امریکی عسکری قیادت کے افغانستان کے حوالے سے متنازعہ بیانات کا سلسلہ جاری ہے اور اب یہ بات سامنے آئی ہے کہ وزیردفاع رابرٹ گیٹس قبل از وقت ریٹائر ہونے کا ارادہ رکھتے ہیں۔ گزشتہ دنوں انہوں نے کہا تھا کہ امریکی فوج جولائی 2011ءمیں ضرور انخلاءکرے گی، جبکہ افغانستان میں موجود امریکی کمانڈر انچیف جنرل ڈیوڈ پیٹریس نے اس انخلا کو حتمی قرار نہیں دیا۔ 2011ءافغانستان اور امریکہ دونوں کے لیے انتہائی اہم ہے اور یہ سوال شدت کے ساتھ ہر طرف سے اٹھایا جارہا ہے کہ کیا امریکہ افغانستان سے انخلاءچاہتا ہے؟

اس میں شک نہیں کہ امریکہ اور خصوصاً وہاں موجود جنگجو تھنک ٹینک کی خواہش ہے کہ افغانستان میں قیام کرکے پورے خطے کو اپنی استعماری بالادستی کا شکار بنایا جائے، مگر افغانستان میں وہ تیزی کے ساتھ شکست کی طرف گامزن ہورہا ہے اور اس کا ہر قدم اس کو شکست سے قریب تر کرتا جارہا ہے۔ اب اس میں خواہش اور حقیقت کا مقابلہ ہے اور اسی بنیاد پر امریکی حکام اس جنگ کو ختم کرنے یا اسے جاری رکھنے کے حوالے سے سخت پریشان ہیں، خصوصاً اب امریکی اتحادی اس جنگ میں امریکہ کا ساتھ دینے کو تیار نہیں، ہالینڈ کے انخلاءکے بعد اب کینیڈا کی فوجیں انخلاءچاہتی ہیں، جب کہ یورپ کے کئی ممالک اس لاحاصل جنگ سے تنگ آچکے ہیں اور اب افغان جنگ کے حوالے سے ان ملکوں میں عوامی دباﺅ بڑھتا جارہا ہے۔ امریکہ اب سازشوں اور لالچ کے سہارے اس جنگ کو طول دینا چاہتا ہے اور کچھ عرصے کے لیے اپنے اتحادیوں کو مزید افغانستان میں روکے رکھنے کی پالیسی پر گامزن نظر آرہا ہے۔ وکی لیکس کی رپورٹوں نے اس کی ناکامی کو اور بھی واضح کیا، جب کہ داخلی سطح پر اس کی اپنی بنائی ہوئی کٹھ پتلی انتظامیہ کی وفاداری پر بھی اب امریکہ کو شک ہے۔ دوسری جانب طالبان کی اسلامی تحریک کا بڑھتا ہوا عسکری دباﺅ ایسا عنصر ہے جس کا امریکہ اور اس کے اتحادیوں کے پاس کوئی علاج نہیں۔ سب سے بڑھ کر اب امریکی حکام اور مغربی پریس بھی اس بات کا اعتراف کررہے ہیں کہ طالبان کی قوت میں اضافہ دیکھنے کو ملا ہے، وہ اب ملک کے شمال میں بھی بڑی آسانی کے ساتھ کارروائی کرتے نظر آرہے ہیں۔ خصوصاً ان صوبوں میں جن کو کسی زمانے میں شمالی اتحاد کا گڑھ سمجھا جاتا تھا اب وہاں طالبان نے کارروائیان شروع کردی ہیں۔ ایسی بھی اطلاعات موجود ہیں کہ دارالحکومت کابل میں بھی بہت بڑی تعداد میں طالبان سپاہ موجود ہیں جو مختلف شکلوں اور حلیوں میں رہ کر وہاں حالات پر نگاہیں رکھے ہوئے ہیں، اور انہوں نے وہاں اپنی موجودگی کو ثابت بھی کیا ہے، کیونکہ پچھلے مہینوں میں ایسی کارروائیاں ہوئیں جنہوں نے پوری دنیا کو ورطہ¿ حیرت میں ڈال دیا۔

