کہتے ہیں کہ اصول زندگی کو آسان بنانے کا فلسفہ ہیں۔ جن کے کوئی اصول نہیں ہوتے یا جو کسی اصول کی پاسداری نہیں کرتے ، اُن کی حالت چوپایوں کی جیسی ہوتی ہے بلکہ شاید چوپایوں کے بھی چند اصول ضرور ہوتے ہوں گے جس پر وہ عمل پیرا ہوتے ہوں گے۔

اصولوں کا ہونا اور ان پر عمل پیرا ہونا نہ صرف ذاتی زندگی کے لیے بہتر ہے بلکہ معاشرے کی بقا اور ترقی بھی انہی اصولوں کی پاسداری کے ساتھ منسلک ہے۔

احمد بخش بھی ایک اصول پسند شخص ہے۔ اسکا ہمارا چالان کرنا اصول پسندی اور ایمانداری کی مثال ہے۔ میں اس بات کی تعریف کرنے میں کوئی عار محسوس نہیں کرتا۔
لیکن اس کے ساتھ ہی ایک سوال پیدا ہوتا ہے۔

کہ کیا اصول بے لچک ہوتے ہیں؟ کیا ان اصولوں کا انسانی مشکلات سے کوئی لینا دینا نہیں ہے؟
احمد بخش نے ہمارا چالان کیا ۔ ویری گُڈ۔
لیکن کیا اُس نے سہولیات سے عاری ملک پاکستان میں ہمارا چالان کرتے وقت سوچا کہ انہوں نے سیکڑوں کلومیٹر دور جانا ہے ، وہاں سے یہ لوگ کیسے چالان جمع کروائیں گے؟ اگر یہ چالان کسی مغربی ملک میں ہوتا کہ جہاں شہریوں کے لیے سرکاری سہولیات عروج پر پہنچی ہوئی ہیں تو بات سمجھ میں بھی آتی تھی۔

میں نے یہی مسئلہ اُس کے سامنے رکھا تو کہنے لگا میرا اس سے کوئی لینا دینا نہیں ہے۔

اس پر مجھے لاہور کا ٹریفک وارڈن یاد آ گیا۔ہم سے ون وے کی طرف موڑنے کی غلطی ہو گئی۔ فوراً ٹریفک والوں نے روک لیا۔
اور وہی ہوا کہ جب میں نے انکو کہا کہ سر غلطی ہو گئی ۔ ہم رحیم یار خان سے ائے ہیں، ہمیں علم نہیں ہوا تو انہوں نے 5 منٹ لیکچر دے کر جانے دیا۔
کیا اُس ٹریفک وارڈن نے قانون شکنی کی؟ یا اُس شخص میں ابھی انسانیت باقی تھی؟

میں سمجھتا ہوں کہ اصول پسندی اپنی جگہ ، لیکن انسانیت بھی کسی چیز کا نام ہے۔ اصول انسانوں کی سہولیات کے لیے بنائے جاتے ہیں ، نہ کہ انکی مشکلات اور مصیبتوں کو بڑھانے کے لیے۔ اور اس قدر سخت اصول پسندی وہیں درست ہوتی ہے ، جہاں اس قسم کی غلطیوں کا ہونا نا ممکن ہو۔ خود اُن لوگوں نے ٹریفک کی وائیلیشن کی ہوئی تھی کہ آدھی سڑک پر ٹہل قدمی کر رہے تھے۔

یہی وجہ تھی کہ جب اُس نے کہا کہ یار تمہارا علاقہ رحیم یار خان بہت زرخیز علاقہ ہے تو میں نے تپ کر جواب دیا تھا کہ سر نہ صرف وہ علاقہ زرخیز ہے بلکہ وہاں کے لوگ بھی زرخیز ہیں۔ انشا اللہ کبھی آپ وہاں ایسی غلطی کریں گے تو آپ دیکھیں گے کہ وہ لوگ آپ کو تنگ نہیں کریں گے۔ لیکن شور کوٹ کے لوگ بالکل شوریدہ دماغ اور شور(سیم و تھور) کی طرح ہیں کہ ایک معمولی غلطی کی اتنی بڑی سزا دے ڈالی۔