کچھ دیرکے لئے جسمانی آنکھیں بند کرکے تصور کی آنکھیں کھول لیجئے اورایک ہزارچارسوبیس برس پیچھے پلٹ کر دنیا کی حالت پرنظرڈالئے۔ یہ کیسی دنیا تھی‘انسان اورانسان کے درمیان تبادلہٴ خیالات کے وسائل کس قدر کم تھے ۔قوموں اورملکوں کے درمیان تعلق کے ذرائع کتنے محدود تھے۔انسان کی معلومات کس قدرکم تھیں۔ اس کے خیالات کس قدرتنگ تھے ‘اس پروہم وتوحش کاکس قدر غلبہ تھا‘جہالت کے اندھیرے میں علم کی روشنی کتنی دھندلی تھی۔ اس اندھیرے کودھکیل دھکیل کر کتنی دقتوں کے ساتھ پھیل رہی تھی۔ دنیامیں نہ تارتھا‘نہ ٹیلی فون تھا‘نہ ریڈیوتھا‘ نہ ریل اورہوائی جہازتھے اور نہ مطابع اور اشاعت خانے تھے۔ مدرسوں اورکالجوں کی کثرت تھی نہ اخبارات اوررسالے شائع ہوتے تھے۔ کتابیں کثرت سے لکھی جاتی تھیں‘نہ کثرت سے ان کی اشاعت ہوتی تھی۔ اس زمانے کے ایک عالم کی معلومات بھی بعض حیثیات سے موجودہ زمانے کے ایک عامی کی بہ نسبت کم تھیں۔ اس زمانے کی ایک اونچی سوسائٹی کاآدمی بھی موجودہ زمانے کے مزدوروں کی بہ نسبت کم شائستہ تھا۔ اس زمانے کاایک روشن خیال آدمی بھی آج کل کے تاریک خیال آدمی سے زیادہ تاریک خیال تھا۔ جو باتیں آج ہرکس وناکس کومعلوم ہیں‘اس زمانے میں برسوں کی محنت اورتلاش وتحقیق کے بعدبھی بمشکل معلوم ہوسکتی تھیں۔ جوباتیں آج روشنی کی طرح فضا میں پھیلی ہوئی ہیں اورہربچے کوہوش سنبھالتے ہی حاصل ہوجاتی ہیں‘ان کے لئے اس زمانے میں سینکڑوں میل کے سفرکیے جاتے تھے اورعمریں ان کی جستجومیں بیت جاتی تھیں۔ جن باتوں کوآج اوہام وخرافات سمجھا جاتاہے‘وہ اس زمانے کے ”حقائق“ تھے۔ جن افعال کو آج ناشائستہ اوروحشیانہ کہاجاتاہے‘ وہ اس زمانے کے عام معمولات تھے۔ جن طریقوں سے آج انسان کاضمیرنفرت کرتاہے‘وہ اس زمانے کے اخلاقیات میں نہ صرف جائز تھے بلکہ کوئی شخص یہ خیال بھی نہ کرسکتاتھاکہ ان کے خلاف بھی کوئی طریقہ ہوسکتا ہے۔ انسان کی عجائب پرستی اس قدربڑھی ہوئی تھی کہ وہ کسی چیز میں اس وقت تک کوئی صداقت‘ کوئی بزرگی‘ کوئی پاکیزگی تسلیم ہی نہیں کرسکتاتھاجب تک کہ وہ فوق الفطرت نہ ہو‘ خلاف عادت نہ ہو‘ غیرمعمولی نہ ہوحتیّٰ کہ انسان خوداپنے آپ کواس قدر ذلیل سمجھتاتھاکہ کسی انسان کاخدارسیدہ ہونا اورکسی خدا رسیدہ ہستی کاانسان ہونااس کے تصورکی رسائی سے بہت دور تھا۔
