٹائی سے کہنے لگیں۔ چھوڑ بوڑھوں والی نصیحتیں اور پھر ناک چڑھا کر ایک طرف کو چل دیں۔
قارئین کرام! یہ شیشہ ایک ماڈرن حقے کا نام ہے، حقے کا استعمال سب سے پہلے انڈیا کے شہروں بھوپال اور گجرات میں ہوا۔ انڈیا تمباکو برآمد کرنے والا سب سے بڑا ملک ہے۔ اب پوری دنیا میں حقہ ”شیشے“ کے نام سے مشہور ہو گیا ہے، دبئی میں بہت زیادہ شیشہ سنٹر ہیں، کیونکہ وہاں بہت سے انڈین آباد ہیں۔ اب پاکستان کے بڑے شہروں لاہور، کراچی اور اسلام آباد میں بھی جا بجا شیشہ سنٹر موجود ہیں۔ جو ریستورانوں اور کیفوں کے اندر بنائے گئے ہیں، نوجوان نسل دھڑا دھڑ اس طرف کا رخ کر رہی ہے۔ کچھ سال پہلے چھ فیصد عورتیں شیشہ پیتی تھیں اب یہ شرح 16 فیصد ہو گئی ہے۔ بڑھتی ہوئی یہ تعداد نوجوان نسل کی ہے جن کی عمریں 13 سال سے 19 سال کے درمیان ہیں۔ یہ لڑکیاں شیشہ گھروں میں بیٹھی دنیا و مافیھا سے بے نیاز شیشے کے پائپ سے کش لگاتی ہیں، ناک اور منہ سے دھویں کے مرغولے بنا کر نکالتی ہیں، لطف اندوز ہو رہی ہوتی ہیں۔ دھویں کو ایک دوسرے کے منہ میں داخل کرنا ان کا مشغلہ ہے اور کیفے میں بجتی غفلت بھری دھن میں مدہوش ایک دوسرے کا سہارا لئے بیٹھی ہوتی ہیں۔ یہ نوجوان نسل کہ جنہیں دیکھ کر شرمائیں یہود! ایک سروے کے مطابق سکول و کالج کی طالبات شیشے کو نقصان دہ یا صحت کے لئے خطرناک سمجھتی ہی نہیں۔ وہ جانتی ہی نہیں کہ شیشے میں استعمال ہونے والا تمباکو اور مختلف قسم کے 46 ذائقے (Flavour) صحت کے لئے انتہائی خطرناک ہیں، جو کیمیکل سے تیار ہوتے ہیں، ان کے رنگ خوبصورت ہوتے ہیں، یہ تو ایسا ہی ہے جیسے گندگی پر چاندی اور سونے کے ورق لگا دیئے جائیں یا عطر چھڑک دیا جائے۔ یاد رہے ایک گھنٹہ شیشہ پینا 100سگریٹ پینے کے برابر ہے، تمباکو نوشی کی دوسری قسم سگریٹ نوشی ہے۔ سب سے زیادہ سگریٹ نوشی کرنے والی عورتیں ناروے، سویڈن اور نیوزی لینڈ میں پائی جاتی ہیں۔ تمباکو ساز کمپنیاں عورتوں کے لئے خصوصی برانڈز بناتی ہیں۔ وہ سگریٹ انتہائی باریک، لمبے اور لائٹ کلر کے ہوتے ہیں، یعنی عورتوں کے لئے کمپنیاں پرکشش سگریٹ تیار کرتی ہیں۔ اب صورتحال یہ ہے کہ پاکستان میں بھی سگریٹ نوش عورتوں میں اضافہ ہو رہا ہے۔ سگریٹ ساز کمپنیاں ایلیٹ کلاس کے سکولوں کے ٹین ایجز لڑکے لڑکیوں کو فری سگریٹ پیش کرتی ہیں۔ این جی اوز میں کام کرنے والی بعض خواتین مختلف کانفرنسوں میں سگریٹ کے کش لگاتی دکھائی دیتی ہیں، عورتوں کو حقوق دلانے والیاں ایسا سبق سکھا رہی ہیں۔ حقہ اور سگریٹ پہلا زینہ ہے جو نشے کی طرف لے جاتا ہے، جب اس کی طلب زیادہ بڑھ جاتی ہے تو منشیات کا استعمال شروع ہو جاتا ہے۔ منشیات کی سمگلر خواتین کی تعداد میں بھی اضافہ ہو رہا ہے جو فائیو سٹار ہوٹلوں میں منشیات سپلائی کرتی ہیں پھر ایسی عورتیں بھی دکھلائی دیتی ہیں جو گھر سے بھاگنے والی لڑکیوں کو ورغلا کر نشے کا عادی بنا دیتی ہیں۔ خواتین گھریلو اور خاندانی مسائل، تھکن، پریشانی، احساس کمتری اور ذہنی دباﺅ سے نجات کے لئے منشیات کا سہارا لیتی ہیں۔ امیر گھرانوں کی لڑکیاں والدین کی عدم توجہی اور اسلامی تربیت نہ ہونے کی وجہ سے ایسا کرتی ہیں۔
آہ.... کاش وہ جان لیں.... اَلَا بِذِ کرِ اللَّہِ تَطمَئِنُّ القُلوُب....(خبردار دلوں کو سکون اللہ کی یاد سے ملتا ہے)
پاکستان میں ساڑھے چار ارب روپے سالانہ تمباکو نوشی کے لئے استعمال ہوتے ہیں، قرآن میں ارشاد باری تعالیٰ ہے۔ ”بے شک فضول خرچی کرنے والے شیطان کے بھائی ہیں اور شیطان تو اپنے رب کا ناشکرا ہے“۔

