الحمدللہ رب العالمین والصلاۃ والسلام علٰی سیدنا ومولانامحمدوعلٰی اٰلہ واصحابہ واھل بیتہ اجمعین
اما بعد!
شریعت اسلامی میں یہ کام جتنا پسندیدہ اور عنداللہ مستحسن اور بہتر ہے کی کوئی مسلمان مرد کسی مسلمان عورت سے شریعت کے بتائے ہوئے طریقے کے مطابق ازواجی تعلق قائم کر کے اس کے ساتھ اپنی پوری زندگی عفت و عصمت اور پاکدامنی کے ساتھ گزار دے اتنی ہی یہ بات اللہ کے نزدیک بیحد مبغوض اور سخت نا پسندیدہ ہے کہ کوئی مرد اپنی شریک زندگی اور رفیقہ حیات کو طلاق دے کر اپنی زوجیت سے اسے علیحدہ کر دے اور اسی طرح میاں بیوی کا قیمتی رشتہ توڑدے ۔ حدیث پاک میں حضرت عبدللہ بن عمر سے منقول ہے کہ
رسول اللہ صلی اللہ علیہ وسلم نے ارشاد فرمایا کہ حلال چیز وں میں سب سے زیادہ نا پسندیدہ طلاق ہے
( ابو دود۔ ابن ماجہ۔بحوالہ مشکوٰۃص۲۸۳)

حضرت علی رضی اللہ عنہ سے روایت ہے نبی کریم صلی اللہ علیہ وسلم نے ارشاد فرمایا کہ:
تزوجوولاتطلقو فان الطلاق یحتزمنہ عرش الرحمٰن : یعنی نکاح کرو اور طلاق نہ دو کیونکہ طلاق دینے سے رحمان کاعرش ہل جاتا ہے ۔
( بحوالہ معارف القرآن ج ۸ )

ایک حدیث میںحضرت معاذ بن جبل رضی اللہ عنہ سے مروی ہے کہ نبی کریم صلی اللہ علیہ وسلم نے ارشاد فرمایا :
معاذ ! اللہ تعالٰی نے ر وئے زمین پر جتنی : مستحب :چیزیںپیدا کی ہیں ان میں سے ان کے نزدیک سب سے زیادہ پسندیدہ چیزغلام و لونڈی آزاد کرنا ہے اور اللہ تعالٰی نے روئے زمین پر جتنی :حلال : چیزیں پیدا کی ہیں ان میں سے اس کے نزدیک سب سے زیادہ بری چیز طلاق دینا ہی۔
( دار قطنی ، مشکوۃ ص۲۸۴ )
یعنی شریعت میں جو پسندیدہ عمل مشروع کیے گے ہیں ان میں غلام آزاد کرنا اللہ کو سب سے زیادہ پسند ہے ۔ اور جتنے اعمال کو اللہ کریم نے جائز قرار دیا ہے ان میں سب سے زیادہ نا پسندیدہ عمل طلاق ہے ۔ان احادیث سے اندازہ لگایا جاسکتا ہے کہ طلاق دینا اللہ کریم کو کس قدر نا پسند ہے ۔اور نا پسندیدہ ہونے کی وجہ یہ ہے کہ نکاح کے ذریعہ مرد اور عورت ایک دوسرے کی زندگی کے شریک اور رفیق بنتے ہیں ، اور دونوں جائز طریقہ سے نسل انسانی کی افزائش کرتے ہیں ، زنا و بدکاری اور دل و نگاہ کی آوارگی سے اپنے نفس کو بچاتے ہیں ، اور اپنے ماحول اور معاشرہ کو صاف ستھرا رکھتے ہیں ، اولاد کی تعلیم و رتربیعت میں دونوں ایک دوسرے کے معاون ہوتے ہیں بیوی گھر کی زینت ا ور باعث سکون و قرار ہوتی ہے ، دونوں ایک دوسرے سے سکون پاتے ہیں ۔ عورت کی فطری نزاکت کے پیش نظر مذہب اسلام نے ممرد کو اس کی ضروریات کا ذ معہ دار اور کفیل بنایا ہے ۔ اس لیے اسلام میں یہ امر سخت نا پسند ہے ہے کہ مرد اپنی شریک زندگی کو طلاق دے کر اپنے گھر کی رونق ختم کردے خود بھی مصیبت و پریشانی میں پڑے اور عورت کو بھی مشقت و پریشانی میں ڈال دے ۔اس وجہ سے اسلام نے طلاق دینے کی اجازت اس وقت دی ہے جب میاں بیوی کے مابین ایسا بگاڑ ، کشیدگی اور نفرت پیدا ہو جائے جو افہام و تفہیم کے ذریعہ دور نہ ہو سکے اور دونوں کے تعلقات و معاملات کو سلجھانے کا طلاق کے سوا دوسرا راستہ باقی نہ رہے ۔۔ لیکن ہماری بد قسمتی ہے کہ آج ہمارا مسلم معاشرہ اپنے فرائض کو فراموش کر چکا ہے جس کی وجہ سے طرح طرح کی لعنتوں اور برائیوں میں مبتلا ہے ان میں ایک طلاق کا غلط استعمال بھی ہے ۔۔۔
اب تو طلاق دینا ایک کھیل بن چکا ہے ۔ بس ذرا غصہکے آیا ، کسی بات پہ ناراض ہوئے ، کبھی بیوی سے ، کبھی اس والدین سے ، غصہ کسی سے بھی ہو اترتا ہے بیوی پر ،غصہ میں سب کچھ بھول کر صرف طلاق دینا یاد رہتا ہے ، اور جب طلاق دینے پہ آئے تو ایک ہی کیوں فورا تین یا تین سے بھی زیادہ طلاق دے کر سکون ملتا ہے ۔ اور صجب غصہ اترا ہوش آیا تو معلوم ہوا کہ جیتے جی بیوی جو زندگی کی ساتھی تھی ، رنج و غم کے وقت دلاسا دینے والی تھی ہاتھ سے نکل چکی ہے تو پھر حیلے بہانے کر کے بیوی کو رکھنے کی کوشش کی جاتی ہے ۔ طلاق دینے سے دنیا تو ہہلے ہی تاریک ہو چکی اور اب آخرت تبای کرنے کی کوشش کی جاتی ہے

