علامہ اقبال رح شاید ایک یا دو بار ہی افغانستان گئے تھے لیکن وہاں جا کر ان کی دور اندیش نظر نے یہ سمجھ لیا تھا کہ ایشیا میں امن اور خوشحال تب ہی ممکن ہے جب افغانستان میں امن اور خوشحالی ہو گی۔ اور اس کے مخدوش حالات پورے خطے پر اثر انداز ہوں گے۔۔ لیکن ہمارے ارباب اختیار اور دنیا کے سپر پاور افغانستان کو لتاڑ چکے ہیں پھر بھی ان پر یہ راز آشکار نہیں ہوا

علامہ مرحوم فرماتے ہیں کہ
’’آسیا یک پیکر آب و گل است
ملت افغان در آن پیکر دل است
براعظم ایشیا ایک پیکر آب و گل ہے (جبکہ) ملت افغان (افغانستان) اس جسم میں دل کی حیثیت رکھتا ہے۔

از فساد او فساد آسیا
از گشاد او گشاد آسیا
اس (دل) کا فساد ایشیا کے فساد کا باعث ہے اور اس کی کشادگی اور خوشحالی ایشیا کی کشادگی اور خوشحالی ہے

تا دل آزاد است‘ آزاد است تن
ورنہ کاہی در رہ باد است تن‘‘
(کیونکہ) جب تک دل آزاد رہتا ہے جسم آزاد رہتا ہے( بصورت دیگر) جسم (یوں ہو جاتا ہے جیسے) ہوا کے راستے میں ایک تنکا۔

ان چند اشعار میں علامہ محمد اقبال نے خطے کے ممالک کو ایک راہ دکھا دی تھی کہ اگر خوشحالی چاہتے ہو تا پھر افغانستان کی بہتری اور امن کے لئے کوشش کریں۔ اور پاکستان اور دیگر ممالک کے لئے خارجہ پالیسی کا بنیادی اصول بھی وضع کر دیا کہ افغانستان کے ساتھ تعلقات دوستانہ رکھیں، وہاں کی بہتری کے لئے کوشاں رہیں۔۔

علامہ محترم کی مبنی بر بصیرت بات کی سچائی ہم آج بڑے واضح انداز سے دیکھ سکتے ہیں کہ افغانستان میں امن اور خوشحالی نہ ہونے کے اثرات کس طرح نہ صرف پاکستان بلکہ دیگر ممالک پر بھی پڑ رہے ہیں۔

ویسے کبھی کبھی لگتا ہے کہ امریکہ والے شاید علامہ مرحوم کے ان اشعار کے مقصد کو اچھی طرح سمجھ گئے اور پورے خطے میں انارکی پھیلا کر اپنے مذموم مقاصد حاصل کرنے کے لئے انہوں نے افغانستان کا رخ کیا۔ کیوں کہ وہ یہ سمجھتے ہیں کہ ایک ایک ملک کے ساتھ علیحدہ علیحدہ برسر پیکار رہنا عسکری، اقتصادی اور سفارتی ہر حوالے سے مشکل ہے۔ اس لئے ایشیا کے دل یعنی ’افغانستان‘ میں فساد برپا کر دو پورا خطہ فساد زدہ ہو جائے گا۔

پتہ نہیں کب ہم عقل کے ناخن لیں گے اور اپنے فیصلے اپنے مفکرین کے بتائے گئے خطوط کی روشنی میں کریں گے۔ افغانستان پر مسلط غیر ملکی افواج کا ساتھ دینے کے بجائے ان کے انخلاء کے لئے کوششیں کریں گے تا کہ پاکستان اور پورا خطہ پر امن ہو سکے۔

__________________
محتاج اصلاح و دعا