ایک ایسے وقت میں کہ جب پاکستان میں ہر طرف رشوت ستانی ، اقربا پروری اور لوٹ کھسوٹ کا فساد گرم ہے اور ایسا محسوس ہوتا کہ یہ ناانصافی کے اس اندھیرے میں ہمارا ملک اب ڈوبا کہ تب ڈوبا ، شاید چند لوگ ایسے بھی موجود ہیں جو اس ملک کی بقا اور اللہ کے غضب کے خلاف ہمارے لیے ڈھال بنے ہوئے ہیں۔

یقیناً ہمارے بیچ ایسے ایماندار اور متقی افراد ضرور موجود ہیں جن کی وجہ سے اللہ ہمارے اوپر اپنا غضب نازل کرنے سے شرماتا ہے ۔ ورنہ ہمارے کرتوتوں میں تو کوئی کمی نہ ہے۔

ایسے ہی ایک ایماندار شخص سے ہمارا واسطہ تب ہوا جب ہم چار دوست اپنی گاڑی میں ناران سے واپس اپنے شہر آ رہے تھے اور راستے میں انجانے میں یا تھکاوٹ کی وجہ سے شور کوٹ میں ٹریفک قانون کی غلطی کر بیٹھے ۔ اس ایماندار شخص کا نام احمد بخش ہے۔ یہ شخص شور کوٹ کی ٹریفک پولیس میں اے ایس آئی ہے۔ اس نے ہمیں روکا ، نہایت عزت و احترام سے کاغذات طلب کئیے۔
اور باوجود ہماری تمام تر منت سماجت اور پھر ڈھکے چھُپے لالچ دینے کے اُس نے ہمارا چالان کاٹ کر ہمارے ہاتھ تھما دیا۔

میں پاکستان پر چھائے ظلمت اور تباہی کےگھٹا ٹوپ اندھیروں میں بیٹھا اکثر سوچا کرتا تھا کہ ، ایمانداری کہاں گئی۔ ہمارے ایمان کہاں گئے۔ بالآخر ایک تلخ واقعہ میں اُس ایماندار شخص سے ملاقات ہو ہی گئی۔

باوجود شدید تلخی کے ، میں اس بات کو معیوب سمجھتا ہوں کہ اگر اسکی اچھی بات کی تعریف نہ کروں۔
احمد بخش میں تمہاری ایمانداری اور فرض شناسی کو سلیوٹ پیش کرتا ہوں۔ تم ہمارے ملک کی بقا کی ضمانت ہو۔