انڈیا کی تاریخ میں پہلی مرتبہ عالمی بینک نے ریاست مہاراشٹر کے چند ترقیاتی منصوبوں کے لیے قرض کی فراہمی کو ڈالر کے بجائے روپوں میں دینا منظور کر لیا۔ گزشتہ کچھ عرصہ سے عالمی بازار میں مستقل طور پر ڈالر کی گرتی ہوئی ساکھ کو اس کی وجہ بتایا جا رہا ہے۔
انڈیا کی ریاست مہاراشٹر کے چیف سیکرٹری جانی جوزف اور خصوصی ترقیاتی منصوبوں کے سکریٹری سنجے اُبالے کی عالمی بینک کی انڈیا کی سربراہ ایزابیل گیریرو کے ساتھ ممبئی میں ایک ملاقات ہوئی جس میں مذکورہ فیصلہ کیا گیا۔گیریرو نے یہ قرض لندن انٹربینک آفرڈ ریٹ ( Libor ) کی شرح پر دیا ہے۔

گیریرو کا ماننا ہے کہ عالمی بینک نے یہ اقدام انڈیا جیسے ترقی پذیر ممالک کے لیے اٹھایا ہے جنہیں غیر ملکی زرمبادلہ ادا کرنے میں مشکلات کا سامنا رہتا ہے۔

ابالے نے بی بی سی سے بات کرتے ہوئے کہا کہ عالمی قرض کو روپے میں ادا کرنے کی انہوں نے پیشکش کی تھی اور انہیں اس وقت خوشگوار حیرت ہوئی جب بینک نے اسے منظوری دے دی۔

ابالے کے مطابق اب تک ہمیں ڈالر کی شکل میں قرض ملتا تھا لیکن اب ہمیں روپیہ میں اسے ادا کرنا ہو گا اور چونکہ یہ قرض ترقیاتی منصوبوں کے لیے ہے اس لیے اس کی شرح سود صفر اعشاریہ پچھتر ہو گی۔

ابالے کے مطابق 5.8 بلین ڈالر کے اس قرض کو پینتیس برسوں میں ادا کرنا ہو گا۔اس پروجیکٹ میں اضافی ٹرینوں کی خریداری، ممبئی کے مضافاتی علاقوں میں ریلوے پٹریوں کا جال بچھانا، آبپاشی منصوبہ، دیہاتوں میں پانی کی فراہمی، ممبئی سے قلابہ تک میٹر ریلوے لائن اور کئی ہاؤسنگ پروجیکٹس شامل ہیں۔

عالمی بینک کے ساتھ ہونے والی میٹنگ کے بعد ابھی مرکزی وزارت خزانہ سے اسے منظوری ملنا باقی ہے۔ عالمی بینک کا ہر پروجیکٹ مرکزی حکومت کی منظوری کے بعد ہی عمل میں آتا ہے۔

عالمی سطح پر ڈالر کمزور ہو رہا ہے اور روپیہ اس کے مقابلے میں کافی حد تک مضبوط ہوا ہے۔ تجارتی تجزیہ نگار مانتے ہیں کہ چونکہ ڈالر کی پوزیشن مستحکم نہیں ہے اور وہ دن بدن گرتا جا رہا ہے اس لیے عالمی بینک نے سمجھداری سے کام لیتے ہوئے روپیہ میں قرض دینا منظور کیا۔

تجارتی تجزیہ نگار پیتامبر آہوجہ کہتے ہیں کہ اس وقت روپیہ کی قیمت ڈالر کے مقابلے میں 39.40 ہے یعنی اس کی پوزیشن بہت مضبوط ہے۔ آہوجہ کا ماننا ہے کہ ابھی روپیہ اور مضبوط ہو گا۔پندرہ جنوری تک ڈالر اور کمزور ہو گا۔

آہوجہ کہتے ہیں کہ ڈالر کے کمزور ہونے کی وجہ سے ملک میں غیر ملکی سرمایہ کار بڑی تعداد میں اپنا سرمایہ لگا رہے ہیں۔ ’ویسے یہ ایک خوش آئند بات ہے اس سے ہماری اقتصادی حالت مزید بہتر ہو گی اور شرح نمو میں بھی اضافہ ہوگا۔‘

’عالمی بینک کے اس اقدام نے یہ ثابت کر دیا ہے کہ روپیہ مزید مضبوط ہو گا اسی لیے انہوں نے ڈالر کے بجائے روپے میں قرض دینا منظور کیا البتہ انہوں نے اس کی جو وجہ بتائی ہے وہ میری نظر میں صحیح نہیں ہے۔‘

بشکریہ بی بی سی

بھائی لوگوں پاکستان کے لیے کیا ایسے قرضے ہو سکتے ہیں جبکہ پاکستانی روپیہ اور ڈالر کے درمیان فرق 64 روپیہ کا ہے ؟

رائے کا انتظار رہے گا۔۔۔