“اورواقعہ یہ ہے کہ مل جل کر ساتھ رہنے والے اکثرایک دوسرے پر ذیادتیاں کرتے رہتے ہیں، بس وہی لوگ اس سے بچے ہوئے ہیں جو ایمان رکھتے ہیں اورعمل صالح کرتے ہیں اورایسے لوگ کم ہی ہیں“۔ سورۃ ص

ہماری سماعت میں ابھی کافی دیرتھی۔ ایک عورت امی کے مقابل بیٹھی رو رہی تھی جسکے ساتھ ایک نوجوان لڑکی تھی۔ اُس نے نقاب کیا ہواتھا۔ اِتنے میں جج (جنکا نام مجھے یاد نہیں) کمرے میں داخل ہوا سب اُنکی تعظیم میں کھڑے ہو گئے۔ مجھے اچھی طرح یاد ہے اُس دن فلم و ڈرامہ سٹارقوی خان کی سماعت بھی تھی کیونکہ اُس دن وہ میری چھوٹی بہن کواورمجھے سارا وقت یعنی پیشگی سے پہلے اپنے پاس بیٹھائے ہوئے تھاجوخوف اورڈر کی وجہ سے کافی سہمی ہوئی تھیں۔ چونکہ پہلے اُس کا مقدمہ عدالت میں پیش ہونا تھااِسلئے اُس کووکیل کی پیروی میں جانا پڑااوروہ ہمیں بہنوں کو امی کے پاس بیٹھاکر تسلی دے کرکورٹ میں پیش ہوا۔ ہم سب اُسی کمرے میں تھے لیکن اِس کورٹ رُوم میں اورڈراموں میں دیکھائی گئی عدالت میں بہت فرق تھا۔ اِسلئے سب اپنی اپنی باتوں میں مگن تھے شاید اِنتظارکے لمحات ختم کرنے کیلئے یا پھراپنا غم کم کرنے کیلئے۔

اِتنے میں وہ عورت جو رورہی تھی چپ ہو چکی تھی اورامی سے مخاطب ہوئی کہ آپ کس سلسلے میں آئی ہیں۔ امی نے بتانا مناسب نہ سمجھا تو وہ اپنی بات بتانے بیٹھ گئی شاید اُسکو بھی دل کا بوجھ ہلکا کرنا تھا۔ وہ پیچاری اپنوں کے ہاتھوں زخم کھاکراِنصاف مانگنے آئی تھی جسکا سب اُسکے اپنے ماں جائے نے چھین لیا۔

اُسکے شوہر کی وفات کے تین ماہ بعد اُس کے بڑے بھائی نے اُسکی بیٹی کا رِشتہ مانگا اپنے بیٹے کیلئے۔ اُس سے پہلے بھی اُس کا بڑا بھائی رِشتہ مناگ چُکاتھا لیکن اُس کے شوہرنے نہ دیا کیونکہ اُسکا شوہرجدہ میں کسی سٹورپرسوپروائزرکے طورپرکام کرتا تھا اوروہیں اُس نے اپنے سالے لے بیٹے کو بھی جاب دِلوائی ہوئی تھی جسکا رِشتہ مانگا تھا لیکن وہ لڑکا غلط کاموں میں ملوث ہوگیا۔ پھپھاہونے کے ناطے جتنا وہ سمجھا سکتا سمجھا دیا لیکن کہتے ہیں نہ کہ جوانی پر نصیحتیں ایسے بے اثرہوتی ہیں جسے چکنے گھڑے سے پانی کی بوندیں پھسلتی ہیں۔ اِسلئے اُسکو اُسکے حال پر چھوڑ دیا۔ چھٹیاں گُزارنے وہ پاکستان تو آیا لیکن قدرت کوشاید کچھ اورمنظورتھا جو ایک ایکسیڈنٹ میں وہ جانبحق ہوگیا۔ 4 جوان ہوتی بیٹیاں اوروہ واحدعورت جو اپنے شوہر کی جائیداد سے اپنی بیٹیوں کے اِخراجات برداشت کر رہی تھی۔ بڑی بیٹی کی شادی کا مسئلہ اپنی جگہ تھا لوگوں کی جہیزکی ڈیمانڈزبہت تھیں اوروہ تنہا اُنکی ڈیمانڈزپوری کرنے سے قاصرتھی۔ اُسی بھائی نے دُوبارہ رِشتہ مانگا تواپنا سمجھ کر دے دیا کہ چلو بیٹی سُکھی تو رہے لیکن یہ اُس کی خام خیالی تھی۔

