دبئی میں زیر تعمیر ’برج دبئی‘ دنیا کی سب سے اونچی عمارت ہو گئی ہے۔ اس کی اونچائی ابھی 1680 فٹ ہے۔ اب تک دنیا کی سب سے اونچی عمارت تائیوان میں تھی جس کی اونچائی 1667 فٹ ہے۔

تعمیر مکمل ہونے کے بعد برج دبئی 2275 فٹ اونچا ہوگا۔ اس کے ڈیویلپر عمار پراپرٹیز کا کہنا ہے کہ برج دبئی کی 141 منزلیں تعمیر ہوچکی ہیں جو کہ دنیا کی کسی بھی عمارت سے بھی زیادہ ہیں۔

اس کی تعمیر اکیس ستمبر 2004 کو شروع ہوئی اور سن 2008 میں مکمل ہوگی۔ برج دبئی کو 100 کلومیٹر دور سے دیکھا جاسکے گا۔

تعمیر مکمل ہونے پر برج دبئی میں 160 منزلیں اور 56 لِفٹ ہوں گی۔ اس علاوہ اس عمارت میں دکانیں، اپارٹمنٹ، سوئمنگ پول، دفاتر، ہوٹل وغیرہ ہونگے۔ اطالوی فیشن ڈیزائنر جارجیو ارمانی اس میں اپنا پہلا ہوٹل کھولیں گے۔

اس کی 124ویں منزل پر ایک پیلٹ فارم ہوگا جہاں سے آپ باہر کا نظارہ کرسکیں گے۔

برج دبئی کو انسانی تعمیرات میں بلند ترین ہونے کا اعزاز حاصل ہوگا۔ یہ اعزاز امریکہ کی ریاست نارتھ دکوٹہ میں کے وی ایل وائی ٹی وی ٹاور کو حاصل ہے جس کی اونچائی 2072 فٹ ہے۔

عمار پراپرٹیز کے گریگ سانگ کا کہنا ہے کہ یہ سب سے اونچی عمارت دبئی کے ’دنیا کا شہر‘ ہونے کی علامت ہے۔ عمار پراپرٹیز کے چیئرمین کا کہنا ہے کہ یہ انسانی کارنامہ ہے جس کی مثال نہیں ہے۔

دنیا کی فلک بوس عمارتوں میں نیو یارک کی امپائر سٹیٹ بلڈنگ (1250 فٹ)، شنگھائی کی جِن ماؤ بلڈِنگ (1381 فٹ)، شیکاگوں کا سیرز ٹاور (1451 فٹ) اور ملیشیا کے پیٹروناس ٹاورز (1483 فٹ) شامل ہیں۔

__________________