نگہت نسیم۔سڈنی
‎اسا مہ بن لاڈن کی موت کا ڈرامہ آج بلکل ایسے ہوا ہے جیسے رات کے اندھیرے میں کوئی چور ڈاکو کسی گھر میں گھس کر پہلے اس گھر کی بجلی اور فون کی تاریں کاٹ دیں۔ ۔ پھر اس گھر کے مکینوں کو اپنی مرضی اور ضرورت کے مطابق چھانٹ چھانٹ کر مار دیں ۔ بلکل ایسے ہی کچھ امریکی جہازوں پر سوار پاکستان میں داخل ہوئے اور پاکستانی اینٹلیجنس نیٹ ورک کو ڈسکنکٹ کر کے اسامہ بن لاڈن کو مارنے کا معرکہ سر انجام دیا اور کسی انڈین فلم کی طرح اپنے بگ باس اوباما کو اپنی کامیابی کی اطلاع دیتے ہوئے کہا “ کام ہوگیا بھائی آپ کا دشمن اسامہ بن لاڈن کو ٹپکا دیا “ ۔ پھر دن چڑھے ، چھوٹے بدمعاش بھائی زرداری کو فون پر یہ کہتے ہوئےاطلاع دی “ اے بھائی اپن کو تم کیا سمجھے تھے۔۔ بس سوئے رہو اور کچھ نہ کرو ، ہم نے اپنا کام کر لیا ہے “ ۔۔

‎ کتنی حیرت کی بات ہے کہ دس برسوں سے دنیا کا سب سے زیادہ مطلوب شخص اور مغربی حکمرانوں کا محبوب ہدف جس کے سر کی قیمت بھی پانچ کروڑ امریکی سرکار نے خود لگا رکھی ہو وہ اتنی خاموشی سے مار دیا گیا کہ نہ گھر والوں (پاکستان) کو پتہ چلا اور نہ انڈر ورلڈ ( امریکہ ، برطانیہ ) کے کسی ملک کے کسی ٹی وی چینلز پر اس کی موت کا ٹیلپ دکھایا گیا، اور مزید حیرت یہ کہ اسامہ بن لادن کو اسی خاموشی سے شریعی طور سمندر برد بھی کر دیا گیا ( سمندر میں لاشوں کو آخری رسومات کے بعد دفنانا کس مذہب میں رائج ہے ) ۔ جس طرح سے اسامہ بن لادن کے چرچے دنیا میں ہوا کرتےتھے اس سے تو یہی خیال رہا کرتا تھا کہ مرنے کے بعد عبرت کے نام پر اسے فرعون کے ساتھ ممی بنا کر رکھا جائے گا ۔۔ اسامہ کی موت کی اس اچانک ڈرامائی کاروائی سے رام گوپال ورما کی ڈائرکٹ کی ہوئی کئی سسپنس سے بھرپور کئی فلمیں یاد آ گئیں ۔ چونکہ امریکہ کی حالیہ سیاست بھی اب ہالی ووڈ اور بولی ووڈ سے زیادہ متاثر لگتی ہے ۔ اس لئے یہ بھی یہ بھی ڈر ہے بعید از قیاس نہیں ہے کہ کہیں فلمی انداز میں اسامہ بن لاڈن کا ڈبل رول نہ ہو ۔۔ اور اصلی اسامہ بن لاڈن کی اینٹری ابھی رہتی ہو ۔۔اور یہ بھی کہ گھر والوں (پاکستان ) کی “چپ “ کسی گہری سازش کا اشارہ نہ بن جائے جس میں چھوٹے چور اپنی سلامتی کے لئے ڈاکوؤں سے آن ملتے ہیں ۔۔

‎بحر حال معاملہ کچھ بھی ہو لیکن بڑے بھائی اوباما نے اس تمام کاروائی میں اپنے چھوٹے بھائی زرداری کو کانوں کان ہوا نہیں لگنے دی ۔ اوباما کی خفگیوں کا کچھ کچھ علم زرداری کو پہلے ہی ہو چکا تھا اسی لئے انہوں نے مایوسی اور بیکاری سے بچنے کے واسطے پی پی پی کے ارکان کے ساتھ مل کر کچھ نیا گٹھ جوڑ کرنے کا سوچا تاکہ ارکان پی پی پی کا دل بہلا رہے ۔ اس بار پی پی پی دور کی کوڑی لائی ہے ، وقت گزاری کے لئے ق لیگ سے دوستی کا سوچ بیٹھی ہے ۔ حالانکہ یار لوگوں نے بہت سمجھایا کہ یہ ملن ان کے لئے ٹھیک نہیں ہے کیونکہ آپ اور آپ کی جماعت کئی بار انہیں “ قاتل لیگ“ سے پکار چکی ہے لیکن جی وہ زرداری ہی کیا جو اپنی بات نہ منوائے ۔ سو تا دم تحریر پی پی پی ، ق لیگ کے ساتھ ، سات پھیرے لے چکی ہو گی ۔ دوستی کی انوکھی مثال قائم کرتے ہوئے ا ب یہ کسے یاد رہتا ہے کہ ملک میں کیا ہو رہا ہے ۔۔ سو پی پی پی کو بھی کیا خبر کے پاکستان میں یہ یہ ہو رہا ہے ۔
‎ٹارگٹ کلنگ
‎بھوک ننگ
‎اغوا برائے تاوان ڈاکہ ، چوری
‎فرقہ پرستی
‎قبائلی مسائل
‎ڈرون حملے
‎پٹرولیم اور بجلی کے مسائل
‎تعلیمی معیار اور نوکریوں کی عدم دستیابی
‎کارخانے اور معشیت کی تباہ کاریاں
‎کسان اور ان کی زمینوں کی خرد برد
‎ان حالات میں اب سوچنے کی بات یہ ہے کہ پہلے تو پاکستان کے حکمرانوں کے پاس بہانہ ہوتا تھا کہ یہ سب کچھ القائدہ اور اس کے سربراہ اسامہ بن لاڈن کا کیا دھرا ہے ۔۔ اب ان بہانوں کا کیا ہو گا ۔۔ پاکستانی حکمران کس کو مورد الزام ٹہرائیں گے اور کس منہ سے امریکہ سے بھیک مانگیں گے ۔۔ لو جی اس چکر میں زرداری ، گیلانی اور رحمانی سب جاب سے بھی گئے ۔۔ خیال یہ ہے امریکہ بھی پاکستان کو خرچہ پانی دیتے دیتے تھک سا گیا تھا ۔ آخر اپنے بچوں کے منہ سے چھین چھین کر کب تک پاکستانی حکمرانوں کا پیٹ بھرتا ۔۔ لیکن یہاں یہ مت بھولئے کہ امریکہ دو مونہہ والا سانپ ہے ، یونہی جان نہیں چھوڑے گا ۔۔ جتنا مال پانی اس نے جہاں جہاں لگایا ہے اسے وصولنے کے لئے کہیں اور نیا باب کھولے گا ۔۔ دیکھنا یہ ہے کہ اب اگلی عالمی ٹارگٹ کلنگ کب شروع ہوتی ہے ۔