گزشتہ دنوں ان نوجوانوں کی ویڈیو پہلی بار سامنے آئی جنہوں نے کچھ عرصہ قبل دارالحکومت کابل کے عین قلب میں واقع صدارتی محل کی قریبی عمارتوں اور کئی وزارتوں میں دن دہاڑے کارروائی کرکے ہلچل مچا دی تھی۔ اس ویڈیو کو دیکھنے کے بعد یہ تاثر مزید اجاگر ہوا ہے کہ امریکی حفاظتی نظام اور کٹھ پتلی انتظامیہ کی طاقت طالبان کا مقابلہ نہیں کرسکتی۔ خود مغربی میڈیا بھی اس بات کا اعتراف کررہا ہے کہ امریکی اور ناٹو فورسز کو اس سے زیادہ نقصان ہوا ہے جتنے کا اعتراف کیا جاتا ہے۔ تقریباً 32000 فوجی اس جنگ میں شدید زخمی ہوئے ہیں جب کہ 4400 سے زائد ہلاک ہوئے۔ یہ امریکی خبر رساں ایجنسی اے پی کی رپورٹ ہے، جب کہ کچھ آزاد ذرائع اس سے بھی زائد اموات کی بات کرتے ہیں۔ امریکی حکام اور ان کے دیگر قابض اتحادیوں نے اس عرصے میں صرف اور صرف سویلین ہلاکتوں میں دلچسپی لی ہے اور ہر آنے والا دن سویلین ہلاکتوں اور نقصان کے حوالے سے سابقہ ایام سے زیادہ ہلاکت خیز ہوتا ہے۔ امریکی حکام ان ہلاکتوںکی ذمہ داری طالبان پر ڈالتے ہیں، لیکن خود ان کا انتظامی سربراہ سویلین ہلاکتوں کو امریکی فوجیوں کی کارستانی قرار دیتا ہے۔ دسیوں بار حامد کرزئی کی زبان سے بھی یہ الفاظ نکلے ہیں کہ سویلین ہلاکتیں برداشت نہیں، اور ہم اس پر امریکہ سے احتجاج کریں گے۔ گزشتہ دنوں اقوام متحدہ کے ادارے یوناما نے بھی اسی طرح کی رپورٹ شائع کی، لیکن حقیقت یہ ہے کہ افغان عوام کو اب دھوکا نہیں دیا جاسکتا ہے اور وہ جانتے ہیں کہ امریکہ کی آمد کے بعد سے ہلاکتوں کے تناسب میں اضافہ ہوا ہے۔

ان حالات کو دیکھتے ہوئے طالبان نے پہلی بار ایک ایسے کمیشن کے قیام کی بات کی ہے جو سویلین ہلاکتوں کی غیر جانب دارانہ تحقیقات کراسکے۔ طالبان کے ترجمان قاری محمد یوسف احمدی نے اقوام متحدہ سے اپیل کرتے ہوئے کہا ہے کہ وہ ان ہلاکتوں کی تحقیقات کا فریضہ سرانجام دے اور اس کمیشن میں اسلامی کانفرنس تنظیم کے نمائندے، اقوام متحدہ کے اہلکار، ناٹو فورسز اور طالبان کے نمائندے شامل ہوں۔

طالبان نے اس حوالے سے انتہائی اہم قدم اٹھایا کیونکہ وہ اس بات کو جانتے ہیں کہ سویلین ہلاکتوں میں ان کا ہاتھ نہیں۔ عام شہریوں کی تمام ہلاکتیں بمباری اور اندھا دھند فائرنگ سے ہوئی ہیں اور یہ کام امریکہ ہی کرسکتا ہے کیونکہ طیارے اور جدید ٹیکنالوجی اُسی کے پاس ہے۔ افغانستان کے اطراف و اکناف میں ایسے بہت سارے چھوٹے چھوٹے گاﺅں ہیں جو امریکہ کی بمباری کی وجہ سے صفحہ¿ ہستی سے مٹ چکے ہیں، اسی وجہ سے امریکہ عام لوگوں کی نفرت کا ہدف بنا ہوا ہے۔ امریکی تشدد کے اس کارڈ کو طالبان نے اپنے حق میں استعمال کیا ہے، ورنہ یہ بات سوچنے کی ہے کہ دنیا کے چالیس سے زائد ممالک کے فوجی جو اعلیٰ ٹیکنالوجی سے لیس ہیں، جن کے پاس ہر قسم کے ہتھیار ہیں، کیوں مٹھی بھر مزاحمت کاروں کے سامنے ناکام ہوچکے ہیں؟

ملا محمد عمر کی قیادت میں جاری اس جنگ نے اب اہم موڑ لیا ہے اور مغربی قوتوں کے اپنے تضادات اور عدم اعتماد نے ان کے راستے کو مزید آسان بنادیا ہے۔

امریکی انخلاءکے حوالے سے بعض لوگوں کو اس بات کی تشویش ہورہی ہے کہ اس کے بعد پھر خون خرابہ ہوگا اور یہ لوگ آپس میں لڑیں گے۔ شاید ایسے لوگ افغانستان کے موجودہ حالات سے واقف نہیں اور خصوصاً طالبان کی صفوں میں جو انقلابی تبدیلیاں آئی ہیں اور جس وسعت قلبی کا مظاہرہ ان کی جانب سے دیگر افغانوں کے لیے دیکھنے کو مل رہا ہے اس کی مثال سابقہ ادوار میں نہیں ملتی۔

امریکہ کے اہم اتحادی اور اس کے اہم عسکری رہنما اب آہستہ آہستہ اس جنگ سے علیحدہ ہورہے ہیں۔ میک کرسٹل اور ڈیوڈ رچرڈ کے بعد اب رابرٹ گیٹس کی سمجھ میں بھی یہ بات آچکی ہے کہ یہ جنگ نہیں جیتی جاسکتی۔ جب کہ امریکہ کے قابض اتحادی اب ہالینڈ کے نقش قدم پر چلتے ہوئے اس جنگ سے کنارہ کشی اختیار کرنے کا ارادہ رکھتے ہیں۔ اب یہ سوال اٹھ رہا ہے کہ کب تک یورپ اور امریکہ کے فوجی افغانستان کے گلی کوچوں میں مرتے رہیں گے؟ کیونکہ یہ جنگ جیتی نہیں جا سکتی، اور نہ ہی افغان شکست کھا سکتا ہے۔