امام بخاری کی معصومیت اور انبیائے کرام کی لغزشیں
کتاب کا نام ہے ’’ دفاع صحیح بخاری ‘‘ لکھنے والے ہیں اہل حدیث کے مشہور عالم ’’ شیخ الا سلام مولانا محمد ابوالقاسم سیف بنارسی صاحب ‘‘ کتاب پر تقدیم لکھی ہے ’’فضیلۃ الشیخ مولانا ارشاد الحق اثری صاحب نے‘‘اور ’’جناب فضیلۃ الشیخ مولانا محمد عزیر شمس صاحب نے‘‘۔تحقیق و تعلیق ہے جناب ’’حافظ شاہد محمود صاحب کی ‘‘جوفاضل مدینہ یو نیورسٹی ہیں۔
ناشر ہیں ام القری پبلی کیشنز سیالکوٹ روڈ فتو منڈ ، گوجرانوالہ
کتاب کا صفحہ نمبر ہے 72.73
اس صفحہ پر جناب مولف نے ایک ذیلی عنوان باندھا ہے جس کا نام ہے ’’ امام بخاری کا معصوم نہ ہونا ‘‘ اس ذیل میں جو حضرت علامہ نے لکھا ہے وہ ہم من و عن نقل کرتے ہیں۔

’’امام پر یہ اعتراض کہ’’ وہ معصوم نہ تھے ،لہذا ان سے وقو ع خطا ممکن ہے‘‘۔معترض کی انتہا درجی کی بے عقلی پر دال ہے۔اس لئے کہ لغزش ( تقدیمی و تاخیری )کا صدور تو معصومین سے بھی ہوا ہے،پھر غیر معصوم کیوں کر بچ سکتا ہے؟لیکن قابل غور امر یہ ہے کہ امام بخاری نے کونسا کام کیا اور ان سے کس امر میں خطا ہوئی؟امام بخاری نے صرف احادیث شتے [ مختلف]( ت پر کھڑا زبر ہے۔نوشاد )کی تدوین کی ،فن حدیث میں غلطی ممکن نہیں کیوں کہ وہ قول نبی ہےجو محلی بعصمت از خطا ہے،یا قول صحابہ جو اہل زبان ہیں۔سند حدیث میں بھی خطا ممکن نہیں ،کیوں کہ با اتفاق امت اس کے رواۃ نہایت ثقہ اور حجت ہیں،پس رہ گئی تدوین اس میں البتہ امکان کو دخل ہے،لہذا اس میں خطا نہیں بلکہ تقدیمی و تاخیری لغزش کو ضرور دخل ہوگا،اور ایسی لغزشیں انبیائے معصومین سے ثابت ہیں۔

’’ لیغفرلک اللہ ما تقدم من ذنبک وما تاخر‘‘سورۃ الفتح سورۃ نمبر ۴۸ آیت نمبر ۲
’’ عفا اللہ عنک لم اذنت لھم‘‘ سورہ التوبۃ سورۃ نمبر ۹ آیت نمبر ۴۳

وغیرہ آیات قرانیہ میں اسی کی طرف اشارہ ہے،پس انبیا کی ایسی لغزشیں چونکہ معاف اور ناقابل مواخذہ ہیں،اسی طرح امام بخاری کی یہ
لغزش بھی قابل اعتراض اور صحت کے لیئے مضر نہیں۔‘‘

( مولف نےصرف آیات کے ایک ایک حصے بیان کیئے ہیں پوری آیت درج نہیں کی ہےاور ان کا ترجمہ بھی درج نہیں کیا ذیل میں ہم صرف آیات کے ان حصوں کا ترجمہ نقل کرتے ہیں۔مضمون کے آخر میں ان شا اللہ تعالی پوری پوری آیت اور اس کا ترجمہ درج کریں گے۔نوشاد)

( اللہ آپ کی اگلی اور پچھلی لغزشوں کو معاف فرما چکا ہے الفتح ۔آیت نمبر دو )

( اللہ نے آپ کو معاف کیا آپ نے ان کو اجازت کیوں دے دی التوبۃ آیت نمبر تینتالیس )
( اب کتاب کے مولف جناب بنارسی صاحب کی تحریر ہے ۔نوشاد )