‎ خیر یہ تو بعد کی باتیں ہیں ۔۔ اس وقت کی بات تو یہ ہے کہ آج یعنی دو مئی دوہزار گیارہ کے دن اسامہ بن لاڈن ایبٹ آباد میں امریکی فوجی کاروائی میں مر چکا ہے ۔۔ اسے پورے تالاب کو گندہ کرنے والا مگر مچھ جان کر پانچ گھنٹوں کے اندر اندر سمندر برد بھی کیا جا چکا ہے ۔۔ اس کے ڈی این اے کی پڑتال بھی بھیج دی گئی ہے ۔ اس کے بیوی بچی کے بیان بھی سامنے آ گئے ۔ لوگوں میں یہ خوشخبری اور خوش فہمی بھی بانٹ دی گئی کہ طالبان کمزور ہو گئے ہیں ۔۔ دہشت گردوں کی کمر ٹوٹ گئی ۔۔عالمی براداری کے چور ڈاکوؤں نے ایک دوسرے کو مبارک سلامت بھی کہہ دیا لیکن یہ بات امریکہ کو کون سمجھائے گا کہ اس نے اسامہ بن لاڈن کی موت کا ڈرامہ ، ڈرامائی انداز میں رچا کر اسے موت نہیں دی بلکہ اسے ہیرو بنا دیا ہے ۔ وہ وقت دور نہیں جب اس کے نام کے شہید جیسا لفظ بھی لکھا جائے گا ۔

‎اسامہ بن لاڈن عالمی سیاست کا ایک ایسا ہیرو تھا جس کی دہشت کی حکومت دس برس تک رہی ۔ اس کی وجہ سے امریکہ نے وہ سب کر ڈالا جو کسی مہذب ملک کو زیب نہیں دیتا . وقت گزرنے کے ساتھ ساتھ امریکہ نے کئی کمزور مسلمان ملکوں کے ساتھ اپنی دہشت کا مکروہ کھیل کھیلا ۔ اپنی اسی طاقت کے نشے میں نائن الیون کو بہانہ بنا کر عراق کو نیست و نابود کر دیا ۔۔ سارے مسلمانوں کو مختلف بہانے بنا کر ان کو جڑوں سے اکھاڑ کر پھینک دیا ۔ امریکہ نے اسی اسامہ بن لاڈن کی تلاش میں افغانستان سے جنگ کاجواز پیدا کیا اور جب ان سے اپنی جنگ ہارنے لگا تو امداد کی مد میں مال دیکر پہلے تو پاکستان کے لالچی حکمرانوں کا مہنہ بندکیا پھر اپنی جان چھڑا نے کے لئے کمال ہوشیاری سے پاکستان کو دہشت گردی کی جنگ میں گھسیٹ لیا ۔۔ پھر اسی اسامہ بن لاڈن کی تلاش میں 30,000 بے گناہ پاکستانی موت کے گھاٹ اتار دئے گئے اور 5000 فوجی اہلکار امریکہ نوازی کی بھینٹ چڑھ گئے ۔۔

‎ آج جب اسامہ بن لاڈن کی موت کا تمغہ لینے کی باری آئی تو امریکہ نے کسی پاکستانی فوجی ، سی آئی اے یا اینٹلیجنس کو منہ نہیں لگایا اور رات کے اندھیرے میں چور ڈاکوؤں کی طرح آئے اور اسے مار کر اپنے ساتھ ہی لے کر چلے گئے اور ہمیشہ کی طرح پاکستان ان کا منہہ دیکھتا رہ گیا ۔ جبکہ اصولی طور پر اسامہ بن لاڈن اگر پاکستان میں تھا تو اسے مارنے کا حق صرف پاکستان کو تھا ۔۔ اور اگر امریکہ نے مار ہی دیا تھا تو اس کی لاش پر قبضہ اور اس کی آخری رسومات کا اختیار صرف پاکستان کو تھا ۔۔

‎کیا اب بھی پاکستانی حکمرانوں اور فوجیوں کو لگتا ہے امریکہ پاکستان کا وفادار ہے ۔۔ ؟
عالمی اخبار - اسا مہ بن لاڈن کی موت یا موت کا ڈرامہ ۔از؛ ڈاکٹر نگہت نسیم ۔سڈنی

__________________

میرا بلاگ۔ صدائےقلندرhttp://saifikhan011.blogspot.com/