السلام علیکم !
رات کے ساڑھے بارہ بجے تھے ۔۔۔۔ گاڑی جونہی پارکنگ ایریا کی طرف آ کر رکی ۔۔۔ ایک بچہ تیزی سے دوڑتا ہوا آیا ۔۔۔ اپنی سانسوں کو بحال کیا اور بولا :
یہ لے لیں سر ۔۔۔! یہ لے لیں باجی ۔۔۔!
اس کی طرف توجہ کی تو پانچ یا چھ سال کا ایک ننھا منھا سا فرشتہ ۔۔۔ صاف ستھرے جسم پر صاف ستھرا بے شکن لباس پہنے ۔۔۔۔ ہاتھ آگے کئے کھڑا تھا ۔۔
اس نے اپنے ہاتھ میں ایک ترو تازہ پھول پکڑا ہوا تھا ۔۔۔ جو بہت نفاست کے ساتھ پیک کیا گیا تھا ۔۔۔ لیکن اس معصوم کلی کی تازگی کے آگے وہ پھول مرجھایا ہوا لگ رہا تھا ۔۔۔
وہ خوبصورت مسکراتا ہوا بچہ جس کی آنکھوں میں ایک حسرت تھی کہ اس کا " مال " بک جائے ،کہیں ایسا نہ ہو کہ اسے ہاتھ کے اشارے سے دھتکار دیا جائے ۔
ایک بار پھر التجائیہ انداز میں بولا :
لے لیں باجی ۔۔۔۔
اور انتہائی معصومیت سے ایک بار پھر اس آس پر لب کھولے کہ شاید اب کی بار اس کی پکار کا مثبت جواب مل جائے
ہزاروں ۔۔ لاکھوں روپے بٹور کر لوگوں کو مارکٹنگ کے گُر سکھانے اور سیکھنے والوں کو ایمانداری کا سبق مفت فراہم کرتے ہوئےگویا ہوا :
ہم پانچ کا لاتے ہیں آپ کو دس کا دے رہے ہیں۔۔۔۔ لے لیں ۔۔۔!!!

اس کے اس جملے نے ان تمام " بڑے بڑے " بیوپاریوں کے منہ پر زبردست طمانچہ مارا جو کہتے ہیں :
ہم اپنا نقصان کر کے اپ کو سستا مال دے رہے ہیں ۔۔۔
ان کی کمائیوں میں سے اگر جھوٹ اور دھوکہ نکال دیں تو شاید یہ لوگ بھی سڑکوں پر پھول بیچ رہے ہوتے ۔۔ لیکن عزت دار کہلاتے ۔
اس ننھے پیارے سے بچے کو دیکھ کر یہ اندازہ کرنا کوئی مشکل نہیں تھا کہ وہ کسی کھاتے پیتے امیر گھرانے کا چشم وچراغ ہوگا
لیکن اس کے ہاتھ میں پکڑے ہوئے پھول جسے بیچنے کی وہ اپنی ہر ممنکہ کوشش آخری حد تک کر رہا تھا ۔۔۔ اس بات کا پتا دے رہی تھی کہ ۔۔
سجائے رکھتے ہیں چہرے پر جو ہنسی کی کرن
نجانے رُوح میں کتنے شگاف رکھتے ہیں
اس کی معصوم ادائیں اور خوبصورت باتوں نے اپنے سحر میں جکڑ لیا
اور اس ننھے فرشتے سے گفتگو کا سلسلہ چل نکلا ۔۔
نام اس کا نجیب تھا ۔۔۔
پوچھنے پر مزید بتایا کہ صبح اسکول پڑھنے جاتے ہیں رات کو مزروری کرتے ہیں ۔۔۔
باپ کے متعلق پوچھنے پر ایک اور انکشاف اس کی زندگی کا ہوا کہ :
باپ ۔۔۔۔؟ وہ تو مر گیا ۔۔۔ اُدھر افغانستان میں مر گیا ۔۔۔!!!
اس کے پھولوں کی قیمت زیادہ دی جانے لگی( بڑے لوگوں کی شان کے مطابق ) تو ایک اور نہ بھلایا جانے والا سبق اس ننھے استاد کی زبانی ملا :
میری ماں منع کرتی ہے زیادہ پیسے نہ لینا ۔۔!!
ماں ۔۔۔؟ کہاں ہے تمھاری ماں ؟
ذرا فاصلے پر درختوں کے جھنڈ کی طرف اشارہ کر کے کہا گیا ۔
وہاں ہے ۔۔!!
اندھرے میں بس ایک ہیولا سا نظر آیا ۔۔۔ جو اسی طرف دیکھ رہا تھا اور کچھ مضطرب بھی تھا ۔۔
اس سے ملنے کی خواہش ظاہر کی تو بولا :
ماں کو اُردو نہیں آتی ۔۔۔!!
وہ ماں ناجانے خود کیوں کسی کے سامنے نہ آتی تھی ۔۔۔۔
شاید اس کے خاندان کی یہ روایت تھی ۔۔
لیکن اس عظیم ماں نے جس انداز سے اپنے بچے کی پرورش کی ۔۔۔ جہاں دس ہاتھ اسے " بام " تک لے جانے کے لیے آسانی سے مل جاتے ۔۔۔

اس نے ایمانداری سے کمانا اور سر اٹھا کر جینا سکھایا ۔۔!

