ایک عرصے سے بھارت کا یہ دعوٰی ہے کہ اس نے ثقافتی سرحدوں پر پاکستان کو شکست دے لی ہے۔ غالباََ اسی زعم میں آجکل بھارت سرحدوں پر اپنی فوج لے آیا ہے۔۔۔۔؟
یہ تو آنے والے دنوں میں پتہ لگ جائے گا۔
مگر پاکستان کو شکست وہزیمت سے دوچار کرنے کے لئے بھارت ہر دو تین ماہ کے بعد ایک ایسی فلم بنا دیتا ہے جس میں ایک مسلمان لڑکی ایک ہندو لڑکے کے عشق میں بری طرح سے مبتلا ہوکر دین و دنیا ٹھکرانے پر راضی ہو جاتی ہے۔ ایسی فلم کا مقصد محض ایک تصوراتی عشقیہ کہانی پیش کرنا نہیں ہوتا بلکہ منظرنامے سے لے کر مکالمے تک، مسلمانوں کی تہذیب کا مذاق اُڑانا۔۔۔۔ نظریہ پاکستان کی نفی کرنا اور ہندو ازم کا پرچار کرنا مقصود ہوتا ہے۔ سالوں پہلے بھارت میں شدھی کی جو رسم شروع ہوئی تھی وہ ابھی تک جاری و ساری ہے، کسی نہ کسی صورت میں۔
موجودہ متنازع اور کشیدہ حالات میں بھارت نے ایک اور فلم ریلیز کر دی ہے جس میں ایک غیرت مند مذہبی مسلمان گھرانے کی ایک لڑکی ہندو لڑکے کے عشق میں گرفتار ہو کر والدین اور سماج سے باغی ہو جاتی ہے۔
جی چاہتا ہے کہ پوچھا جائے کیا بھارت کی مسلمان لڑکیوں کو عشق میں مبتلا ہونے کے سوا کوئی کام نہیں ہے مگر پوچھنا مناسب نہیں کیوں کہ پاکستانی فلموں میں بھی اصل موضوع عشق ہی ہوتا ہے، یہ اور بات ہے کہ پاکستان فلم انڈسٹری کو بھارتی فلم انڈسٹری کو جواب دینے کی فرصت نہیں ہے نہ ہی توفیق ہے۔
تاریح پاکستان کے دوران ایسے کچھ واقعات رونما ہوے تھے، جب ہندوں لڑکیوں نے مسلمان لڑکوں سے اور بعض مسلمان لڑکیوں نے ہندو یا سکھ لڑکوں سے شادیاں کر لی تھیں، انہیں دنوں وجے لکشمی پنڈت والا حادثہ ہوا تھا اور اندراگاندھی نے بھی ایک پارسی نژاد سے شادی کر لی تھی۔ مگر عام طور پر ہوا یوں کی مسمان لڑکوں نے جب بھی شادی کی، خواہ کسی بھی مذہب کی لڑکی سے، اسے مسلمان کر کے نکاح میں لائے۔ مگر اس زمانے کی جتنی شادیاں ہندوؤں میں ہوئیں ان عورتوں نے ہمیشہ پاکستان آ کے بتایا کہ انہیں ہندو گھرانوں میں کبھی عزت و احترام نہیں ملا، انہیں ہمیشہ اُچھوت سمجھا گیا۔ ان کے بچوں کو ہندو بنایا گیا، ہندوانہ نام رکھے گئے انہیں کبھی اپنے مذہبی تہوار منانے کی اجازت نہ دی گئی، ان کے سکہ بند مکالموں کی قلعی کھل گئی جو وہ اپنی ہر ایسی فلم میں بلواتے ہیں۔ یعنی ”محبت کا کوئی مذہب نہیں ہوتا۔”
