خلع اور مسائل خلع

خلع اور مسائل خلع · 04-11-11, 10:04 AM

نکاح ایک عبادت ہے اور خوشگوار زندگی گزارنے کا نبوی طریقہ اور شرعی معاہدہ ہے ۔ یہ بقاء نسل کا پاکیزہ ذریعہ ہے ۔ اس سے زندگی میں سکون اور اطمینان آتا ہے ۔ اللہ کو یہ پسند ہے کہ نکاح ہونے کے بعد تا حیات یہ رشتہ باقی رہے ، لیکن کبھی ایسا ہوتا ہے کہ شوہر اور بیوی کے مزاجی اختلاف یا صورت و کردار کے فرق کی بناء پر دونوں میں نباہ نہیں ہو پاتا ۔اور دونوں ایک دوسرے کی حق تلفی کر کے اللہ کے احکام کی خلاف ورزی کرنے لگتے ہیں ، اس لیے ایسی حالت میں اللہ کریم نے طلاق اور خلع کا طریقہ مقرر کیا ہے تا کہ دونوں خوش اسلوبی سے ایک دوسرے سے جدا ہو جائیں ۔۔

خلع کا مفہوم

خلع طلاق ہی کی ایک قسم ہے ، لیکن فرق یہ ہے کہ طلاق دینے کی صورت میں شوہر بیوی کو حق مہر ادا کرتا ہے اور خلع کی صورت میں بیوی حق مہر معاف کر دیتی ہے یا واپس لوٹا دیتی ہی۔۔ خلع میں ایک طرف بیوی کی رضا مندی ہوتی ہے اور دوسری طرف شوہر کی رضا مندی ہوتی ہے ۔ بعض لوگ یہ سمجھتے ہیں کہ اگر عورت خود ہی مہر کے بدلے خلع کا اعلان کر دے تو خلع ہو جائے گا ۔ شوہر چاہے اس کو قبول کرے یا نا کرے ۔ ایسا سمجھنا غلط ہے ۔ جب تک شوہر منظور نہ کر ے خلع نہ ہو گا اور عورت شوہر کی بیوی باقی رہے گی۔

خلع کا مطالبہ

لیکن عام اور پر سکون زندگی میں خلع کا مطالبہ کرنا درست نہیں ہے اور جو عورت بلا وجہ خلع لینا چاہتی ہے ایسی عورت کے بارے میں نبی کریم صلی اللہ علیہ وسلم نے ارشاد فرمایا کہ :
جو عورت بغیر کسی وجہ کے اپنے شوہر سے طلاق کا مطالبہ کرے تو اس پر جنت کی خوشبو حرام ہے ۔ ( نسائی شریف )
اور دوسر ے مقام پر آپ صلی اللہ علیہ وسلم نے ارشاد فرمایاکہ :
اپنے شوہروں سے الگ ہونے والی اور خلع لینے والی عورتیں منافق ہیں ۔ (مشکوۃ شریف )
اس لیے عورتوں کو خلع کا مطالبہ ان ہی حالات میں کرنا چا ہیے جب انہیں یہ اندیشہ ہو کہ اللہ کریم نے جو میاں بیوی کے حقوق متعین کیے ہیں ان کی خلاف ورزی ہو رہی ہے ۔ یہ خلاف ورزی دونوںکی طرف سے ہو یا ایک کی طرف سے ۔ جیسے کوئی عورت اپنے شوہر کی جسمانی خرابی ، بڑھاپا ، ضعف کزوری یا بد خلقی یا بد صورتی کی وجہ سے نفرت کرے ۔ اور وہ یہ سمجھے کہ اللہ نے شوہر کی اطاعت کا جو حق اس پر عائد کیا ہے اسے وہ ادا نہیں کرسکے گی یانہیں کر پا رہی تو ایسی صورت میں وہ مہر کے بدلے شوہر سے خلع حاصل کر لے ۔ اور شوہر کو چاہیے کہ اس کو خلع دے کر الگ کر دے ۔۔
بلکہ مناسب یہہے کہ ایسی حالت میں دونوں اپنے اپنے خاندان سے ایک ایک دیندار اور سمجھدار نمائندہ بنادیں اور یہ دونوں نمائندے میاں بیوی کے معاملہ میں غور کریں ۔ اور اگر زیادتی شوہر کی طرف سے ہو تو اسے تنبیہ کریں اور اگر عورت کی ہو تو اسے سمجھائیں اور اگر اس سے کام نہ چلے اور وہ کسی طرح نہ مانیں تو اگر زیادتی بیوی کی ہو تو مہر کے بدلے خلع کروا دیں ، اور اگر زیادتی شوہر کی ہو تو مہر کی معافی کے بغیر طلاق دلوادیں ۔