شادی کے کچھ ماہ تو آرام سے گُزرگئے۔ پھرایک روز بھائی کا فون آگیا کہ تمہارے دامادنے کاروبارشروع کرنا ہے اُسکی تھوڑی سی مالی اِمداد کر دو۔ اُس نے کہا وہ کہاں سے مدد کرے تین تین بیٹیاں جوان ہو رہیں بیاہنے والی ہیں اوردو کے سالانہ امتحان ہونے والے ہیں اُنکی فیس وغیرہ کا خرچ الگ۔ الغرض بیچاری نے بھائی کو دُہائی دی کہ وہ تو سب جانتا ہے لیکن اگلے دِن بیٹی کویعنی اپنی بھانجی کوگھربھیج دیا کہ جب کچھ پیسے لاؤتو ہی آنا ورنہ نہیں۔ بیٹی کا گھربچانے کی خاطرجومکان اُنکی آمدنی کا زریعہ تھا اورکرائے پرتھااُسکوفروخت کردیالیکن بھائی نے اُسی پر اکتفا نہ کیابلکہ اُس رقم سے آدھی سے ذیادہ رقم آہستہ آہتسہ کرکے اپنی بہن سے اینٹھ لی۔ کاروبارشروع کیا ہونا تھاوہ پیسے اُس نے اپنی بیٹی کی شادی پرلگادیئے۔ آئے دِن بہو(بھانجی) کو ماں کے گھربھیج دیتا کہ جاکراپنا خرچہ لے کرآؤ۔ وہ بیچاری ماں کی حالت سمجھتی تھی کہ اب اُس کے پاس کوئی زریعہ نہیں کمائی کا سوائے اسکے کہ وہ لوگوں کے کپڑے لالاکرسلائی کرے اوردِن میں ایک فیکٹری میں کام کرے جس سے اُسکی ماں کی حالت دِن بدن خراب ہوتی جا رہی تھی کیونکہ فیکٹری کا ماحول ناموافق تھا۔ ایک دن وہ بیچاری بول پڑی کہ میں آپکے بیٹے کہ ذمہ داری ہوں اب اُسکومیرا خرچ برداشت کرنا ہوگا۔ اُسکونہیں معلوم تھا کہ وہ بھینس کے آگے بین بجا رہی تھی جہاں ماموں نے ہاتھ اُٹھایا وہیں ممانی یعنی ساس کا حوصلہ بڑھا زُبان درازی کا کہہ کر مارنا شروع کر دیا اب بیٹا بھی کیوں پیچھے رہتا۔ اُس دِن اُنہوں نے صحیح معنوں میں رِشتوں کا خون کردیا۔ مارکھاکر بھی وہ بضد رہی کہ ماں کے پاس اُنکو تکلیف دینے نہیں جائے گی نہ اُن سے پیسے کی ڈیمانڈ کرے گی۔

حدیث نبوی صلی اللہ علیہ والہ وسلم ہے، “اورتم میں سب سے اچھے وہ لوگ ہیں جو اپنی بیویوں سے حق میں سب سے اچھے ہوں“۔

اِتنا کہہ کروہ اُس نے رونا شروع کر دیا۔ اُسکی ہچکی بندھ گئی۔ امی نے اُسکوحوصلہ دیا۔ اِتنے میں اُسکی بیٹی پانی لے آئی۔ پانی پی کر کچھ دیر خاموش رہی پھرسلسلہ وہیں سے جوڑا جہاں سے ٹوٹا تھا۔

اُس دِن اُسکی بیٹی مارکھاکرچپ رہی کہ کب تک ایسا کریں گے۔ پھراُسکوچلتے پھرتے بے اولاد ہونے کے طعنے دینے لگے۔ اوریہی بات کرتے کہ اپنے بیٹے کی دوسری شادی کروا دیں گے۔ ایک روزپھرمار پیٹ کی اُس دن اچانک ہی اُسکی بہن کالج سے واپسی پراپنی بہن کے گھر گئی تو اپنی بہن کی حالت دیکھ کر حواس باختہ ہو گئی اوراُسکو مناکر، منت کرکے اپنے ساتھ سہارا دیکرگھرلے آئی۔ پہلے پہ توماں بیٹی نے اس کی شادی والی بات کو دھمکی سمجھاکہ غصے میں کہہ دی لیکن بعد میں اُنہوں نے تگ و دو شروع کردی اوراِلزام یہ لگایاکہ بہوکا کسی سے چکرتھا اِسلئے وہ گھرچھوڑ کر بھاگ گئی ہے۔ بہوپر بد چلنی کا اِلزام لگایااوریہ نہ سوچا کہ بہو سے پہلے وہ بھانجی ہے اورجسکابچپن اُنکی آنکھوں کے سامنے گُزرا ہے۔ کچھ دِن بعد ماں نے دِل پر پتھررکھ کر اُنکو خُلع کا نوٹس بھجوادیا۔ لیکن وہ طلاق دینے کو تیار نہیں ہیں کیونکہ ایسی صورت میں اُنکو حق مہر جو کہ سوا لاکھ کے قریب رکھوایا تھا اُسکی ادائیگی کرنی پڑے۔ باتوں کے دوران ہی بتایا کہ آج ساتویں سُنوائی ہے اورشاید آج یا اگلی سُنوائی میں فیصلہ کر دیں۔ اِس دوران ایک بات جو سب سے ذیادہ تکلیف دہ تھی وہ تھی اُس عورت کے باقی ایک بہن اورایک بھائی کا ردِ عمل یعنی وہ بھی اُس اِنسان کیساتھ تھے جنہوں نے رِشتوں کا خون کیا لیکن باقی بہن بھائی نے تو اُسکولاوارثوں کی طرح بے حسی کی چادر ڈال کرمنومٹی تلے دفنادیا۔