مگر ان کے سماج میں ہر شادی کا ایک مذہب ہوتا ہے اور وہ صرف ہندو ازم ہوتا ہے، بلکل اس طرح جیسے وہ بھارت کو ایک سیکولر سٹیٹ کہتے ہیں مگر اس پر ہمیشہ کٹر ہندو جماعتیں حکمرانی کرتی ہیں اور بال ٹھاکرے کے ایجنڈے کو پورا کرتی ہیں، اسی طرح اب وہ اپنی فیچر فلموں کے ذریعے ایک سیکولر محبت کا پروپیگنڈا کرنے لگے ہیں مگر اس پروپیگنڈے کا نشانہ صرف مسلمان طبقہ ہے باقی مذاہب سے غالباَ انہیں کوئی سروکار نہیں ہے یا غالباّ کوئی خطرہ نہیں ہے۔ کیونکہ اس طرح کی شادیاں جو معدودے چند ہوتی ہیں اور ہر ملک کے مذہب میں وقوع پذیر ہو سکتی ہیں مگر بھارتی فلم انڈسٹری کو ایسی کوئی فلم بنانے کا حوصلہ نہیں ہوتا جس میں ہیروئین ہندو لڑکی اور ہیرو مسلمان ہوتا ہے۔ حالانکہ بھارت کے اندر بھی ایسی سینکڑوں مثالیں مل جائیں گئی۔ یوں بھی مسلمان لڑکا جب بھی کسی ہندو لڑکی سے شادی کرتا ہے تو اُس کا نصب العین اس کے مذہب کی تذلیل نہیں ہوتا بلکہ محرک صرف محبت ہوتی ہے۔ مگر بھارتی فلم انڈسٹری کوئی ایسا موقع ہاتھ سے جانے نہیں دینا چاہتی جس میں مسلمانوں کے جذبات کو ٹھیس پہنچائی جاسکے اور ان کے رسم و رواج کی تذلیل کی جا سکے۔
آج بھارت کو اس بات کا احساس نہیں کہ وہ پاکسنان دشمنی میں اندھا ہو رہا ہے لیکن جلد ہی اسے معلوم ہو جائے گا اگر اس نے نفرتیں بوئی تو دشمنی ہی کاٹے گا۔
اس وقت مڈل ایسٹ بھارتی فلموں کی ایک بڑی مارکیٹ ہے وہ اس سے کثیر زرمبادلہ کما رہے ہیں جس میں پاکستان بھی شامل ہے۔ ایسی فلمیں بنا کر وہ مسلمان ملکوں کی مارکیٹ سے ہاتھ دھو بیٹھے گا۔
چونکہ بھارتی فلموں کی کھپت پاکستان میں بھی بہت زیادہ ہے۔ اس لئے اگر وہ سمجھتا ہے کہ اس طرح اسلام کی نفی کر کے اور ہندو ازم کا ابلاغ کر کے مسلمانوں کی نوجوان نسل کے دل سے جذبہ ایمانی فنا کر کے انہیں سیکولر محبت یا مدر پدر آزاد محبت کے پلیٹ فارم پر لے آئے گا تو۔
ایں خیال است و محال است و جنوں
پاکستان کی نئی نسلیں بہت با شعور اور محب وطن ہیں اور جذبہ جہاد کی پروردہ ہیں، یقین نہ آئے تو آزما کر دیکھ لے۔ البتہ بھارت کے اندر، اس قسم کی فلمیں بنا کر وہ اپنے لئے ضرور مشکلات پیدا کر لے گا۔ آخر کب تک وہ اسلام کی نفی کر کے بھارت کے بیس پچیس کروڑ مسلمانوں کے جذبات کوٹھیس پہنچاتا رہے گا، اور کب تک بھارت کے مسلمان اپنی نسلوں کی تذلیل دیکھتے رہیں گے۔ مذہب ایک بہت بڑی حقیقت، محبت کا نشہ عارضی ہوتا ہے۔ مذہب کا خمار ہمیشہ کے لئے ہوتاہے۔ مذہب ہی نے مخلوق کو انسانیت کے جامے میں رکھا ہوا ہے۔ دوسرے مذاہب کا مذاق اُڑانا بداخلاقی کی انتہا ہے۔
اس مذاق کو بھارت کے کروڑوں مسلمان کب تک اور کہاں تک برداشت کریں گے اگر”شدھی” کی ان ترکیبوں اور تدبیروں سے تنگ آ کر ایک بار پھر کروڑوں ہندی مسلمانوں نے بھارت کے اندر ایک الگ ”مسلم استھان” کا مطلبہ کر دیا تو کیا ہو گا۔ افسوس کا مقام یہ بھی ہے کہ نئی فلم آپ کو فوراَ ہر ویڈیو سنٹر پر نظر آئے گی۔ شاید کاروبار، مذہب اور ضمیر سے ماوریٰ ہوتا ہے۔

__________________