اس تاریک دورمیں زمین کاایک گوشہ ایساتھاجہاں تاریکی کاتسلط اوربھی زیادہ بڑھا ہواتھا۔ جوممالک اس زمانے کے معیارتمدن کے لحاظ سے متمدن تھے‘ ان کے درمیان عرب کاملک سب سے الگ تھلگ پڑاہواتھا۔ اس کے اردگرد‘ ایران ‘ روم اور مصرکے ملکوں میں علوم وفنون اورتہذیب وشائستگی کی کچھ روشنی پائی جاتی تھی مگرریت کے بڑے بڑے سمندروں نے انہیں عرب سے جدا کررکھاتھا۔عرب سوداگراونٹوں پرمہینوں کی راہ طے کرکے ان ملکوں میں تجارت کے لئے جاتے تھے اور صرف اموال کامبادلہ کرکے واپس آجاتے تھے۔ علم وتہذیب کی کوئی روشنی ان کے ساتھ نہ آتی تھی۔ ان کے ملک میں نہ کوئی مدرسہ تھا اور نہ کتب خانہ تھا۔ نہ لوگوں میں تعلیم کاچرچاتھا‘نہ علوم وفنون سے کوئی دلچسپی تھی۔ تمام ملک میں گنتی کے چند آدمی تھے جنہیں کچھ لکھنا پڑھنا آتاتھامگروہ بھی اتنانہیں کہ اس زمانے کے علوم وفنون سے آشناہوتے۔ ان کے پاس ایک اعلیٰ درجے کی باقاعدہ زبان ضرورتھی جس میں خیالات کواداکرنے کی غیر معمولی صلاحیت تھی۔ ان میں بہترین ادبی مذاق بھی موجودتھا مگر ان کے لٹریچر کی جوبھی باقیات ہم تک پہنچی ہیں‘ ان کودیکھنے سے معلوم ہوتاہے کہ ان کی معلومات کس قدر محدود تھیں‘ تہذیب وتمدن میں ان کادرجہ کس حدتک پست تھا۔ ان پراوہام کا کس قدر غلبہ تھا۔ان کے خیالات اوران کی عادات میں کتنی جہالت اوروحشت تھی‘ان کے اخلاقی تصورات کتنے بھدّے تھے۔
وہاں کوئی باقاعدہ حکومت نہ تھی‘کوئی ضابطہ اورقانون نہ تھا۔ہرقبیلہ اپنی جگہ خودمختار تھا اورصرف ”جنگل کے قانون“ کی پیروی کی جاتی تھی۔ جس کاجس پر بس چلتا‘ اسے مارڈالتا اور اس کے مال پرقابض ہوجاتا۔یہ بات ایک عرب بدوکی فہم سے بالاترتھی کہ جوشخص اس کے قبیلے کانہیں۔ اسے وہ کیوں نہ مارڈالے اوراس کے مال پرکیوں نہ متصرف ہوجائے۔
اخلاق اورشائستگی کے جوکچھ بھی تصورات ان لوگوں میں تھے وہ نہایت ادنیٰ اورسخت ناتراشیدہ تھے۔ پاک وصاف‘ جائز وناجائز‘شائستہ اور ناشائستہ کی تمیز سے وہ تقریباً ناآشنا تھے۔ ان کی زندگی نہایت گندی تھی۔ ان کے طریقے وحشیانہ تھے۔ زنا‘جوا‘شراب‘چوری‘رہزنی اور قتل وغارتگری ان کی زندگی کے معمولات تھے۔ وہ ایک دوسرے کے سامنے بے تکلف برہنہ ہوجاتے تھے۔ان کی عورتیں ننگی ہوکر کعبے کا طواف کرتی تھیں۔وہ اپنی لڑکیوں کواپنے ہاتھ سے زندہ دفن کردیتے تھے‘محض اس جاہلانہ خیال کی بناء پر کہ کوئی ان کاداماد نہ بنے۔ وہ اپنے باپوں کے مرنے کے بعداپنی سوتیلی ماؤں سے نکاح کرلیتے تھے۔ انہیں کھانے‘لباس اورطہارت کے معمولی آداب بھی معلوم نہ تھے۔
