وفاقی دارالحکومت اسلام آباد میں مختلف مذہبی جماعتوں کے علماء اور رہنما مبینہ طورپر زہریلی مٹھائی کھانے کے بعد خراب ہونے پر ہسپتال پہنچ گئے۔ پولی کلینک ہسپتال کے ڈپٹی ڈائریکٹر ڈاکٹر افتخار احمد نے بتایا کہ ابتدائی جائزے کے بعد یہ ایک حادثاتی زہر خورانی تھی۔ لیکن اس حوالے ٹیسٹ کیے جا رہے ہیں تاکہ درست حقائق کا پتہ چل سکے۔انھوں نے بتایا کہ تمام مریضوں کی طبیعت اب بہتر ہے۔تفصیلات کے مطابق اسلام آباد میں مختلف مذہبی جماعتوں کے علماء اور رہنما مبینہ طور پرزہریلی مٹھائی کھانے کے بعد طبیعت خراب ہونے پر ہسپتال میں زیر علاج ہیں۔ہسپتال داخل ہونے والوں میں جماعت اسلامی کے رہنماء لیاقت بلوچ، رویت ہلال کمیٹی کے چیرمین مفتی منیب الرحمان اور مولانا سمیع الحق کے بیٹے راشد الحق سمیت دس افراد شامل ہیں۔جمعیت علماء اسلام فضل الرحمان گروپ کے سینیٹر مولانا غفور حیدری نے برطانوی ریڈیوسے بات چیت کرتے ہوئے بتایا کہ جمعرات کو اسلام آباد میں وزارت مذہبی امور کے زیر اہتمام ملک بھر کی مذہبی جماعتوں سے تعلق رکھنے والے جید علماء کی کانفرس منعقد ہونا تھی۔انھوں نے بتایا کہ کانفرس میں انھیں بھی مدعو کیا گیا تھا لیکن ایجنڈے کے بارے میں اسی روز یعنی جمعرات کو مطلع کیا گیا تھا اس لیے انھوں نے کانفرس کے ایجنڈے پر مشاورت کرنے کے لیے پارلیمنٹ لاجز میں واقع ان کی رہائش گاہ میں جمعیت علما اسلام فضل الرحمان گروپ، جمعیت علما اسلام سمیع الحق گروپ کے علاوہ جماعت اسلامی کے رہنماوٴں کو مشاورت کے لیے بلایا۔انھوں نے بتایا کہ اس دوران مفتی منیب الرحمان بھی کانفرس کے شرکت کے حوالے سے بات کرنے کے لیے ان کی رہائش گاہ پہنچ گے۔ مولانا غفور حیدری کے مطابق اس دوران چائے کا اہتمام کیا گیا جس میں بسکٹ کے ساتھ مٹھائی بھی تھی۔ انھوں نے کہا کہ مٹھائی کھاتے ہی میٹنگ میں شریک بارہ سے پندرہ لوگوں کی طبعیت خراب ہونا شروع ہو گئی۔ اس موقع پر جماعت اسلامی کے رہنما لیاقت بلوچ نے کہا کہ مٹھائی کی وجہ سے طبیعت خراب ہوئی ہے۔انھوں نے بتایاکہ مہمانوں کی طبیعت زیادہ خراب ہونے پر انھیں فوری طور پر ہسپتال منتقل کر دیا گیا۔انھوں نے بتایا کہ وہ ایک روز پہلے ہی سعودی عرب سے حج کا فریضہ ادا کرکے واپس اسلام آباد پہنچے تھے۔ اور ان کی غیر موجودگی میں گھر پر کوئی نامعلوم شخص جج کی مبارکباد کے طور مٹھائی دے گیا تھا جو ان کے باورچی نے چائے کے ساتھ پیش کی۔انھوں نے کہا کہ بظاہر زہریلی مٹھائی کا ٹارگٹ وہ ہی تھے لیکن چونکہ وہ ذیابیطس کے مریض ہیں اس وجہ سے انھوں نے میٹھا کھانے سے گریز کیا۔ انھوں نے بتایا کہ ان کے باورچی کی طبیعت بھی خراب ہے اور جب وہ حالت بہتر ہو گی تو وہ معلوم کروائیں گے کہ مٹھائی کون دے گیا تھا۔کانفرس کے بارے میں بتاتے ہوئے انھوں نے کہا کہ کانفرس میں ملک میں شدت پسندی کے واقعات کے حوالے سے لائحہ عمل تیار کرنا تھا۔ اور اس مقصد کے لیے مختلف مکاتب فکر کے علماء نے شرکت کرنا تھی۔دوسری جانب جمعیت علما اسلام سمیع الحق گروپ کے رہنما اور سابق ممبر قومی اسمبلی شاہ عبدالعزیز نے بتایا کہ وہ مولانا غفور حیدری کے گھر اجلاس میں موجود تھے جس میں ان کی جماعت نے فیصلہ کیا تھا کہ وہ حکومت کے کہنے پر دہشت گردی اور خودکش حملوں کے خلاف فتویٰ نہیں دے گی۔انھوں نے کہا کہ کیونکہ شدت پسندی ایک حساس معاملہ ہے اور حکومتی دباوٴ کے باوجود سوچ بچار کے بعد ہی کوئی فیصلہ کرنا چاہیے۔ انھوں نے بتایا کہ اس دوران زہریلی مٹھائی کا واقع پیش آ گیا۔شاہ عبدالعزیز نے بتایا کہ کہا کہ زہریلی مٹھائی علماء کے خلاف کوئی سازش ہو سکتی ہے اس لیے حکومت فوری طور اس بات کی تفتیش کرے کہ مولانا کے گھر مٹھائی کا ڈبہ کس نے پہنچایا تھا۔اسلام آباد کے سرکاری پولی کلینک ہسپتال کے ڈپٹی ڈائریکٹر ڈاکٹر افتخار احمد نے بتایا کہ دس افراد تشویشناک صورتحال میں ہسپتال لائے گئے۔ انھوں نے بتایا کہ ابتدائی جائزے کے بعد یہ ایک حادثاتی زہر خورانی تھی۔ لیکن اس حوالے ٹیسٹ کیے جا رہے ہیں تاکہ درست حقائق کا پتہ چل سکے۔انھوں نے بتایا کہ تمام مریضوں کی طبیعت اب بہتر ہے اور ان کے معدے صاف کرنے کے بعد ضروری ادویات دی گئی ہیں اور جلد انھیں ہسپتال سے فارغ کر دیا جائے گا۔

اردو پواینٹ

__________________

اور اس نے میرے ساغر میں
مئے سرخ انڈیلی ۔۔۔ تو کہا
مت سوچو !