ثانیا:۔امام بخاری کا جامع صحیح کی تالیف کے وقت ایسا انتظام و التزام اور اہتمام دیکھ کر عقل باور نہیں کر سکتی کہ اس قدر محافظ و گارڈ کے ہوتے ہوئے جرم و خطا وہاں پھٹک بھی سکے،چنانچہ امام بخاری خود فرماتے ہیںجس کو ہم ایک معتبر حنفی کی کتاب سے نقل کرتے ہیں۔
( مولف نے عربی عبارت بھی دی ہے مگر ہم انہی کا کیا ہوا صرف ترجمہ درج کرتے ہیں۔نوشاد)
ترجمہ:۔امام بخاری نے فرمایا میں نے اس کتاب(جامع صحیح ) میںکو ئی حدیث بغیر نہائےاور دو رکعت نماز پڑھے بغیر نہیں رکھی ،اور میں نے تقریبا چھ لاکھ حدیثوں سے انتخاب کر کے اس میں رکھی۔اور سولہ برس میں اس کو تصنیف کیا۔اور میں نے کوئی حدیث اس میں داخل نہیں کی ،جب تک کہ خدا سے استخارہ نہ کیا اور دو رکعت نماز نہ پڑھ لی اور جب تک مجھے اس کا صحیح ہونا متیقن نہیں ہوا ۔
( مرقاۃ ملا علی قاری حنفی ۱۔۱۳ )
اللہ اکبر ایک ایک حدیث کی جانچ پڑتال میں ڈیڑھ ڈیڑھ یوم کامل صرف ہوئے۔اور وہ بھی صرف تدوینی امر میں اور پھر اس پر الزام خطا۔

تکاد السموت یتفطر ن منہ وتنشق الارض وتخرالجبال ھدا سورۃ مریم انیسویں سورہ آیت نمبر ۹۰
( مولف نے اس آیت کا ترجمہ بھی نہیں دیا ذیل میں ہم شاہ عبد القادر کے ترجمے سے اس آیت کا ترجمہ لکھتے ہیں۔نوشاد )
( ابھی آسمان پھٹ پڑیں اس بات سے ،اور ٹکڑے ہو زمین،اور گر پڑیں پہاڑ ڈھے کہ ۔سورہ مریم آیت نمبر ۹۰ )

عرض نوشاد
۱:۔ سب سے پہلے مولف نے سورہ الفتح کی آیت نمبر دو کا صرف ایک حصہ ذکر کیا ہے ۔اس سورت سورہ الفتح میں اللہ تعالی نے رسول اکرم کو مخاطب کیا ہے اوریہ سورت صلح حدیبیہ کے بعد نازل ہوئی۔اس سورت کی پہلی آیت ہے ۔
آیت نمبر ۱:۔بلا شبہ ہم نے آپ کو صریح فتح دی۔

آیت نمبر ۲:۔اللہ آپ کی اگلی اور پچھلی لغزشوں کو معاف فرما چکا ہے۔اور آپ پر اپنے انعام کی تکمیل فرمائےاور آپ کو سیدھے راستے پر لے چلے۔

آیت نمبر ۳:۔اور اللہ آپ کی ایسی مدد فرمائے کہ اس میں غلبہ اور عزت ہو۔

2:۔ اس کے بعد مولف نے سورہ التوبۃ کی آیت نمبرتینتالیس کا ایک حصہ ذکر کیا ہے ۔اس سورت کے اس حصے میں مدینہ کے منافقین کا تذکرہ ہے جو رسول اللہ سے جنگ میں شرکت نہ کرنے کے بہانے کر رہے تھے اور رسول اکرم سے جنگ میںنہ جانے کی اجازت مانگ رہے تھے ۔یہاں تک کہ رسول اللہ نے انھیں جنگ میں شرکت نہ کرنے کی اجازت دے دی۔یہ بات اس سورت کی ۴۲ ویں آیت سے شروع ہوئی ہے اور آیت نمبر ۵۲ تک چلی گئی ہے ۔ذیل میں ہم ان تمام آیات کا ترجمہ نقل کرتے ہیں تاکہ بات واضح ہو جائے کہ رسول اکرم سے کیا کہا جارہا ہے

آیت نمبر ۴۲:۔اگر مال نزدیک اور سفر معمولی ہوتا تو وہ لوگ (یعنی منافقین)ضرور آپ کے ساتھ ہو لیتے ۔لیکن ان کو مسافت طویل نظر آئی اور اب یہ اللہ کی قسمیں کھائیں گے کہ اگر ہم سےہوسکتا تو ضرور آپ کے ساتھ چلتے ،یہ لوگ اپنی جانوں کو وبال میں ڈال رہے ہیں اور اللہ جانتا ہے کہ وہ جھوٹے ہیں۔

۴۳:۔اللہ نے آپ کو معاف کیا آپ نے ان کو اجازت کیوں دے دی۔یہاں تک کہ آپ پر ظاہر ہو جاتا کہ سچے کون ہیں اور جھوٹے کون

