تمام مذاہب دوسرے مذہبوں کے خلاف تعصب پیدا کرتے ہیں ۔کہتے ہیں صف میں سچا ہوں باقی سب جھوٹے ہیں۔مثلا ہندوازم کو لیجیئے ۔ہندوازم کے مطابق صرف ہندو پاکیزہ ہیں ۔باقی تمام مذاہب اور انہیں ماننے والے پلید ہیں۔ناپاک ہیں نجس ہیں ان سے دور رہنا چاہیے ۔ان کے ہاتھ سے کوئی چیز لے کر کھاؤ گے تو دھرم بھرشٹ ھو جائے گا۔انکا سایہ بھی نہ پڑے اور اگر پڑ گیا تو پھر سے پاک ھونے کے لیئے اشنان کرنا لازم ھو جائے گا۔ اسلام دوسرے مذاہب کی طرح تعصب کی تعلیم نہیں دیتا۔بلکہ غیر مسلموں کے عقائد ، بزرگوں ، رسم و رواج کی تعلیم پر زور دیتا ہے ۔غیر مسلموں کو برابر کے حقوق دیتا ہے۔انہیں نجس نہیں سمجتا ۔ مشاہیر کہتے ہیں کہ اس حوالے سے اسلام کو مذہب کہنا سراسر غلط ہے۔ کیونکہ اسلام میں مذہب والی کوئی بات نہیں پائی جاتی۔
ہائیں ایسا ہے ۔لیکن اب جو بات میں آپ سے کہنے والا ہوں اسے سن کر آپ چونک جائیں گے۔ہائیں ایسا ہے مسلمان ھونے کے باوجود ہم سب اس بات سے بے خبر ہیں یا اگر خبر ہے تو ہم نے اس بات پر کبھی غرور نہیں کیا اسے سمجھا نہیں۔ بہرحال میں نے قرآن پڑھا تھا تو میں حیرت زدہ رہ گیا۔ہائیں ایسا ہے نہیں ایسا کیسے ھو سکتا ہے تو میری سوئی اٹک گئی تھی۔پتہ نہیں کتنی دیر اٹکی رہی۔ صاحبو میرا کوئی قصور نہیں بات ایسی ہے کہ سوئی اٹک جاتی ہے۔بات یہ کہ اسلام کا مقصد افراد کو صرف انسانیت سیکھانا نہیں سوسائٹی کے کسی ایک گروپ کو اچھے انسان بنانا نہیں۔مسلمانوں کو انسانیت کی منزل تک پہنچانا نہیں۔ بلکہ تمام بنی نوع انسان کو چاہے وہ کسی مذہب سے تعلق رکھتے ہوں انہیں اچھے انسان بنانا ہے۔انہیں انسانیت کی تمام خوبیوں سے آراستہ کرنا ہے۔ قرآن میں اللہ تعالٰی کہتا ہے : ہمارا کام صرف انسان کی تخلیق کرنا ہی نہیں۔ یہ بھی ہماری ذمہ داری ہے کہ ہم انسان کو اسکی منزل کا شعور بخشیں۔ ایسا لگتا ہے جیسے انسانیت اخلاق اور تہذیب اسلام کے جزو ہوں۔ اسلام کے محلے کی گلیاں ہوں مسلمانوں کی پہچان ہوں۔
یارو میرا دوست فقیر چند سچ کہتا ہے ۔کہتا تھا مفتی تمہارا اللہ کیسا اللہ ہے ایک طرف تو اپنی پارٹی بناتا ہے پھر اپنی پارٹی یعنی مسلمانوں کو سپورٹ نہیں کرتا۔ انہیں شہہ نہیں دیتا انکی پیٹھ نہیں ٹھونکتا۔ انہیں اپنے جیالے نہیں سمجھتا۔ الٹا مسلمانوں اور غیر مسلموں کو ایک آنکھ سے دیکھتا ہے ۔دوسرے مذاہب کے خلاف نعرے لگانے کی تعریف نہیں کرتا۔ تعصب کا سبق نہیں پڑھاتا۔ اس ساری دنیا کا رازق بنا بیٹھا ہے۔ ساری انسانیت کو منزل تک پہنچانے کا ذمہ لیے بیٹھا ہے قرآن مسلمانوں پر نازل کرتا ہے ۔خطاب انسان سے کرتا ہے
۔ہمارے آخری نبی جو کہ اللہ کے احکامات جیتے تھے قرآن جیتے تھے انہیں ساری دنیا عظیم انسان مانتی ہے عظیم مسلمان نہیں۔


:ممتاز مفتی کی کتاب تلاش سے اقتباس:

__________________

عشق قاتل سے بھی مقتول سے ہمدردی بھی ،یہ بتا کس سے محبت کی جزا مانگے گا؟
سجدہ خالق کو بھی ابلیس سے یارانہ بھی، حشر میں کس سے عقیدت کا صلہ مانگے گا؟