اللہ اکبر و الحمدللہ! کیسے شکر ادا کروں اس عظیم اور بے مثال محسن کا، جس کے احسانات کی حد ہے نہ انتہا۔ پچاس برس ہوگئے اس کی نعمتوں کی بارش میں نہارہا ہوں۔ حیرت اس بات پر کہ اِدھر دغا اُدھر عطا، اِدھر جرم اُدھر کرم، اِدھر معصیت اُدھر مغفرت، اِدھر بغاوت اُدھر رحمت ہی رحمت، عنایت ہی عنایت۔ زبان گنگ ہے اور الفاظ درماندہ شکر ادا کروں تو کیسے کروں؟ رحمن و رحیم نے محض اپنے فضل و کرم سے ایک بار پھر اپنے کمزور، لاچار، سراپا خطا اور تہی دست بندے کو اپنے خاص دربار اور تجلیات کے مرکز میں بلالیا ہے۔ اب اس کا سر ہے اور مولیٰ کا در، بھکاری کے ہاتھ ہیں اور سخی داتا کا جود و کرم۔ آج جب یہ بھکاری لطف و احسان کے انتظار میں ملتزم پر نظریں جمائے بیٹھا تھا۔ اچانک اسے وہ گیارہ مخلص داعی یاد آگئے جنہیں اکتوبر کی آخری تاریخوں میں سندھ کے علاقے تھر میں ظلم و ستم کا نشانہ بنایا گیا۔




یہ وہ علاقے ہےں جہاں شاید ملک کے باقی علاقوں کے مقابلے میں جہالت بہت زیادہ ہے۔ ایسے مسلمان بے شمار ہیں جنہیں نماز تو کیا کلمہ تک یاد نہیں۔ مسجدیں مرثیہ خواں ہیں کہ نمازی نہ رہے۔ شادی بیاہ سے لے کر موت اور غمی تک میں ہندوانہ رسمیں عام ہوچکی ہیں۔ وڈیروں، جاگیرداروں اور موروثی صاحبزادوں اور پیروں کا تسلّط ہے۔ عوام کالانعام ہیں۔ دینی اور دنیاوی دونوں تعلیم سے محروم، نہ ڈھنگ کے اسکول انہیں میسر ہیں نہ معیاری مدارس۔ ''الناس علی دین ملوکہم'' کے مصداق وہی کرتے ہیں جو ان کے سردار چاہتے ہیں، ان کے ذہنوں میں یہ بات بٹھادی گئی ہے کہ جنت میں جانے کے لیے ایمان وعمل کی نہیں، وڈیرے اور پیر کی رضا ضروری ہے۔ چنانچہ وہ خود بھوکے رہتے ہیں مگر ''سائیں'' کا نذرانہ قضا نہیں کرتے۔




نتیجہ یہ ہے کہ مرید کے گھر دیا نہیں جلتا، مگر پیر کا گھر بجلی کے قمقموں سے سے جگمگ جگمگ کرتا ہے۔ مرید کے بیمار بچے ایڑیاں رگڑ رگڑ کر مرجاتے ہیں، مگر انہیں کسی کوالیفائیڈڈ ملکی ڈاکٹر کا علاج میسر نہیں آتا جبکہ وڈیرے کا علاج لندن اور امریکا کے مہنگے ہسپتالوں میں ہوتا ہے۔ ہاری کی اولاد نانِ جویں سے بھی محروم رہتی ہے، جبکہ جاگیر داروں کے کتوں کو صبح وشام گوشت اور مکھن کھلایا جاتا ہے۔ تھر کے جس علاقے میں ظلم وستم کی شرمناک واردات ہوئی، وہاں کا بے تاج بادشاہ ایک ایسے صاحب کو تسلیم کیا جاتا ہے جو سیاست اور اقتدار کے منجھے ہوئے کھلاڑی ہیں۔ کم ازکم سندھ کی حد تک ان کی معاونت کے بغیر حکومت سازی محال ہے۔ سال بھر میں صرف ایک بار مریدوں کو اپنا دیدار کرواتے ہیں اور وہ بھی اتنی دور سے کہ محنت کشوں کے جسم اور منہ سے نکلنے والے جراثیم ان تک نہ پہنچ سکیں۔




رائیونڈ سے تشکیل ہونے کے بعد یہ گیارہ مخلص داعی جب تھر کے اس علاقے میں پہنچے جو ''پیر صاحب'' کے زیر اثر ہے تو انہیں مسجد میں داخل نہ ہونے دیا گیا۔ لڑنا بھڑنا انہیں آتا نہیں تھا۔ انہوں نے خاموشی سے بستر اُٹھائے اور درختوں کے نیچے جاکر بیٹھ گئے اور تعلیم وتعلم کا سلسلہ شروع کردیا۔ وڈیروں کو ان کا یہاں بیٹھنا بھی ناگوار گزرا۔ انہوں نے اپنے پالتو غنڈوں کو بلوالیا جنہوں نے ان سے بستر، ٹوپیاں، عمامے اور جوتے چھین لیے اور انہیں ایک قطار میں کھڑا کرکے ان کی ڈاڑھیاں مونڈ دیں۔




