امت مسلمہ پرحضرت ابراہیم علیہ السلام کا احسانِ عظیم
ہم ہر نماز میں درود پڑھتے ہیں تو ابراہیم علیہ السلام کا تذکرہ بھی ضرورکرتے ہیں،لیکن کم ہی ایسا ہوتا ہے کہ ہمیں درود پڑھتے ہوئے اور قرآن میں آپ کا نام آنے پراس بات کا احساس ہوتا ہو کہ حضرت ابراہیم ّ ہمارے کتنے بڑے محسن تھے۔ یہ دعائے خلیل اللہ ہی تھی کہ جس کے ایک ایک لفظ کو اللہ تعالیٰ نے شرفِ قبول بخشا اورامت مسلمہ کی ہدایت کا سامان محسن اعظم حضور نبی کریم صلی اللہ علیہ و سلم کی شکل میں فرمایا۔حضور اکرم صلی اللہ علیہ و سلم عین ان ہی صفات کے ساتھ مبعوث فرمائے گئے جن صفات اور اوصاف کی حضرت ابراہیم نے دعا فرمائی تھی:
رَبَّنَا وَ ابْعَثْ فِيْهِمْ رَسُوْلًا مِّنْهُمْ يَتْلُوْا عَلَيْهِمْ اٰيٰتِكَ وَ يُعَلِّمُهُمُ الْكِتٰبَ وَ الْحِكْمَةَ وَ يُزَكِّيْهِمْ اِنَّكَ اَنْتَ الْعَزِيْزُ الْحَكِيْمُ ("اور اے ربّ ، ان لوگوں میں خود اِن ہی کی قوم سے ایک رسول اٹھائیو ، جو انہیں تیری آیات سنائے ، ان کو کتاب اور حکمت کی تعلیم دے اور ان کی زندگیاں سنوارے ۔ تو بڑا مقتدر اور حکیم ہے ۔"(البقرہ:129)
چنانچہ قرآن ِپاک میں رسول اللہ صلی اللہ علیہ و سلم کی بعثت کو ان الفاظ میں اہل ایمان پر احسان قرار دیا گیا ہے:
لَقَدْ مَنَّ اللّٰهُ عَلَى الْمُؤْمِنِيْنَ اِذْ بَعَثَ فِيْهِمْ رَسُوْلًا مِّنْ اَنْفُسِهِمْ يَتْلُوْا عَلَيْهِمْ اٰيٰتِہ وَ يُزَكِّيْهِمْ وَ يُعَلِّمُهُمُ الْكِتٰبَ وَ الْحِكْمَةَ وَاِنْ كَانُوْا مِنْ قَبْلُ لَفِيْ ضَلٰلٍ مُّبِيْنٍ(درحقیقت اہلِ ایمان پر تو اللہ نے یہ بہت بڑا احسان کیا ہے کہ اُن کے درمیان خود ان ہی میں سے ایک ایسا پیغمبر اُٹھایا جو اس کی آیات انہیں سناتا ہے ، اُن کی زندگیوں کو سنوارتا ہے اور اُن کو کتاب اور دانائی کی تعلیم دیتا ہے ، حالانکہ اس سے پہلے یہی لوگ صریح گمراہیوں میں پڑے ہوئے تھے۔آل عمران:164)
سورہ بقرہ میں جہاں تحویل قبلہ کا تذکرہ آیا،جو اس امت کے لیے امامت الٰہیہ تفویض کرنےکا اعلان تھا وہاں ایک بار پر ان ہی الفاظ کے ساتھ حضور رسالت ماب کی بعثت کا ذکر فرمایا گیا :
كَمَاۤ اَرْسَلْنَا فِيْكُمْ رَسُوْلًا مِّنْكُمْ يَتْلُوْا عَلَيْكُمْ اٰيٰتِنَا وَ يُزَكِّيْكُمْ وَ يُعَلِّمُكُمُ الْكِتٰبَ وَ الْحِكْمَةَ وَ يُعَلِّمُكُمْ مَّا لَمْ تَكُوْنُوْا تَعْلَمُوْنَ(جس طرح (تمہیں اِس چیز سے فلاح نصیب ہوئی کہ ) ہم نے تمہارے درمیان خود تم میں سے ایک رسول بھیجا ، جو تمہیں ہماری آیات سناتا ہے ، تمہاری زندگیوں کو سنوارتا ہے ، تمہیں کتاب اور حکمت کی تعلیم دیتا ہے ، اور تمہیں وہ باتیں سکھاتا ہے جو تم نہ جانتے تھے ۔البقرہ:151)
سورہ جمعہ میں ایک بار پھر سر زمین عرب کے امیوں میں نبی کریم صلی اللہ علیہ و سلم کی بعثت کا ذکر کرتے ہوئے فرمایا گیاکہ حضور اکرم صلی اللہ علیہ و سلم آئے تو قرآن آیا اورقرآن کی تلاوت وتعلیم کا انتطام ہوا،حضور آئے تو حکمت آئی۔آپ کے تشریف لانے سے زندگیاں سنواری گئیں۔اگر حضور تشریف نہ لائے ہوتے تو انسانیت اسی طرح کھلی گمراہی میں پڑی رہتی جیسے کہ وہ پہلےگمراہ تھی:
ھُوَ الَّذِيْ بَعَثَ فِي الْاُمِّيّینَ رَسُوْلًا مِّنْھُمْ يَتْلُوْا عَلَيْهھُمْ اٰيٰتِه وَ يُزَكِّيْهھُمْ وَ يُعَلِّمھُمُ الْكِتٰبَ وَ الْحِكْمَةَۗ وَ اِنْ كَانُوْا مِنْ قَبْلُ لَفِيْ ضَلٰلٍ مُّبِيْنٍۙ(وہی ہے جس نے اُمیّوں کے اندر ایک رسول خود اُن ہی میں سے اُٹھایا ،جو اُنہیں اُس کی آیات سناتا ہے ، اُن کی زندگی سنوارتا ہے ، اور اُن کو کتاب اور حکمت کی تعلیم دیتا ہے ، حالانکہ اِس سے پہلے وہ کھُلی گمراہی میں پڑے ہوئے تھے۔“الجمعہ:2)
اے اللہ تو ہمیں تو فیق عطا کر کہ جس طرح ہم محسنِ اعظم،ہادی بر حق حضرت نبی کریم صلی اللہ علیہ و سلم پر درود بھجتے اور ان کے احسان کو محسوس کرتے اور یاد کرتےہیں،ہم جد انبیاءحضرت ابراہیم علیہ السلام کی اس عظیم ترین دعا پر ان کا احسان بھی یاد کریں،جس کے نتیجے میں وہ محسنِ انسانیت تشریف لائےجن کے ذریعے اللہ نےہمارے لیےجنت کا حصول ممکن بنایا۔اے اللہ توہمیں ابراہیم علیہ السلام سےملاقات کا شرف بھی عطا کر تاکہ ہم ان کے احسان عظیم کا بالمشافہ شکریہ ادا کر سکیں۔