پچھلے کچھ دنوں میں بے حد ذہنی کوفت اور تکلیف اٹھانی پڑی۔ کمپنی والوں سے چھٹی کی درخواست کی جس پرکافی بحث و مباحثہ تکرار اور لڑائی کرنی پڑی اور لکھنے لکھانے کو بھی وقت نہ دے سکا۔ یوں تو لمبے عرصے سے پردیس میں ہوں اور ہر گزرتے لمحے سے پردیس کی ان مشکلات کا احساس ہوتا ہے، لیکن پچھلے کچھ دنوں سے یہ احساس شدت سے ہو رہا ہے۔ ایک وہم جو میرے دماغ میں تھا کہ کچھ ادارے یا کاروبار کے مالکان اپنے ملازمین کی بہتری کا کوئی پہلو بھی سوچتے ہیں وہ ختم ہو گیا۔ کاروباری افراد چاہے پاکستان کے ہوں یا سعودی عرب کے وہ اپنے ایک سینٹ، ایک ہلالے یا ایک پیسے تک کے لیے ملازمین کے مفاد کو لات مار دیتے ہیں۔ شوگر ملوں کے مالکان پاکستانی ہوں یا سعودی سب ہی عوام کی کھال اتارنے میں لگے ہوے ہیں، اللہ تعالی دولت ، حیثیت یا اقتدار تو بہت سے افراد کو دے دیتے ہیں لیکن ظرف کسی کسی کو دیتے ہیں۔ ایسے بہت سے صاحبان ہیں جو یہ نعمتیں حاصل کرنے کے بعد غرور میں‌مبتلا ہو جاتے ہیں، حالانکہ زیادہ نعمتیں حاصل کر لینے کے بعد تو عاجزی سے انسان کو اپنے خالق کے آگے جھک جانا چاہیے پر وہ اکڑ میں آ جاتا ہے۔


سعودی عرب میں رہنے کے دوران اس بات کا شدت سے احساس ہوا کہ نہ صرف سعودی حکومت اس غرور میں مبتلا ہے بلکہ یہاں کے باشندوں کی ایک بڑی تعداد بھی خود کو عجمیوں یعنی غیر سعودیوں سے اونچا سمجتھی ہے۔ حکومت نے ایسے ایسے قوانین دے ہیں کہ معاش کے سلسلے میں آئے ہوے افراد کی حیثیت ایک غلام سے بڑھ کر نہیں۔
سعودی عرب میں آنے کے لیے سب سے پہلے آپ کو کسی مقامی باشندے کی غلامی قبول کرنی ہو گی جسے دوسرے لفظوں میں کفالت یا سپانسرشپ کہتے ہیں، اگر وہ چاہے تو آپ کو یہاں کام کرنے دے، وہ چاہے تو ایک منٹ میں آپ کو یہاں سے بے دخل کر دے۔ چاہے آپ یہاں اپنے خاندان کے ساتھ آباد ہو چکے ہوں۔ کسی ایک شہر سے دوسرے شہر کام کی غرض سے جانا ہو تو اپنے کفیل سے تحریری اجازت نامہ درکار ہے۔ گاڑی بیچنی ہو، خریدنی ہو، کاروبار کرنا ہو ہر چیز میں کفیل کی اجازت ضروری ہے، تاہم ان قوانین میں کچھ عرصہ سے کمی کی جا رہی ہے۔ ترقی کے لیے ایک جگہ سے نوکری چھوڑ کر کسی دوسرے جگہ نوکری کرنی ہے تو اپنے کفیل سے اجازت لینی ضروری ہے۔ اگر وہ اجازت نہ دے تو آپ چاہے لاکھ سر پٹخ لیں لیکن آپ کچھ نہیں کر سکیں گے۔
چھٹی پر جانے کے لیے آپ کو مکمل طور پر کمپنی کے قواعد کے تحت کام کرنا ہو گا، اور اگر آپ سمجھیں کہ آپ کا چھٹی جانا آپ کی نوکری سے زیادہ ضروری ہے تو سوائے سعودی عرب چھوڑ دینے کے آپ کے پاس کوئی اور حل نہیں، اس بات کا اندازہ مجھے اس وقت ہوا جب میں نے کمپنی سے زیادہ لمبی چھٹی کے لیے اصرار کیا تو انہوں نے مجھے گھر بجھوا دینے کی دھمکی دے دی، حالانکہ میرے بڑے بھائی صاحب نے 4 لاکھ پاکستانی روپے جیب سے ادا کر کے میرا ویزا خریدا تھا، لیکن کمپنی میں سپانسر شپ منتقل ہونے کے بعدمیرا سعودی عرب رہنا، نہ رہنا کمپنی کے اختیار میں چلا گیا۔ واہ کیا کہنے۔۔۔۔
خیر ان ساری مشکلات کا تذکرہ تو نہیں‌کر سکوں گا کیوںکہ اس کے لیے بہت وقت درکار ہو گا۔ لیکن اکثر اوقات پاکستان کے اس نام نہاد برادر ملک سعودی عرب کے قانون کے متعلق سوچ کر بہت تکلیف ہوتی ہے جہاں ایک نامحسوس انداز میں تمام غیر ملکیوں کو اپنا غلام بنا کر رکھا گیا ہے۔ بے شک سعودی حکومت کے پاکستانی حکومت پر بہت سارے احسانات ہیں لیکن ان احسانات کا ایک عام پاکستانی کو کیا فائدہ ؟ روپیہ پیسہ ،ریالات، قرض معافیاں، مفت تیل سے تو سیاستدانوں کی جیبیں بھرتی ہیں۔ سچ تو یہی ہے کہ ڈکٹیٹروں نے اپنی برادری یعنی ڈکٹیٹروں سے تعلقات رکھے ہیں، کون پاکستان اور کہاں کے پاکستانی۔

__________________
عرفی تومیندیش ذغوغائے رقیباں - آواز سگاں کم نہ کند رزق گدارا
میرا بلاگ | yasirimran.wordpress.com