ہم شاید اس حزن والم کا تصور بھی نہ کرسکیں جو اس وقت ان کے سینے میں برپا ہوگا جب انہیں سنت رسول سے محروم کیا جارہا تھا۔ انہوں نے ہاتھ بھی جوڑے۔ منت سماجت بھی کی۔ آہ وزاری سے سنگ دلوں کو موم کرنے کی کوشش بھی کی، مگر وہ ٹس سے مس نہ ہوئے۔ انہوں نے انہیں سنت سے محروم کرکے ہی چھوڑا۔ ڈاڑھیاں مونڈنے کے بعد ڈنڈوں، کلہاڑیوں اور ٹوکوں سے ان پر حملہ کردیا گیا۔ ان میں جوان بھی تھے اور بوڑھے بھی۔ امیر بھی تھے اور غریب بھی، مگر ظالموں کو کسی پر بھی ترس نہ آیا۔ خاردار زمین میں کئی کلومیٹر تک انہیں ننگے پاؤں بھاگنے پر مجبور کیا گیا۔ جب ان میں سے کسی کے چلنے کی رفتار سست ہوجاتی تو اسے ڈنڈوں اور کلہاڑیوں سے مارا پیٹا جاتا حتیٰ کہ وہ گرتے پڑتے ان کے علاقے سے باہر نکل گئے۔




یک بستی والوں نے گیارہ لہولہان انسانوں کو دیکھا تو انہیں ترس آگیا۔ چنانچہ انہوں نے ہسپتال تک پہنچانے کا انتظام کیا۔ شاید یہ ترس اسی طرح کا تھا جیسے طائف والوں کے ہاتھوں زخمی ہونے والے داعیئ اعظم حضرت محمد رسول اللہ صلی اللہ علیہ وسلم پر آیا تھا۔ آپ کا جرم بھی دعوت اور خیرخواہی کے سوا کچھ نہ تھا، جبکہ کندھوں پر بستر اُٹھاکر اور اپنے اخراجات خود برداشت کرکے تھر کے صحرا اور گوٹھوں میں گشت کرنے والوں کا جرم بھی یہی تھا۔ آقا صلی اللہ علیہ وسلم نے بھی سنگباری کرنے والوں کے لیے ہدایت کی دُعا کی تھی اور ان گیارہ دوستوں نے بھی دُعا ہی دی۔ نہ گالی کے جواب میں گالی، نہ مکا نہ تھپڑ، نہ ڈنڈا نہ گولی۔ انہوں نے تو تھانے میں مقدمہ تک درج نہیں کروایا۔ دل ہی دل میں یہ کہتے ہوئے معاملہ اللہ پر چھوڑدیا: ''اے اللہ! ہم اپنی قوت کے ضعف، اپنی تدبیر کی قلت اور لوگوں کی نظر میں اپنی عاجزی اور کمزوری کا شکوہ تجھی سے کرتے ہیں۔ اے ارحم الراحمین! تو نے ہمیں کس قسم کے انسانوں کے رحم وکرم پر چھوڑدیا ہے۔ کیا ان دشمنوں کے حوالے کیا، جن کے ماتھے پر ہمیں دیکھتے ہی بل پڑجاتے ہیں یا ان دشمنوں کے حوالے جنہیں تو نے ہمارے معاملات کا مالک بنادیا ہے۔ اگر تو ہم سے ناراض نہیں ہے تو ہمیں کوئی پرواہ نہیں، البتہ تیری عافیت ہمارے لیے کافی اور وسیع ہے۔''




ان اللہ والوں نے تو اپنی تربیت، عادت اور دستور کے مطابق معاملہ اللہ پر چھوڑ دیا مگر کہاں گئے وہ حقوقِ انسانی کے علمبردار جو انسان تو انسان، حیوانوں پر بھی ظلم اور زیادتی برداشت نہیں کرسکتے؟ کہاں گئے ہمارے وہ سراپا درد لیڈران کرام جنہوں نے تشدد کے خاتمے کو اپنی زندگی کا مقصد ٹھہرا رکھا ہے۔ وہ کسی دور دراز علاقے میں رونما ہونے والے تشدد کے ہر چھوٹے بڑے واقعے پر آسمان سر پر اُٹھالیتے ہیں؟ کیا سب کو سانپ سونگھ گیا؟ قومی اخبارات میں اس سانحہ کی خبر شائع ہوئی؟ بی بی سی نے لندن سے رپورٹ نشر کی۔ ہم منتظر ہی رہے شاید کوئی قومی یا صوبائی لیڈر اس ننگی وحشت اور سربریت کی مذمت کرے۔ شاید کسی این جی او کا نمایندہ، کوئی صحافی، کوئی کالم نگار اور کوئی اینکر پرسن اس تشدد کے خلاف آواز اُٹھائے مگر ہماری اُمید صدا بصحرا ثابت ہوئی۔