اِتنے میں اُس عورت کا وکیل آیا اورکہا کہ اب اُسکی باری ہے۔ تھوڑی دیربعد قوی خان امی کے پاس آکربولا بہن آپ کہیں تو رُک جاتاہوں بچیوں کے پاس اگرکوئی گھر سے نہیں آیا تو۔ امی کوبہت آسراہوا لیکن کسی کا احسان لینا وہ گوارا بھی نہ تھا۔ اِسلئے امی نے منع کر دیابس اِتنا کہا کہ ہمارے جانے کا محفوظ بندوبست کروادیں کیونکہ آپکی سب سے جان پہچان ہے۔ اُس نے پولیس لباس میں ملبوس ایک آدمی کو ساری بات سمجھا دی اور امی کو کہہ گیا کہ آپ بےفکرہوجائیں بہن میں نے اِنکوہدایت کر دی ہے۔ امی نے اُسکا شُکری اَدا کیا اوربے فکر ہو گئیں۔

اُس عورت کی سماعت سُننے کیلئے امی سب سے آگے ہمیں لیکربیٹھ گئیں۔ عدالتی سوال جواب ہوئے۔ ماموں (سسر) نے بہوپرابُرے بُرے اِلزامات لگائے۔ پھراُس عورت کو بولنے کا موقع دیا گیا۔ اُس نے تمام رُودادسُنائی جو وہ امی کو سُنا چُکی تھیں لیکن جج نے دو تین بارٹوک کرکہا کہ ذیادہ گہرائی میں جانے کی بجائے آپ مختصراً بات بتائیں کیونکہ ساری باتیں تومعلوم ہو چُکی ہیں۔ پھرجب بیٹی نے اپنا نقاب اُتارا تواُسکے چہرے پر جا بجا نیل اورزخموں کے نشان تھے اوراُسکی ناک کی ہڈی بھی ٹوٹ چکی تھی شاید۔ پھرڈاکٹرزکی رپورٹ پیش کی گئی جسکے مطابق بے اولادی کی وجہ اُص کے شوہر کی طرف سے تھی نہ کہ لڑکی کی جانب سے۔ جج نے اپنی عینک اُتارکرصاف کی اورپھرلڑکے والوں سے پوچھا کہ لڑکی کی حالت کیا اُنکے سبب ہوئی ہے اوربے اولادی کا مرض کسی جان سے ہے؟ پہلے وہ ہڑبڑائے پھرصاف مُکرگئے لیکن اِس دوران خود کو صاف بچانے کے چکرمیں بہوپراِلزام تراشی جاری تھی اورایسے ایسے اِلزامات تھے جنکو سُن کر شریف آدمی غیرت سے زمین میں گڑھ جائے۔ اُس وقت اُس روم میں موجودہراِنسان جو اُس کی بات سُن رہا تھا، کی آنکھ نم تھی کہ کوئی بہن بھائی ساتھ نہ دے رہا تھا نہ کوئی اُس بیچاری کا آسراتھا۔ بہرحال شاید قُدرت اُس پر مہربان ہو گئی تھی جج تھوڑی دیر تک صفحے پر کچھ لکھتا رہا اورکچھ صفحات پلٹتا رہاپھرفیصلہ عورت کے حق میں سُنادیا۔

جب بھی یہ واقعہ میرے ذہن میں آتا ہے میں سوچتی ہوں کہ کیا یہ اُسکی جیت تھی یااُس سے جڑے رِشتوں کی ہار، رِشتوں سے ہار؟ وہ ہارکر جیتی تھی یا وہ مقدمہ جیت کر سب ہارگئی؟


ہارجیت کے اِس کھیل میں جیت کسی کی بھی ہوئی ہو لیکن ہاراُن ظالموں کی تھی جنہوں نے رِشتوں کا بے دردی سے خون کیا۔ یہاں ہار اُن بہن بھائیوں کی تھی جنہوں نے بے سہارا اورمظلوم اورحق پرڈٹی بہن اوراُسکی بیٹی کی بجائے اپنے اُس بھائی بھابھی کا ساتھ دیا جنہوں نے رِشتوں کی بُنیاد ہی ہلا ڈالی لیکن اِنہوں نے اُنکا ساتھ دے کراُس بُنیاد کوہی مسمارکردیا۔

جانے کب لوگ رِشتوں کوپہچانیں گے اُنکی قدرکریں گے۔ چاردِن کی زندگی ہے محبتیں بانٹیں، خوشیاں پھیلائیں اوراپنوں کا یا کسی کے بھی دُکھ کی وجہ نہ بنیں۔ اللہ ہم سب کو سب سے محبت کرنے اورنیک نیت رکھنے کی توفیق عطا فرمائے آمین۔

__________________