اور پھر صحت کی بربادی الگ ہے۔ ورلڈ ہیلتھ آرگنائزیشن کی تحقیق ہے کہ وہ لوگ جو کم عمری میں سگریٹ پیتے ہیں اور اسے جاری رکھتے ہیں، طبعی عمر سے 25`20 سال پہلے مر جاتے ہیں۔ ان لوگوں کی بہ نسبت جو سگریٹ نہیں پیتے، کیونکہ انہیں سگریٹ پینے کی وجہ سے بہت سی بیماریاں لگ جاتی ہیں، جو موت کا سبب بن جاتی ہیں۔ آیئے! تمباکو نوشی سے لگنے والی بیماریاں ملاحظہ کرتے ہیں! -1 زبان کا کینسر، -2 چنبل جلدی بیماری، -3 موتیا، -3جھریاں پڑنا، -4 بالوں کا گرنا، -5 پھیپھڑوں کا کینسر، -6دانت گلے اور منہ کی بیماریاں اور ٹی بی جیسی بیماریوں کا شکار ہونے والے یہ کون لوگ ہیں۔ ہماری نوجوان نسل کو کون برباد کر رہاہے؟ منشیات کی آئٹم کہاں سے آتی ہیں؟ عوامی سطح پر اس کے استعمال کا ذمہ دار کون ہے؟ سڑکوں اور فٹ پاتھوں پر سسکتی بلکتی زندگیاں سوالیہ نشان ہیں۔
میرے ان سارے سوالوں کا جواب اور بربادیوں کے ذمہ دار انڈیا اور امریکہ ہیں جن کی این جی اوز نوجوان نسل کو گمراہ کرنے پر پورا زور لگا رہی ہیں اور اب تو امریکہ نے پاکستان میں ہم جنس پرستی کو فروغ دینے کی کوششیں بھی شروع کر دی ہیں۔ ہمارے ملک کی اخلاقی اقدار کو مٹا دینا اور اس کی نوجوان نسل کو بے راہ روکر دینا، یہ ان کافروں کی سازشیں ہیں ہمیں ان کی سازشوں کو ناکام بنانا ہو گا۔ اپنی قوم کو بربادیوں سے بچانا ہو گا، ہم سب کا فرض ہے کہ اپنا اپنا کردار ادا کریں۔ اپنی اولاد پر گہری نظر رکھیں، یاد رکھیں سگریٹ ہی وہ پہلا زینہ ہے، جہاں سے چرس اور ہیروئن جیسی لعنتوں کا آغاز ہوتا ہے، لہٰذا اس ابتدائی زینے پر ہی اپنی اولاد کو چڑھنے نہ دیں، اے اللہ! ہماری اولادوں کی حفاظت فرما اور ماں باپ کی آنکھوں کی ٹھنڈک بنا۔ (آمین)

بشکریہ ،، ہفت روزہ جرار
والسلام ،، علی اوڈ راجپوت
ali oadrajput

__________________
"اگرحق کونہیں پہچان سکتے،تو باطل کےتیروں پر نظررکھو،جہاں پرلگ رہے ہوں وہی حق ہے///شیخ الاسلام،،،امام ابن تیمیہ رحمتہ اللہ علیہ.