آپ ایک لمحے کے لیے سوچیے! کلفٹن کے ساحل پر نیو ایر منایا جارہا ہوتا، نشے میں مدہوش لڑکے اور لڑکیاں طوفانِ بدتمیزی برپا کیے ہوتے۔ ہوائی فائرنگ سے پورا علاقہ گونج رہا ہوتا، خوفزدہ معصوم بچے اپنی ماؤں کی گود میں سمٹ چکے ہوتے، گانوں کے شور سے کانوں کے پردے پھٹ رہے ہوتے، جام سے جام اور جسم سے جسم سرعام ٹکرارہے ہوتے۔ بیمار، کمزور اور بوڑھے دل ہی دل میں تلملارہے ہوتے۔۔۔۔۔۔ پھر کوئی ایک یا چند سرپھرے نوجوان رنگ میں بھنگ ڈال دیتے، روک ٹوک کرتے، ڈیک توڑدیتے، جام چھین لیتے۔ اس چھینا جھپٹی میں کسی مدہوش دیوانے کے جسم پر خراش آجاتی یا کسی نازنین کے پاؤں میں موچ آجاتی تو کیا ہوتا؟ کتنی زبانیں چلتیں؟ کتنے صفحات سیاہ ہوتے؟ کتنے چینل اس واقعے کو فوکس کرتے؟ کتنے دانشور دینی طبقے پر تبرا کرتے اور تان آکر اس بات پر ٹوٹتی کہ اس قسم کے سارے سانحات کی ذمہ داری مولویوں، مدرسوں اور مساجد پر عائد ہوتی ہے۔ انہیں کنٹرول کرنا ضروری ہے۔




ممکن ہے چھینا جھپٹی کے اس عظیم سانحہ کے ذمہ دار دہشت گردوں کی تلاش میں چند مدارس پر چھاپہ بھی پڑجاتا۔ وہاں سے بے گناہ طلبہ کو گرفتار کرکے میڈیا کے سامنے پیش کردیا جاتا۔ خاکے میں رنگ بھرنے کے لیے اسلحہ بھی برآمد کیا جاسکتا۔
اے وہ لوگو! تشدد کا خاتمہ چاہتے ہو اور ملک کے چپے چپے میں امن کی بہار دیکھنا چاہتے ہو تو عدل کرو۔ قیامِ عدل ہی میں ملکوں اور قوموں کی بقا کا راز پوشیدہ ہے۔ یہ ارض وسما بھی عدل ہی سے قائم ہیں۔ سچی گواہی دو اور عدل کا دامن ہر جگہ مضبوطی سے تھامے رکھو۔ چاہے معاملہ دوست کا ہو یا دشمن کا۔ مولوی کا ہو یا مسٹر کا۔ تھر کا ہو یا اپنے گھر کا۔ اگر ہم واقعی امن چاہتے ہیں تو ہمیں دوغلی پالیسی اور منافقانہ رویہ ترک کرنا ہوگا۔ دو دو پیمانے نہیں چلیں گے۔ یہ کیا ہوا کہ امریکیوں، سرمایہ داروں، وڈیروں، موروثی جاگیرداروں، مراعات یافتہ طبقوں اور بیوروکریسی کے افسروں کے لیے پیمانہ الگ اور غریبوں، محنت کشوں، کمزوروں، مولویوں اور دین داروں کے لیے پیمانہ الگ۔ پیمانہ ایک ہی رکھیے مگر اس پیمانے کی ساخت اور تراش خراش میں یہودوہنود سے نہیں کتاب وسنت سے راہنمائی لیجیے۔ جس چیز کو اللہ اور اس کے رسول صلی اللہ علیہ وسلم دہشت گردی اور تشدد کہیں آپ بھی کہہ دیں اور جسے وہ جہاد اور امن وعدل قرار دیں۔ آپ بھی سرتسلیم خم کردیں۔


(تحریر اک اللہ کے بندے کی جانب سے)

__________________
حضور صلی اللہ علیہ وسلم نے فرمایا کہ میں سویا ہواتھا کہ میں نے خواب میں جنت دیکھی ۔ میں نے دیکھا کہ ایک عورت ایک محل کے کنارے وضو کررہی ہے ۔ میں نے پوچھا یہ محل کس کا ہے ؟ تو فرشتوں نے جواب دیا کہ عمر رضی اللہ عنہ کا۔صحیح بخاری