خلع کا معاوضہ

خلع میں معاوضہ کی مقدار بھی محدود ہونی چاہیے ۔ اگر مہر کی رقم دے دی ہو تو عورت واپس کر دے اور اگر نہیں دی تو معاف کر دے ۔ مہر کی رقم سے زیادہ لینا جائز نہیں ہے ۔
نبی کریم صلی اللہ علیہ وسلم نے ارشاد فرمایا ہے کہ : خلع لینے والی بیوی سے شوہر اس سے زیادہ نہ لے جتنا اس کو دیا ہی۔ ( بیھقی )
جیسا کہ حضرت ثابت بن قیس رضی اللہ عنہ کی بیوی حبیبہ بنت سہل رضی ا للہ عنہا نے خلع کے بدلہ میں مہر میں دیئے ہوئے باغ سے زیادہ دینا چاہا توآپ صلی اللہ علیہ وسلم نے فرمایا کہ نہیں اس سے زیادہ نہیں ( سنن اربعہ بحوالہ فتح الباری ص ۳۵۰ )
اسی طرح خلع میں معاوضہ لینا بھی اسی وقت درست ہو گا ، جب آپس کے بگاڑ کی وجہ بیوی ہو ۔ اور خلع کی وجہ شوہر کی زیادتی ہو تو پھر شوہر کو خلع کے بدلے میں کچھ لینا بھی جائز نہیں ہے

خلع کا طریقہ

خلع کا بہتر طریقہ یہ ہے کہ دو مسلم گواہوں کی موجودگی میں بیوی خلع کے یہ الفاظ کہے کہ میں نے خلع کے عوض اپنا کل مہر اور عدت کا خرچ معاف کیا ۔اور شوہر کہے کہ میں نے خلع کو منظور کرتے ہوئے اپنی بیوی فلاں بنت فلاں کو خلع کر دیا ، اب وہ میری بیوی نہیں رہی ۔
خلع کے الفاظ زبان سے ادا کرنے کے بعد دونوں خلع کی تحریر پر اپنے دستخط یا نشان انگھوٹھا ثبت کریں ، اور پھر گوہان اور کاتب تحریر بھی اپنے دستخط مع ولدیت و سکونت ثبت کریں

خلع کا حکم

خلع ایک طلاق بائن کے حکم میں ہے ۔خلع کرنے سے رشتہ نکاح ختم ہو جاتا ہے ۔ اور میاں بیوی ایک دوسرے سے آزاد ہو جاتے ہیں ۔ خلع کے بعد اگر دونوں پھر ازواجی رشتہ میں منسلک ہونا چاہیں تو پھر سے نکاح کر کے میاں بیوی کی طرح زندگی گزار سکتے ہیں مگر اب مرد کو بیوی پر دو ہی طلاق کا حق باقی رہے گا اور خلع جس مال پر ہو گا اس کا مالک شوہر ہو گا ۔اگر بیوی کا مہر شوہر کے ذمہ ہو اور اس نے نقد مال پر خلع کیا تو نقد مال بیوی شوہر کو دے گی اور مہر بھی ساقط ہو جائے گا ، بیوی مہر نہیں لے سکتی ہی۔ اسی طرح خلع کرنے سے گزشتہ مدت کا نفقہ بھی ساقط ہو جائے گا ۔ البتہ عدت کا نفقہ ساقط نہیں ہو گا ، بشرطیکہ خلع میں اس کا ذکر نہ ہو ۔ اور اگر بیوی نے اولاد کے نفقہ کی معافی پر خلع کیا توخلع ہو جائے گا مگر اولاد کا نفقہ باپ سے ساقط نہیں ہو گا اس لیے کہ ماں کو اولاد کے نفقہ کے عوض خلع کرنے کا حق نہیں پہنچتا۔ اسی طرح خلع سے حق حضانت ( یعنی بچوں کی پرورش کا حق بھی ) ساقط نہیں ہو گا ۔

