ورلڈ کپ کرکٹ کے سیمی فائنل میں پاکستان کی شکست بھارت کے زیرانتظام کشمیر کے سترہ سالہ انیس کے لیے کافی نقصان دہ رہی۔ والدین سے ملنے والے جیب خرچ کو تین ماہ تک جمع کر کے انیس نے رنگین ٹی وی اور ڈِِش خریدا۔ والدین اور دوستوں کے ساتھ پرانے سرینگر میں واقع اپنے ایک کمرے والے مکان میں ورلڈ کپ کے سارے مقابلے دیکھے، لیکن پاکستان کی ہار کے بعد اب نہ صرف انیس بلکہ اس کے والدین بھی چھ ہزار روپے کی ’فضول خرچی‘ پر پچھتا رہے ہیں۔
انیس کے والد روز صبح اس کو ڈانٹتے ہیں ’جاؤ آفریدی سے چھ ہزار روپے لے لو۔ میں نے کہا تھا ، کوئی ٹیم بھی جیتے وہ تمہیں کوئی میڈل نہیں پہنائے گی۔‘انیس اُن ہزاروں کشمیری لڑکوں میں سے ہے جو پاکستانی ٹیم کے مداح ہیں۔’میں دسمبر سے سو، دو سو اور پانچ سو کر کے پیسے جوڑ رہا تھا۔ دو مارچ کو میرا خواب پورا ہوگیا۔ چھ ہزار روپے تھے۔ میں نے ایل جی کا رنگین ٹی وی اور ویڈیوکان کی ڈِش خریدی۔ سب کچھ ٹھیک تھا، ہم لوگ پہلی بار رنگین ٹی وی پر میچ دیکھ رہے تھے، لیکن پاکستانی ٹیم جب بھارتی گیند بازوں کے آگے ڈھیر ہوگئی تو ہمارے گھر میں مایوسی پھیل گئی۔‘
انیس کے والد عبدالاحد ریڑھی پر سبزی بیچتے ہیں۔ ان کے یہاں پچھلے پندرہ سال سے بلیک اینڈ وائٹ ٹی وی تھا جو اب خراب ہے۔ مسٹر احد کہتے ہیں ’میں نے انیس کو کہا تھا، پڑھائی میں دل نہیں لگتا تو میرے ساتھ ایک اور ریڑھی لگاؤ، یہ کرکٹ شِرکٹ بکواس ہے۔ اس کے چھ ہزار روپے پاکستانی ٹیم کو نہیں بچا سکے۔ یہ جنون ہے، اور اب وہ پچھتا رہا ہے۔‘
انیس نے ورلڈ کیپ سیمی فائنل سے قبل اپنے دوستوں کے ہمراہ پٹاخے اور پھول جھڑیاں بھی خریدی تھیں ’پاکستان ہار گیا تو سوچا جب سری لنکا جیتے گا ہم آتش بازی کریں گے۔ بعد میں تیندولکر اور دھونی کی دھواں دار بیٹنگ کو دیکھ کر لگا کہ اب بھارت کی جیت پر ہی پٹاخے پھوڑنے کے بغیر کوئی چارہ نہیں۔‘قابل ذکر ہے کہ کشمیر میں مخصوص سیاسی صورتحال کی وجہ سے اکثر شائقین کرکٹ مقابلوں میں بھارت کی حمایت نہیں کرتے۔ اُنیس سو ستاسی میں اُس وقت کے وزیراعلیٰ فاروق عبداللہ کے اصرار پر سرینگر کے کرکٹ سٹیڈیم میں بھارت اور ویسٹ انڈیز کے درمیان ایک روزہ میچ کا اہتمام کیا گیا، لیکن سٹیڈیم میں موجود لوگوں نے بھارتی کھلاڑیوں پر پتھراؤ کیا اور بعض نوجوانوں نے پِچ کو ہی کھود ڈالا۔
تبصرہ نگار جاوید احمد میر کہتے ہیں ’بھارتی ٹیم کی مخالفت اور پاکستانیوں کی حمایت کر کے یہاں کے لوگ اپنی سیاسی شکایات کی طرف عالمی توجہ مبذول کرنا چاہتے ہیں۔ لیکن کرکٹ جنگ نہیں ہے، اس میں ہار جیت کے فیصلوں سے کشمیریوں کو کچھ بھی نہیں ملنے والا۔‘
انیس کے دوستوں نے ایک مقامی کتب فروش سے آفریدی کے دو درجن پوسٹر بھی خریدے تھے ’جب آفریدی آؤٹ ہوگئے تو ہم نے وہ پوسٹر جلا دیے۔‘
بی بی سی اردو

__________________

اور اس نے میرے ساغر میں
مئے سرخ انڈیلی ۔۔۔ تو کہا
مت سوچو !