حضرت ابوبکرصدیق رضی اللہ تعالی عنہ سنہ 12ھ میں حج کے ارادہ سے مکہ معظّمہ تشریف لے گئے آپ کے والد حضرت ابو قحافہ رضی اللہ تعالی عنہ زندہ تھے جب آپ اپنے دروازہ کے نزدیک پہنچے حضرت ابوقحافہ رضی اللہ تعالی عنہ باوجود ضعیف و کمزور ہونے کے محبت کے جوش میں اٹھ بیٹھے حضرت ابوبکر صدیق رضی اللہ تعالی عنہ اونٹنی کو جلدی سے بٹھا کر اس پر سے کود پڑے اور دوڑ کر باپ سے لپٹ گئے ابوقحافہ رضی اللہ تعالی عنہ کی آنکھوں سے خوشی کے آنسو پھوٹ پڑے حضرت ابوبکر صدیق رضی اللہ تعالی عنہ نے عرض کیا لوگوں نے خلافت کا بڑا بوجھ میرے کندھوں پر رکھ دیا ہے کہ جس کے وزن سے میں دبا جاتا ہوں آپ دعا کریں کہ اللہ رب العزت مجھ پر اپنا فضل وکرم فرمائے کہ باپ ضعیف العمر ہے بیٹا عرب وعجم اور ملک شام تک کا بادشاہ ہے لاکھوں انسان اس پر جان قربان کرنے کو تیار ہیں اس سے بھی بڑھ کر رسول اللہ صلی اللہ علیہ وسلم کا خلیفہ ہے لیکن کیا مجال کہ باپ کے ادب واحترام میں ذرا فرق آیا ہو (تاریخ حریت اسلام ص 54) کتنے لوگ ہیں جو رسول اللہ صلی اللہ علیہ وسلم کی سنت کی پیروی کر رہے ہیں کیا ایسا نہیں ہوتا کہ بعض لوگ ذرا سا عروج وترقی حاصل کر لیتے نام کما لیتے ہیں تو اپنے غریب ماں باپ اور رشتہ داروں کو اپنے بنگلوں اور کوٹھیوں کا رخ نہیں کرنے دیتے اور ان سے ملازموں جیسا سلوک بھی نہیں کرتے بلکہ ان کو اپنا رشتہ دار ظاہر کرنے تک گھبراتے ہیں اور شرم محسوس کرتے ہیں