مذہب کے باب میں وہ ان تمام جہالتوں اورضلالتوں کے حصہ دارتھے جن میں اس زمانے کی دنیا مبتلا تھی۔ بت پرستی‘ ارواح پرستی‘کواکب پرستی‘ غرض ایک خداکی پرستش کے سو ا اس وقت دنیامیں جتنی ”پرستیاں“ پائی جاتی تھیں‘وہ سب ان میں رائج تھیں۔ انبیائے قدیم اوران کی تعلیمات کے متعلق کوئی صحیح علم ان کے پاس نہ تھا۔ وہ اتناضرورجانتے تھے کہ ابراہیم علیہ السلام اور اسماعیل علیہ السلام ان کے ہیں مگریہ نہ جانتے تھے کہ دونوں باپ بیٹوں کادین کیاتھا اوروہ کس کی عبادت کرتے تھے۔ عاد اور ثمودکے قصے بھی ان میں مشہور تھے مگران کی روایتیں عرب مؤرخین نے نقل کی ہیں‘ان کوپڑھ جائیے۔ کہیں آپ کو صالح علیہ السلام اورہود علیہ السلام کی تعلیمات کانشان نہ ملے گا۔ ان کویہودیوں اور عیسائیوں کے واسطے سے بنی اسرائیل کی کہانیاں بھی پہنچی تھیں مگر وہ جیسی کچھ تھیں‘ ان کااندازہ صرف ایک نظراسرائیلی روایات پر ڈال لینا کافی ہے جومفسرین اسلام نے نقل کی ہیں۔آپ کو معلوم ہو جائے گا کہ اہل عرب اور خود بنی اسرائیل جن انبیاء سے واقف تھے‘وہ کیسے انسان تھے اور نبوت کے متعلق ان کاتصور کتنا گھٹیادرجے کاتھا۔
ایسے زمانے میں‘ ایسے ملک میں‘ایک شخص پیداہوتا ہے۔ بچپن ہی میں ماں باپ اور دادا کاسایہ اس کے سر سے اٹھ جاتاہے۔ اس لئے اس گئی گزری حالت میں ایک عرب بچے کو جو تھوڑی بہت تربیت مل سکتی تھی‘ وہ بھی اس کونہیں ملتی۔ ہوش سنبھالتا ہے تووہ بدوی لڑکوں کے ساتھ بکریاں چرانے لگتاہے ۔ جوان ہوتا ہے توسوداگری میں لگ جاتاہے۔ اٹھنا‘بیٹھنا ‘ملنا جلنا سب کچھ انہی عربوں کے ساتھ تھا‘جن کاحال اوپر آپ نے دیکھ لیا۔ تعلیم کانام تک نہیں حتیّٰ کہ پڑھنا لکھنا تک نہیں آتا۔ کسی عالم کی صحبت بھی میسر نہ ہوئی کہ ”عالم“ کاوجود اس وقت تمام عرب میں کہیں نہ تھا۔ چند مرتبہ اسے عرب سے باہر قدم نکالنے کااتفاق ضرور ہوا مگر یہ سفرصرف شام کے علاقے کے تھے اور ویسے ہی تجارتی سفرتھے ‘جیسے کہ اس زمانے میں عرب کے تجارتی قافلے کیا کرتے تھے۔ بالفرض اگر ان اسفار کے دوران میں اس نے کچھ آثار علم وتہذیب کامشاہدہ کیا اورکچھ اہل علم سے ملاقات کااتفاق بھی ہوا توظاہر ہے کہ ایسے منتشر مشاہدات اور ہنگامی ملاقاتوں سے کسی انسان کی سیرت نہیں بن جاتی۔ ان کااثر کسی شخص پراتنازبردست نہیں ہوسکتا کہ وہ اپنے ماحول سے بالکل آزاد ‘بالکل مختلف اور اتنابلند ہوجائے کہ اس میں اوراس کے ماحول میں کچھ نسبت ہی نہ رہے۔ ان سے ایسا علم حاصل ہونا ممکن ہی نہیں ہے جوایک ان پڑھ بدوی کوایک ملک کانہیں تمام دنیا کااور ایک زمانے کانہیں تمام زمانوں کا لیڈر بنادے۔اگربہ فرض محال اس نے باہر کے لوگوں سے استفادہ کیا بھی ہوتوجومعلومات اس وقت دنیا کے کسی فرد کو حاصل ہی نہ تھیں‘ مذہب ‘اخلاق‘تہذیب اور تمدن کے جوتصورات اور اصول اس وقت دنیا میں کہیں موجود ہی نہ تھے‘انسانی سیرت کے جونمونے اس وقت کہیں پائے ہی نہیں جاتے تھے‘ان کے حصول کاکوئی ذریعہ نہیں ہوسکتاتھا۔
صرف عرب ہی کانہیں ‘تمام دنیاکاماحول پیش نظررکھئے اور دیکھئے کہ یہ شخص جن لوگوں میں پیدا ہوا ‘جن میں بچپن گزارا‘ جن کے ساتھ پل کر جوان ہوا‘جن سے اس کامیل جول رہا‘ جن سے اس کے معاملات رہے‘ ابتدا ہی سے عادات میں‘ اخلاق میں وہ ان سب سے مختلف نظرآتاہے۔ وہ کبھی جھوٹ نہیں بولتا ‘اس کی صداقت پر اس کی ساری قوم گواہی دیتی ہے۔ اس کے کسی بدترین دشمن نے بھی کبھی اس پریہ الزام نہیں لگایاکہ اس نے فلاں موقع پرجھوٹ بولاتھا۔ وہ کسی سے بدکلامی نہیں کرتا‘کسی نے اس کی زبان سے کبھی گالی یاکوئی فحش بات نہیں سنی ۔ وہ لوگوں سے ہرقسم کے معاملات کرتاہے مگر کبھی کسی سے تلخ کلامی اور توتومیں میں کی نوبت نہیں آتی۔ اس کی زبان میں سختی کی بجائے شیرینی ہے اوروہ بھی ایسی کہ جوکوئی اس سے ملتا ہے ‘گرویدہ ہوجاتاہے۔ وہ کسی سے بدمعاملگی نہیں کرتا۔ کسی کی حق تلفی نہیں کرتا۔برسوں سوداگری کاپیشہ کرنے کے باوجودکسی کاایک پیسہ بھی ناجائز طریقے سے نہیں لیتا۔ جن لوگوں سے اس کے معاملات پیش آتے ہیں‘وہ سب اس کی ایمانداری پرکامل بھروسہ رکھتے ہیں۔ ساری قوم اس کوامین کہتی ہے۔ دشمن تک اس کے پاس اپنا قیمتی مال رکھواتے ہیں اور وہ ان کی بھی حفاظت کرتاہے۔ بے حیاء لوگوں کے درمیان وہ ایسا حیادار ہے کہ ہوش سنبھالنے کے بعد کسی نے اسے برہنہ نہیں دیکھا۔ بداخلاقوں کے سامنے وہ ایسا پاکیزہ اخلاق ہے کہ کبھی کسی بدکاری میں مبتلا نہیں ہوتا۔شراب اورجوئے کوہاتھ نہیں لگاتا۔ناشائستہ لوگوں کے درمیان وہ ایساشائستہ ہے کہ ہر بدتمیزی اورگندگی سے نفرت کرتاہے اوراس کے ہرکام میں ستھرائی اورپاکیزگی پائی جاتی ہے۔ سنگدلوں کے درمیان وہ ایسا نرم دل ہے کہ ہرایک کے دکھ درد میں شریک ہوتا ہے۔ یتیموں اور بیواؤں کی مددکرتاہے۔