اچھے مالک اپنے ملازمین اور خدمت گزاروں کے حق میں بھی اچھے ہوتے ہیں۔ محنت مشقت اٹھانے والے خدمت گزار کے لیے جہاں معقول سہولیات کا اہتمام کرتے ہیں وہاں سیرو تفریح اور اچھا کھانے پینے میں بھی ان کو محروم نہیں رکھتے۔ کسی کا باورچی حرارت کی شدت برداشت کرتے ہوئے جب کھانا تیار کر کے لائے تو اسے بھی کھانے میں شرک کرنا چاہیے یا کم از کم اس کھانے میں اس کا حصہ بھی رکھنا چاہیے۔ ابوہریرہ رضی اللہ عنہ سے مرفوعًا روایت ہے کہ رسول اللہ صلی اللہ علیہ و علی آلہ وسلم نے فرمایا:
إِذَا أَتَى أَحَدَكُمْ خَادِمُهُ بِطَعَامِهِ قَدْ وَلِيَ حَرَّهُ وَمَشَقَّتَهُ وَدُخَانَهُ وَمُؤْنَتَهُ، فَلْيُجْلِسْهُ مَعَهُ، فَإِنْ أَبَى، فَلْيُنَاوِلْهُ أُكْلَةً فِي يَدِهِ
(سلسلۃ الاحادیث الصحیحۃ حدیث نمبر 1285، سلسلہ الاحادیث الصحیحہ اردو جلد 1 ص 49)
"جب تم میں سے کسی کا خادم کھانا لائے، تو اس نے کھانے کی گرمی، مشقت اور محنت برداشت کی ہے۔ پس اسے بھی (کھانے کے لیے) ضرور ساتھ بٹھا لے۔ پھر اگر وہ (خادم شرم یا کھانا کم ہونے کی وجہ سے) انکار کرتا ہے تو اس کے ہاتھ میں لقمہ دے دے"
ہماری خراب عادات میں سے ایک عادت یہ بھی ہے کہ شادی بیاہ اور دیگر تقریبات کے موقع پر بھاری مقدار میں کھانا ضائع تو ہو جاتا ہے مگر کسی مستحق اور خدمت گزار کے منہ میں لقمہ تک نہیں جاتا۔ امیر گھرانوں میں کھانا چاہے فریزر میں پڑا ہوا سڑ جائے مگر کسی ملازم یا مستحق کے کام نہیں آتا۔