خلع کی عدت

خلع کے بعد عورت کو عدت گزارنا لازم ہے ۔اگر حیض آرہا ہو تو عد ت تین حیض ہے ۔اور اگر حیض نہ آتا ہو چاہے کم عمر ہونے کی وجہ سے یا زیادہ عمر ہونے کی وجہ سے ہو تو عدت تین مہینے ہے ۔ اور اگر حمل ہے تو بچہ پیدا ہونے پر عدت ختم ہو گی َ
خلع سے عدت کے دوران عورت کی سکونت کا حق زائل نہیں ہو گا ۔ اگر خلع شوہر کے گھر رہنے کے دوران ہوا ہو تو عورت عدت تک اس مکان میں رہے گی۔ اگرچہ خلع میں اس کو معاف کر دیا گیا ہو ۔ اس لیے کہ یہ حق سکونت حقوق اللہ میں داخل ہے اور بندہ اس کو ختم کرنے کا حق نہیں رکھتا ہے ۔۔۔
اللہ کریم ہم سب کو سمجھ اور عقل سلیم عطاء فرمائے آمین یا رب العٰلمین

**بنت حوا** · 04-11-11, 06:57 PM

اچھی شئیرنگ ھے معلوماتی جزاک اللہ

**سحر** · 04-11-11, 09:06 PM

اقتباس:

اگر زیادتی شوہر کی ہو تو مہر کی معافی کے بغیر طلاق دلوادیں ۔

اگر عورت خلع لے رہی ہو اور ذیادتی شوہر کی ہو تو کیا شوہر اپنی ذیادتی کو قبول کرے گا اور خلع کے ساتھ مہر ادا کرے گا ؟

آپ نے لکھا کہ خلع طلاق بائن
طلاق بائن کو ذرا تفصیل سے بیان کردیں کہ طلاق بائن اور عام طلاق میں کیا فرق ہے ؟

**نبیل خان** · 07-11-11, 07:29 PM

اقتباس:

اصل مراسلہ منجانب : سحر

اگر عورت خلع لے رہی ہو اور ذیادتی شوہر کی ہو تو کیا شوہر اپنی ذیادتی کو قبول کرے گا اور خلع کے ساتھ مہر ادا کرے گا ؟

آپ نے لکھا کہ خلع طلاق بائن
طلاق بائن کو ذرا تفصیل سے بیان کردیں کہ طلاق بائن اور عام طلاق میں کیا فرق ہے ؟

طلاق بائن کا حکم یہ ہے کہ بیوی فورا نکاح سے نکل جاتی ہے اور شوہر کو رجوع کا حق نہیں رہتا ۔ البتہ عدت کے اندر اور عدت ختم ہونے کے بعد بھی دوبارہ نکاح ہو سکتا ہے ۔۔
طلاق رجعی

یہ ہے کہ صاف اور صریح لفظوں میں ایک یا دو طلاق دی جائے اس کاحکم یہ ہے کہ ایسی طلاق میں عدت پوری ہونے تک نکاح باقی رہتا ہے اور شوہر کو اختیار ہے کہ عدت ختم ہونے سے پہلے بیوی سے رجوع کر لے ۔ اگر اس نے عدت کے اندر رجوع کر لیا تو نکاح بحا ل رہے گا اور دوبارہ نکاح کی ضرورت نہ ہو گی اگر اس نے عدت کے اندر رجوع نہ کیا تو طلاق موئثر ہو جائے گی اور نکاح ختم ہو جائے گا ۔ اگر دونوں چاہیں تو دوبارہ نکاح کر سکتے ہیں

04-11-11, 06:57 PM	#2
بنت حوا Senior Member تاریخ شمولیت: Oct 2011 مراسلات: 1,139 کمائي: 12,572 شکریہ: 3,450 702 مراسلہ میں 1,612 بارشکریہ ادا کیا گیا	اچھی شئیرنگ ھے معلوماتی جزاک اللہ Share Share this post on Digg Del.icio.us Technorati Twitter Facebook!

موضوع کے اختیارات
Show Printable Version Email this Page
ظاہری انداز	Rate This Thread
Linear Mode Switch to Hybrid Mode Switch to Threaded Mode	Rate This Thread:

Currently Active Users Viewing This Thread: 1 (0 members and 1 guests)