تھائی لینڈ کے شہر بنکاک میں اگست کے وسط میں ایک ریئلٹی ٹی وی شو کی ریکارڈنگ کے دوران شو میں حصہ لینے والے ایک پاکستانی شہری کی ہلاکت نے جہاں ایسے ٹی وی شوز کے لیے کیے جانے والے حفاظتی انتظامات کے بارے میں سوالات پیدا کر دیے ہیں وہیں پاکستانی ذرائع ابلاغ میں اس خبر کا ’بلیک آؤٹ‘ جیسا انداز خود اپنی جگہ ایک خبر بن گیا ہے۔
کراچی سے تعلق رکھنے والے چونتیس سالہ بینکار سعد خان انیس اگست کو کثیر القومی کمپنی یونی لیور کی اشتہاری مہم سے متعلقہ ریئلٹی ٹی وی شو کی ریکارڈنگ کے دوران پانی میں ڈوب کر ہلاک ہوگئے تھے۔
سعد خان کو پندرہ پاؤنڈ وزن اپنی پیٹھ پر باندھ کر ایک تالاب میں سے تیر کرگزرنا تھا تاہم وہ اس کوشش کے دوران ڈوب گئے۔ مذکور ریئلٹی ٹی وی شو کی ہدایات کے لیے ممبئی کے ایک فلم ڈائریکٹر کے خدمات حاصل کی گئی تھیں اور یہ شو مختلف ٹی وی چینلز پر دکھایا جانا تھا۔ تاہم اطلاعات کے مطابق سعد کی موت کے بعد شو کو آن ائر کرنے کا منصوبہ فی الوقت مؤخر کر دیا گیا ہے۔
یونی لیور کی ترجمان کا کہنا ہے کہ ان کی موت کی تحقیقات ہو رہی ہیں اور کمپنی سعد کی موت کی ذمہ دار نہیں ہے۔ کمپنی کی اطلاعات افسر فرشتے اسلم نے بی بی سی سے بات کرتے ہوئے کہا کہ ریئلٹی ٹی وی شو کے دوران تمام حفاظتی انتظامات کیےگئے تھے۔ اس سوال پر کہ کیا ہلاک ہونے سعد خان کے خاندان کو کمپنی نے کوئی زرِ تلافی ادا کیا ہے فرشتے اسلم کا کہنا تھا کہ ان کی کمپنی اور سعد کے خاندان کے درمیان بعض معاملات حل ہونے کو ہیں اور دونوں فریقین نے فی الوقت خاموش رہنے پر اتفاق کیا ہے۔
سعد خان کے ایک دوست بابر جمانی نے بی بی سی سے بات کرتے ہوئے کہا کہ سعد کے اہلِ خانہ بھی تھائی لینڈ میں جاری پولیس تفیش اور دیگر قانونی مراحل مکمل ہونے کے انتظار میں ہیں اور فی الوقت میڈیا سے گفتگو کرنے سے گریز کر رہے ہیں۔ بابر کے مطابق یونی لیور کمپنی کے خلاف سعد کے خاندان کی طرف سے قانونی چارہ جوئی کا انہیں کوئی علم نہیں ہے۔
سعد خان کی موت کی خبر کا ایک اہم پہلو یہ بھی ہے کہ قریباً ہر چھوٹی بڑی خبر کو ’بریکنگ نیوز‘ کے طور پر چلانے والے پاکستانی میڈیا نے ابتدائی طور پر نہ صرف یہ خبر ’ڈراپ‘ کر دی بلکہ بعد ازاں صرف ایک نجی چینل پر سرسری طور پر اس کا تذکرہ سننے میں آیا۔
پاکستان کے سینئر صحافی اور میڈیا کے نقاد حسین نقی کا کہنا ہے کہ ’پاکستان میں یہ خوش فہمی میڈیا کی خود بنائی ہوئی ہے کہ میڈیا آزاد اور سچ بولتا ہے‘۔ بی بی سی سے بات کرتے ہوئے انہوں نے کہا کہ اس ریئلٹی شو کے دوران پاکستانی شہری کی ہلاکت کو پاکستانی میڈیا نے اتنے سطحی انداز سے رپورٹ کیا ہے کہ کسی کو پتہ ہی نہیں چل سکا کہ دراصل کیا ہوا تھا۔
انہوں نے ماڈل کی موت کی خبر کو غیر اہم بناکر پیش کرنے کے پس منظر پر بات کرتے ہوئے کہا ہے کہ ’ کثیر القومی کمپنیاں پاکستانی میڈیا کو کروڑوں روپے کا بزنس فراہم کرتی ہیں اور یہی وجہ ہے کہ میڈیا مالکان کی نظر ان کے اشتہارات پر زیادہ اور ماڈل کی موت جیسی خبر پر کم پڑتی ہے‘۔
اس حوالے سے جب پاکستان میں ٹی وی بزنس سے وابستہ گروپوں کے مالکان اور شیئر ہولڈرز سےبات کرنے کی کوشش کی گئی تو ان سے رابطہ نہیں ہو سکا ہے جبکہ رابطہ ہونے پر نجی پاکستانی ٹی وی چینل ’ہم‘ کی سربراہ نے صرف اتنا کہہ کر فون بند کردیا کہ وہ اس موضوع پر بات نہیں کرنا چاہتیں۔

بی بی سی