کسی کو اس سے دکھ نہیں پہنچتا اور وہ دوسروں کی خاطر دکھ اٹھاتاہے۔ وحشیوں کے درمیان وہ ایسا صلح پسندہے کہ اپنی قوم میں فسادوخونریزی کی گرم بازاری دیکھ کر اس کواذیت ہوتی ہے۔ اپنے قبیلے کی لڑائیوں سے دامن بچاتاہے اور مصالحت کی کوششوں میں پیش پیش رہتاہے۔ بت پرستوں کے درمیان وہ سلیم الفطرت اورصحیح العقل ہے کہ زمین وآسمان میں کوئی چیز اسے پوجنے کے لائق نظرنہیں آتی ۔کسی مخلوق کے آگے اس کاسرنہیں جھکتا۔ بتوں کے چڑھاوے کاکھانابھی وہ قبول نہیں کرتا۔ اس کادل خودبخود شرک اورمخلوق پرستی سے نفرت کرتاہے۔
اس ماحول میں یہ شخص ایسا ممتازنظرآتاہے کہ جیسے گھٹا ٹوپ اندھیرے میں ایک شمع روشن ہے یا پتھروں کے ڈھیر میں ایک ہیراچمک رہاہے۔
تقریباً چالیس سال تک ایسی پاک صاف شریفانہ زندگی بسرکرنے کے بعداس کی زندگی میں ایک انقلاب شروع ہوتا ہے۔وہ اس تاریکی سے گھبرا اٹھتاہے جو اس کوہرطرف سے محیط نظر آرہی تھی۔وہ جہالت ‘بداخلاقی‘بدکرداری‘ بدنظمی‘شرک اور بت پرستی کے اس ہولناک سمندر سے نکل جاناچاہتاہے جو اس کو گھیرے ہوئے تھا۔ اس ماحول میں کوئی چیز بھی اس کواپنی طبیعت کے مناسب نظر نہیں آتی۔ وہ سب سے الگ ہوکر آبادی سے دورپہاڑوں کی صحبت میں جاجاکربیٹھنے لگتاہے۔تنہائی اور سکون کے عالم میں کئی کئی دن گزارتاہے۔روزے رکھ رکھ کر اپنی روح اوراپنے دل ودماغ کواورزیادہ پاک صاف کرتاہے۔ سوچتاہے ‘غوروفکر کرتاہے‘کوئی ایسی روشنی ڈھونڈتاہے جس سے وہ اس چاروں طرف چھائی ہوئی تاریکی کودور کردے۔ ایسی طاقت حاصل کرناچاہتاہے جس سے اس بگڑی ہوئی دنیاکو توڑپھوڑ کرپھرسے سنواردے۔
یہ تھاوہ پیغام جسے لے کروہ غارحرا سے نکلا۔
جاہل قوم اس کی دشمن ہوجاتی ہے‘ گالیاں دیتی ہے‘ پتھر مارتی ہے۔ایک دن دودن نہیں‘اکٹھے تیرہ برس تک اس پر سخت سے سخت ظلم توڑتی ہے۔ یہاں تک کہ اسے وطن سے نکال باہر کرتی ہے اورپھرنکالنے پربھی دم نہیں لیتی ۔جہاں وہ جاکر پناہ لیتاہے‘وہاں بھی اسے ہرطرح ستاتی ہے۔ تمام عرب کواس کے خلاف ابھاردیتی ہے اورکامل آٹھ برس اس کے خلاف برسرپیکار رہتی ہے۔وہ ان سب تکلیفوں کوسہتاہے مگر اپنی بات سے نہیں ٹلتا۔