۴۴:۔وہ لوگ جو اللہ پر اور آخرت کے دن پر ایمان لائے آپ سے رخصت نہ طلب کریں گے اس بات سے کہ اپنے مال و جان سے جہاد کریں اور اللہ انہیں خوب جانتا ہے جو خوف خدا رکھتے ہیں ۔

۴۵:۔اجازت تو وہ طلب کرتے ہیں جو اللہ اور آخرت کے دن پر ایمان نہیں رکھتے اور جن کے دل شک میں پڑے ہوتے ہیں ۔پس وہ اپنے شک میں سر گرداں ہیں۔

۴۶:۔اور اگر وہ واقعی نکلنا چاہتے تو اس کے لیئے کچھ ساز و سامان ضرور تیار کر لیتے لیکن اللہ نے ان کا جنگ پر جانا پسند ہی نہیں فرمایا ۔سو ان کو وہیں روک دیا اور حکم ہوا کہ تم بیٹھنے (جنگ پر نہ جانے والے)والوں کے ساتھ بیٹھے رہو۔

۴۷:۔اگر (منافقین)تمہارے ساتھ نکلتے تو تمہارے درمیان فتنہ ہی بڑھاتے اور بگاڑ کی تلاش میں تمہارے درمیان دوڑتے پھرتے۔اور تم میں ان کے جاسوس ہیں اور اللہ ظالموں کو خوب جانتا ہے

۴۸:۔وہ بگاڑ پہلے بھی تلاش کرتے رہے ہیں اور آپ کے کام پلٹنے میں لگے رہے ہیں یہاں تک کہ حق آپہنچا اور اللہ کا حکم غالب ہو کر رہا ہر چند کہ وہ ان کو ناگوار گزرتا رہا۔

۴۹:۔اور بعض کہتے ہیں کہ مجھے تو اجازت دیجےاور مجھے آفت میں نہ ڈالیئے ۔خوب سن لو وہ گمراہی میں پڑے ہوئے ہیں ۔اور بے شک دوزخ کافروں کو گھیرے ہوئے ہے۔

۵۰:۔اور اگر آپ کو (رسول کو)کوئی بھلائی پہنچتی ہے تو وہ ان کو بری لگتی ہےاور اگر آپ کو کوئی مصیبت پہنچتی ہے تو کہتے ہیں ہم نے اپنا کام پہلے ہی درست کر لیا تھا اور خوشیاںمناتے واپس جاتے ہیں۔

۵۱:۔آپ فرمادیجے کہ ہم کو ہر گز کچھ نہ پہنچے گا مگر وہی جو اللہ نے ہمارے لیئے لکھ دیا ہے ،اور وہی ہمارا کار سازہے۔اور مومنوں کو چاہیئے کہ اللہ ہی پر بھروسہ کریں

۵۲:۔آپ فرما دیجے کہ تم تو ہمارے حق میں دو بھلائیوں میں سے ایک کے منتظر ہو(کہ ہم شہید ہوتے ہیں یا غازی)اور ہم منتظر ہیں کہ اللہ اپنے پاس سے تم پر عذاب کرے گا یا ہمارے ہاتھوں۔سو تم بھی منتظر رہو اور ہم بھی تمہارے ساتھ منتظر ہیں۔

( نوٹ آیات کے یہ ترجمے ہم نے ڈاکٹر سید حامد حسن بلگرامی کے مرتب کردہ فیوض القران ترجمہ قران سے لیئے ہیں ۔اسے ایچ ۔ایم سعید کمپنی ادب منزل پاکستان چوک کراچی نے طبع کیا ہے۔نوشاد )

مولف نے اپنی عبارت میں امام بخاری کی عظمت بیان کرتے ہوئے اور ان پر اعتراض کرنے والوں کی زبان بند کرتے ہوئے جو کچھ لکھا ہے اسے ہم نکات کی صورت میں پیش کرتے ہیں۔

۱۔اگر کوئی یہ اعتراض کرتا ہے کہ امام بخاری معصوم نہ تھے اور ان سے غلطی ہونا ممکن ہے تو ایسی سوچ رکھنے والا بے عقل ہے۔

۲۔کیوں کہ پہلے اور بعد میں ہونے والی غلطیاں تو معصومین یعنی انبیائے کرام سے بھی ہوئی ہیں اس لیئے ان غلطیوں سے غیر نبی کیسے بچ سکتا ہے

۳۔امام بخاری نے صرف مختلف احادیث کی تدوین کی ہے۔

۴۔فن حدیث میں غلطی ممکن نہیں ہے ۔تدوین میں البتہ (لغزش کے۔نوشاد)امکان کو دخل ہے۔

۵۔لیکن اس میں بھی خطا نہیں بلکہ تقدیمی و تاخیری(پہلے اور بعد کی۔نوشاد)لغزش ضرور ہو سکتی ہے ۔

