دو دن قبل بڑا بھائی کوئٹہ سے واپس آیا اور کوچ سے اُترا تو اچانک کھڑے کھڑے نیچے گر گیا۔ پریشان ہو کر اُس سے پوچھا کہ یہ کیا معاملہ ہے تو کہنے لگا کھڑا نہیں ہوا جا رہا۔ سہارا دے کر کھڑا کیا تو پھر دوبارہ گر گیا۔ بمشکل تمام اُس کو گاڑی میں سوار کیا اور گھر لے آیا۔ ڈاکٹر کو لایا تو اُس نے کہا کہ وائرل اٹیک لگتا ہے اور میڈیسن لکھ کر دی۔
خیر اُسی دن شام کو اُنہیں ہسپتال ایڈمٹ ہونا پڑا۔ اُنکی ٹانگوں کی جان بالکل ختم ہو گئی تھی۔ ڈاکٹر نے اپنا ٹریٹمنٹ جاری کیا اور تین چار ڈرپس مختلف قسم کے انجکشنز ۔۔۔۔
صبح تک کسی قسم کا فرق نہ آیا۔ حتیٰ کہ انکو بیڈ پر سیدھا کرنے کے لیے مجھے سہارا دینا پڑتا تھا۔
8صبح بجے کے قریب ۔۔۔۔ساری رات جاگنے اور بھائی کے بھاری بھرکم جسم کو بار بار اُٹھانے کی وجہ سے ۔۔۔۔۔میں تھک گیا اور میں نے کہا کہ میں ذرا گھر جا رہا ہوں۔ اور دوست کو بھیجتا ہوں۔
خیر میں گھر آ گیا۔۔۔اور دوست کو ہسپتال بھیج دیا۔ ایک دو گھنٹے آرام کر کے میں واپس ہسپتال آیا تو دیکھا بھائی آرام سے چل پھر رہا ہے ۔

میں حیران پریشان۔۔۔۔۔یہ کیا معاملہ ہوا۔
بھائی نے بتایا کہ تمہارے جانے کے بعد میرے دو دوست آ گئے تھے (جو انکے ساتھ کمپنی میں کام کرتے تھے)۔ ان کو معاملہ بتایا تو اُن میں سے ایک ذرا "پیری فقیری" کی لائن کا بندہ ہے۔ اُس نے پانی پر دم کیا اور مجھے کہا کہ پیو۔ میں نے پانی پیا تو اُس نے کہا اب اُترو چلو گھر چلتے ہیں۔ بھائی کا کہنا تھا کہ میں اُس کے مجبور کرنے پر نیچے اُترا تو حیرانگی کی انتہا نہ رہی میرا جسم ٹھیک کام کر رہا تھا۔ میرے دوست نے 10 منٹ پھر کُچھ پڑھا اور پھر مجھ پر پھونک دیا۔ اُس کے بعد بھائی نے "اُٹھک بیٹھک" کی جو اُس نے آرام سے وہ تمام کام کر لیے۔

بھائی کا کہنا تھا کہ وہ تو اصرار کر رہے تھے کہ ابھی چلو ہسپتال سے ڈسچارج سلپ لو اور گھر چلو۔ اب تم ٹھیک ہو۔ لیکن میں نہیں گیا۔

کل سارا دن میں نے بھائی کو چیک کیا۔ وہ آرام سے چل پھر رہے تھے۔ حالانکہ گزشتہ دن تک یہ صورت حال تھی کہ وہ اپنا دھڑ تک نہیں ہلا پا رہے تھے۔ اور ان کو اُٹھانے یا واش روم لے جانے کے لیے مجھے اپنا سارا زور لگانا پڑتا تھا۔ (اُن کا وزن 88 کلو گرام ہے)

خیر شام کو ڈاکٹر کے پاس گئے تو وہ بھی خاصا حیران تھا ۔ تاہم بھائی نے یہی کہا کہ آپکی میڈیسن اور دوست کی دعا نے کام دکھایا ہے۔ اس پر ڈاکٹر صاحب برافروختہ ہوگئے کہ اگر اس طرح بیماریاں دور ہونی ہوتیں تو ہسپتال سارے ویران ہو گئے ہوتے۔ جب کہ حقیقت میں صورت حال یہی تھی کہ صبح آٹھ بجے تک بھائی اپنا جسم تک نہیں ہلا پا رہا تھا اور میڈیسن تو رات کے بعد سے کوئی بھی نہیں لی تھی۔