یہ قوم اس کی دشمن کیوں ہوئی؟ کیازراورزمین کا کوئی جھگڑا تھا؟کیا وہ ان سے دنیاکی کوئی چیز مانگ رہاتھا؟ نہیں‘ ساری دشمنی صرف اس بات پرتھی کہ وہ ایک خدا کی بندگی اور پرہیزگاری اورنیکوکاری کی تعلیم کیوں دیتاہے؟ بت پرستی‘شرک اور بدعملی کے خلاف تبلیغ کیوں کرتاہے؟پجاریوں اورپروہتوں کی پیشوائی پرکیوں ضرب لگاتاہے؟سرداروں کی سرداری کا طلسم کیوں توڑتاہے؟انسان اورانسان کے درمیان سے اونچ نیچ کافرق کیوں مٹاناچاہتاہے؟ قبائلی اور نسلی تعصبات کوجاہلیت کیوں قراردیتاہے؟ زمانہٴ قدیم سے سوسائٹی کاجونظام بندھا چلا آرہاہے‘اسے کیوں توڑناچاہتاہے؟ قوم کہتی تھی ‘یہ باتیں جوتو کہہ رہاہے‘یہ سب خاندانی روایات اور قومی طریقے کے خلاف ہیں توان کوچھوڑدے ورنہ ہم تیرا جینا بھی مشکل کردیں گے۔
اچھاتواس شخص نے یہ تکلیفیں کیوں اٹھائیں؟ قوم اس کو بادشاہی دینے پرآمادہ تھی۔دولت کے ڈھیراس کے قدموں میں ڈالنے کوتیارتھی بشرطیکہ وہ اپنی تعلیم سے بازآجائے مگر اس نے ان سب کوٹھکرادیا اوراپنی تعلیم کی خاطر پتھرکھانا اورظلم سہنا قبول کیا۔ یہ آخرکیوں؟کیا ان کے خداپرست اورنیکوکار بن جانے میں اس کاذاتی فائدہ تھا؟کیاکوئی ایسافائدہ تھاجس کے مقابلے میں ریاست‘امارت‘دولت اورعیش کے سارے لالچ بھی ناقابل التفات تھے؟کیاکوئی ایسافائدہ تھا جس کی خاطر ایک شخص سخت سے سخت جسمانی اورروحانی اذیتوں میں مبتلاہونا اورکامل21سال مبتلارہنا بھی گواراکرسکتاہو؟غورکرو۔ کیانیک نفسی‘ایثار اورہمدردی بنی نوع انسان کااس سے بھی بلند تر کوئی مرتبہ تمہارے تصورمیں آسکتاہے کہ کوئی شخص اپنے کسی فائدے کی خاطرنہیں‘دوسروں کے بھلے کی خاطرتکلیفیں اٹھائے؟ جن کی بھلائی اور بہتری کے لئے وہ کوششیں کرتاہے‘وہی اس کو پتھر ماریں‘گالیاں دیں‘ گھر سے بے گھرکردیں‘ غریب الوطنی میں بھی اس کا پیچھانہ چھوڑیں اوران سب باتوں پربھی وہ ان کا بھلا چاہنے سے بازنہ آئے۔
پھردیکھو!کیاکوئی جھوٹا شخص کسی بے اصل بات کے پیچھے ایسی مصیبتیں برداشت کرسکتاہے ؟کیا کوئی تیرتکے لڑانے والا انسان محض گمان وقیاس سے کوئی بات کہہ کر اس پر اتنا جم سکتا ہے کہ مصیبتوں کے پہاڑ اس پرٹوٹ جائیں‘زمین اس پر تنگ کر دی جائے‘ تمام ملک اس کے خلاف اٹھ کھڑے ہوں‘بڑی بڑی فوجیں اس پرامنڈ امنڈ کرآئیں‘ مگروہ اپنی بات سے یک سرِموہٹنے پرآمادہ نہ ہو؟یہ استقامت ‘یہ عزم‘یہ ثبات خودگواہی دے رہاہے کہ اس کواپنی صداقت پرکامل یقین تھا۔اگر اس کے دل میں شک وشبہ کاادنیٰ شائبہ بھی ہوتا تووہ مسلسل اکیس سال تک مصائب کے پے درپے طوفانوں کے مقابلے میں کبھی نہ ٹھہرسکتا۔(اسلامی نظام زندگی اور اس کے بنیادی تصورات از سید مودودی)