سال کا آخری دن کیسے منائیں؟

نیا سال شروع ہو ئے کئی دن گذر چکے ہیں۔ اس دوران آپ کو ہزاروں چاہنے والوں نے مبارکباد اور دعائیں دی ہوں گی۔ اور میرا خیال ہے کہ اسلامی سال کے مقابلے میں انگریزی سال کے پیغامات کہیں زیادہ ہوں گے۔
یہ ہمارا المیہ بن گیا ہے کہ ہم تقلید میں مغرب سے بھی آگے نکل جانے کی بھر پور کوشش کرتے ہیں۔
خوشی کا منانا زندہ قوموں کا شعار ہے اور بھرپور انداز سے منانی چاہیئے۔ لیکن باشعور قومیں کچھ روایات کی امین ہوتی ہیں جنہیں کسی حالت میں بھی نظر انداز نہیں کیا جاسکتا۔
بحیثیت مسلمان ہم دنیا کی زندگی کو آخرت سنوارنے کے نقطہ نظر سے گزارتے ہیں ۔ لیکن اس دوران دنیا سے کٹ جانا اور صرف آخرت کی فکر میں جنگل آباد کرنا اسلامی تعلیمات کے سراسر مخالف ہے۔ کیوں کہ اسلام رہبانیت کی سخت تردید کرتا ہے۔ رحمت عالم صلي اللہ عليہ و سلم کی زندگی اس کی زندہ مثال ہے ۔ اور اس کے بعد ان کے نقش قدم پر چلنے والے خلفائے راشدین اور پھر پوری اسلامی تاریخ کا تسلسل اس کا شاہد عادل ہے۔
ذرا ٹھہریے! ایک لمحے کے لئے سوچ کر یہ طے کر لیں کہ کیا واقعی یہ خوشی منانے کا موقع ہے بھی یا نہیں؟
حقیقت یہ ہے کہ اگر تھوڑی سی بھی عقل سلیم ہو تو انسان کے ذہن میں فورا یہ بات آتی ہے کہ اس سال کے اختتام کے ساتھ اس کی حیات مستعار میں سے ایک اور سال کم ہو گیا۔ موت کے فاصلہ ایک اور سال سمٹ گیا۔ تو یہ سوچنے کے بعد بھی کیا کوئی اس رات جشن منانے کا ارادہ رکھے گا؟ فیصلہ آپ پر ہے۔