۶۔ایسی لغزشیں تو انبیائے کرام سے بھی ثابت ہیں۔اور مختلف قرانی آیات میں وہ بیان بھی ہوئی ہیں۔مثلا سورہ الفتح ۔۲ اور التوبۃ ۴۳

۷۔اگر انبیائے کرام کی یہ غلطیاں قابل مواخذہ نہیں اور معاف ہیں تو۔

۸۔امام بخاری کی بھی ایسی (پہلے اور بعد کی۔نوشاد)غلطیاں قابل اعتراض نہیں اور (غالبا حدیث کی۔نوشاد )صحت کے لیئے نقصان دہ نہیں ہیں۔

ثانیا
۱۔امام بخاری نے جس اہتمام سے جامع صحیح کی تالیف کی ہے اس سے یہ ممکن نہیں کہ کوئی جرم اورغلطی امام بخاری کی کتاب کے پاس پھٹک بھی سکے کیوں کہ۔

۲۔امام بخاری نے اس کتاب میں کوئی حدیث بغیر نہائے اور دو رکعت نماز پڑھے بغیر نہیں لکھی

۳۔امام بخاری نے تب تک اس کتاب میں کوئی حدیث داخل نہیں کی جب تک خدا سے اس حدیث کے بارے میں استخارہ نہ کر لیا ہو(عربی عبارت کے الفاظ ہیں۔حتی استخرت اللہ۔نوشاد) اور اس حدیث سے متعلق یہ یقین نہ حاصل کر لیا ہو کہ یہ حدیث صحیح ہے۔(ظاہر ہے امام بخاری نے استخارہ اللہ سے کیا تھا توحدیث کے صحیح ہونے کے بارے میں یقین بھی اللہ ہی سے حاصل کیا ہوگا۔)

۴۔اس کتاب میں چھ لاکھ حدیثوں سے انتخاب کر کے احادیث لکھی گئیں ۔سولہ برس اس کتاب کو لکھنے میں لگے۔

اس سے ہمیں تو یہی معلوم ہوتا ہے کہ جناب بنارسی صاحب اصل میں یہ کہنا چاہتے ہیں کہ کیوں کہ امام بخاری نے ہر حدیث کے لیئے اللہ سے استخارہ کیا اور جب انھیں یہ یقین ہو گیاکہ یہ حدیث صحیح ہے تب کہیں جاکر انھوں نے اس کتاب میں وہ حدیث لکھی۔
اس کے باوجود بھی اگر امام بخاری سے احادیث جمع کرنے اور لکھنے کے دوران کوئی غلطی ہوئی تو ایسی غلطی تو حضرات انبیائے کرام(مولف نے لکھا تو معصومین سے غلطیاں ہونا ہے لیکن مثال میں آیات وہ دیں ہیں جن سے ان کے خیال میں رسول اللہ سے غلطیوں کا ہونا معلوم ہوتا ہے)سے بھی ہوئی ہیں ۔ان غلطیوں میں انبیا اور امام بخاری ایک جیسے ہیں۔

اور جب ان غلطیوں کی کوئی سزا انبیا کرام کو نہیں دی جائے گی بلکہ معاف کردیا گیا۔تو امام بخاری پر بھی ان غلطیوں کے سلسلے میں اعتراض درست نہیں ہے۔
اور اگر اس کے باوجود بھی کوئی امام بخاری پر غلطی کا الزام لگائے تو قران کے الفاظ میں ایسا کیوں نہ ہو کہ
(ابھی آسمان پھٹ پڑیں اس بات سے ،اور ٹکڑے ہو زمین،اور گر پڑیں پہاڑ ڈھے کہ ۔سورہ مریم آیت نمبر ۹۰ )

فی الحال مولف کی اس عبارت پر ہم تبصرہ نہیں کرتے ۔ہاں جب ’’ اہل علم ‘‘اس عبارت کی تشریح و وضاحت میں اپنے خیالات قلم بند کریں گے تو ضرور ہم بھی اپنا طالب علمانہ نقطہ نظر پیش کریں گے۔فی الحال آپ یہ عبارت پڑھیئے اور سر دھنیے۔
نوٹ:۔ جس کتاب سے میں نے یہ سب کچھ لکھا ہے یہ کتاب الحمد اللہ میرے پاس موجود ہے کوئی یہ نہ سمجھے کہ جناب عبد اللہ حیدر کے الفاظ میں میں نے کسی جاہل و معتصب شخص کے کہنے میں آکر اور ادھر ادھر سے سن کر یہ سب لکھا ہے۔