چھپ کر ہی سہی اپنے بچے کی ایک ایک حرکت پر نظر رکھی ۔۔۔
اتنے میں دور سے ذرا بڑی عمر کے بچے لیکن جن کی عمریں دس سال کے اندر ہی تھی ۔۔۔۔۔ ننھے نجیب کی طرح صاف ستھرا لباس پہنے مسکراتے دوڑتے ہوئے گاڑی کی طرف آئے ۔۔۔
اور اپنی مادری زبان میں باتیں کرنے لگے ۔۔۔
نجیب نے بتایا کہ یہ اس کے بڑے بھائی ہیں ۔۔۔
اُن سے بھی تعارف ہوا ۔۔
تین بھائیوں اور ایک خوددار ماں کی یہ چھوٹی سی فیملی ۔۔
باپ کا شفقت بھرا سایہ اور مضبوط سہارا سر سے اٹھ جانے کے باوجود کہیں سے کمزور اور " چھوٹی " نہیں لگ رہی تھی ۔۔
بلکہ بڑے بڑے بنگلوں اور گھروں میں رہنے والے اور شاندار سواریوں میں سفر کرنے والے ۔۔۔۔ اس خاندان کے آگے پست قد بونے لگ رہے تھے ۔۔ جن کی صرف زبانیں ہی دراز ہیں ۔۔۔
میں سوچ رہی تھی کہ اس مختصر سے ملاقات کو " چائلڈ لیبر ڈے " کے لیے اٹھا کر رکھوں یا ۔۔۔
" مدر ڈے " کے لئے ۔۔۔۔ وہ ماں کہ
جو ان پڑھ ہونے اور لوگوں کا سامنا نہ کرنے کے باوجود لاکھوں پڑھے لکھوں سے زیادہ با شعور اور بہادر ہے ۔۔
جس نے اپنی اولاد کو دنیاوی سہولیات سے محروم ہونے کے باوجود احساس کمتری میں مبتلا نہ ہونے دیا ۔
جس نے انھیں لوگوں کے آگے ہاتھ پھیلانے سے باز رکھا ۔
شاید پانچ ستارہ اور چار ستارہ ہوٹلوں میں چائلڈ لیبر اور مدر ڈے کے موقع پر سیمنار اور پروگرامات منعقد کرنے والے
اور خصوصی پیغامات ان ڈیز کے نام دینے والوں کی آواز سے نجیب اس کے بھائی اس کی ماں اور
ہزاروں " نجیب " نامانوس ہی ہوں گے بلکہ اُن کی آواز نہ ان لوگوں تک پہنچ سکتی ہے نہ ان کی آواز اُن تک ۔۔۔
اُنھیں تو شاید علم بھی نہیں کہ ۔۔۔۔۔
کتنے نجیب اچھے اسکولوں میں پڑھنے کی خواہش دل میں لئے ۔۔۔۔۔ پھول بیچ رہے ہیں ۔۔۔
میرا سوال دنیا سے دہشت گردی کا خاتمہ کر کے اسے امن دلانے والے نام نہاد سپر پاورز اور اپنے ملک کے زرداریوں سے ہے کہ
کیا یہ معصوم بچے کسی دہشت گرد کے ہیں جو دربدر کر دیئے گئے ؟
کیا وہ عظیم عورت ان بچوں کی ماں ، دہشت گرد کی بیوی ہے جو اپنے بچوں کو روکھی سوکھی کھلا کر اعلٰی اخلاق سکھا رہی ہے ؟
آپ بھی اپنے ارد گرد ۔۔۔ پارکنگ ایریا اور سڑکوں پر بھاگتے ڈورتے " نجیبوں " کے لیے کچھ نہیں کر سکتے تو
صرف ان سے محبت کے دو بول ہی بول لیں ۔۔
انھیں ہمارے پیسے کی ضرورت تو ہے لیکن کوئی ہوس نہیں ۔۔۔۔
لیکن یہ ہماری محبت بھری نگاہوں اور شفقت بھرے ہاتھوں کو ضرور ترسے ہوئے ہیں ۔۔۔۔
انھیں حالات سے مقابلہ کرتے ہوئے جینے کا حوصلہ ضرور دیں ۔۔۔۔!!!!
خدا کرے کہ مری ارض پاک پر اترے
وہ فصل گل جسے اندیشہ زوال نہ ہو

__________________

دختراسلام ڈاکٹر عافیہ صدیقی اور ان کے اہل خانہ کی عظمتوں کو سلام۔
مدہوش حکمرانو! ہوش میں آؤ۔۔۔