طلاق کی لغوی اور شرعی تحقیق

طلاق لغت میں قید و بندش کھول دینے کا نام ہے اور یہ لفظ : اطلاق : سے ماخوذ ہے ۔ اہل عرب کہتے ہیں ۔۔ اطلقت ابلی واسیری ۔۔ میں نے اپنے اونتٹ اور قیدی کو چھوڑ دیا ۔ وطلقت امراتی ۔۔ میں نے اپنی بیوی کو طلاق دے دی اسطرح اہل عرب کے نذدیک لفظ ِِاطلاق اور طلاق دونوں یکساں ہیں ۔ البتہ اہل لغت نے دونوں کے استعمال میں یہ فرق کیا ہے کہ لفظ طلاق صرف عورتوں کے لیے استعمال کرتے ہیں اور ِاطلاق عورتوں کے علاوہ جانور اور قیدی وغیرہ کو چھوڑنے کے لیے بھی استعمال کرتے ہیں
( لسان العرب لابن منظور افریقی ج۴ )

اصطلاح شریعت میں

نکاح سے پیدا ہونے والی حلت اور قید و بندش کو مخصوص الفاظکے ذریعہ ختم کر دینے کا نام طلاق ہے ۔اور مخصوص الفاظ سے مراد وہ الفاظ ہیں جو ؛ ط ، ل ، ق کے مادہ پر مشتعمل ہووہ اپنے مفہوم میں صریح ہو جیسے انت طائق ۔ یا طلاق کے ساتھ کسی اور معنی کا بھی احتمال رکھتا ہو یعنی کنایہ ہو جیسے انت مطلقۃ لام پر تشدید کے بغیر ۔ ( فتح القدیر ج۳ )

طلاق کی مشروعیت کا سبب

طلاق کے اندر چونکہ اصل ممانعت ہے اس لیے شریعت نے شوہر کو انتہائی خراب حالات میں طلاق دینے کی اجازت دی ہے ۔ ایسے نا گزیر حالات میں بھی اگر شریعت طلاق کی اجازت نہ دیتی تو میاں بیوی دونوں کے حق میں ظلم ہوتا ۔ چناچہ فقہاء طلاق کی مشروعیت اور اس کی حکمت کا تذکرہ کرتے ہوئے فرماتے ہیں :
اور طلاق کے مشروع ہونے کا سبب زوجین کے اخلاقی حالات میں غیر معمولی دوری، چھٹکارہ حاصکل کرنے کی ضرورت ہے اور ایسا بغض پیدا ہونے کی صورت میں جسکی وجہ سے اللہ کی حدود کا قائم کرنا ممکن نہ رہ جائے بندش نکاح سے آزادی کی نا گزیر ضرورت ہے اور طلاق کی مشروعیت اللہ کی طرف سے رحمت ہے ۔
(فتح القدیر ۔ البحرالرائق ج ۳ )
طلاق کے وقت شوہر میں کن شرطوں کا پایا جانا ضروری ہی
شریعت نے ہر شوہے کی طلاق کو معتبر قرار نہیں کیونکہ بعض دفع ایسے حالات پیش آتے ہیں جن میں امسان عقل و ہوش کھو بیٹھتا ہے اور بعض حالات میں شریعت کے احکام کے مخاطب ہونے کی صلاحیت اپنے اندر نہیں رکھتا اس لیے فقہا ء نے تصریح کی ہے کہ طلاق دیتے وقت ضروری ہے کہ شوہر ۔ عاقل ، بالغ ، اور بیدار ہو ۔اگر ان میں کوئی بھی شرط نہیں پائی گئی تو طلاق عورت پرواقع نہیں ہو گی اور لغو قرار دی جائے گی ۔ ( فتح القدیر ج ۳ )

ِ: جاری ہے :