انصار عباسی

کرکٹر شعیب ملک کا بہنوئی عمران ظفر آخر کار چیخ اٹھا کہ خداکے لیے میڈیا سرکس بند کرو۔ مگر میڈیا کو اس غریب کی یہ بات بھی اچھی نہ لگی اور تقریباً تمام پرائیویٹ ٹیلی ویژن چینلز نے بولنا شروع کر دیا کہ عمران ظفر نے میڈیا کو ڈانٹ دیا۔ وہ غریب تو اس بات پر پریشان تھا کہ ٹی وی کیمرے اب ان کے گھروں اورخوابگاہوں میں گھس گئے ہیں مگر وہاں موجود کچھ صحافی کس ڈھٹائی کے ساتھ اس حقیقت سے منہ موڑ رہے تھے جبکہ میڈیا لمحہ بہ لمحہ شعیب ملک کے گھر کے اندر کی فلم مسلسل چلا رہا تھا۔ ان ٹی وی کیمروں نے تو ہوٹل کے کمرے اور حتیٰ کہ باتھ روم کی ویڈیوز بھی جاری کر دیں جہاں شعیب ملک اور ثانیہ مرزا کو ٹھہرنا تھا۔ وہ دونوں بھی میڈیا کے اس دیوانگی سے پریشاں اور ہراساں نظر آ رہے تھے۔ ثانیہ مرزا توایک موقع پر رو پڑی جبکہ اس کی ماں دھکم پیل میں گر گئی۔ جب ٹی وی چینل دیکھنے والوں کی ایک بڑی تعداد میڈیا کی اس دیوانگی سے تنگ آ چکی ہے تو نجانے جن پر گزر رہی ہے ان کا اصل میں کیا حال ہو گا۔ جب سے شعیب ثانیہ کی شادی کی خبرآئی ہے اس وقت سے الیکٹرانک میڈیا نے پوری قوم کو ایک ہیجان میں مبتلا کر دیا ہے۔ پاکستان کا کوئی بھی مسئلہ، بڑی سے بڑی خبر اور کسی بھی واقعہ کی آج شعیب ثانیہ اسٹوری سے زیادہ اہمیت نہیں ہے۔ اسی دوران اُمہ کے ایک بڑے اور بین الاقوامی شہرت کے حامل مفکر اور اسلامک اسکالر ڈاکٹر اسرار احمد کی وفات بھی ہوئی مگر اس خبر کو الیکٹرانک میڈیا نے شعیب اور ثانیہ کی شادی کی وجہ سے وہ اہمیت دینے کی ضرورت نہ سمجھی جس کا وہ حق رکھتے تھے۔ بلا شبہ ایسے اسکالرز روز روز پیدا نہیں ہوتے۔ الیکٹرانک میڈیا پر ایک ہی سین کو بار بار دکھا کر ایک ایسی کیفیت پیدا کر دی جاتی ہے کہ عام دیکھنے والا بھی ٹی وی چینل بدلنے یا بند کرنے پر مجبور ہونے لگا ہے۔ کبھی خوشی کی خبریں دی گئیں تو کبھی ایسے ایسے اسکینڈل نکالے گئے اور ان کو اس انداز سے پیش کیا جانے لگا جیسے میڈیا کی پوری کوشش ہو کہ یہ شادی نہ ہو سکے۔ ابھی عائشہ صدیقی اور شعیب ملک کی شادی کا مسئلہ حل ہی ہواتھا کہ شعیب ملک کی کچھ غیرملکی عورتوں کے ساتھ قابل اعتراض تصاویر دکھائی جانے لگیں۔ ان تصاویر کو دکھاتے وقت اس بات کا بھی احساس نہ کیا گیا کہ دیکھنے والوں کی اکثریت کا تعلق ایک ایسے ماحول سے ہے جہاں شرم و حیا کو بنیادی حیثیت حاصل ہے۔ یہ تو اللہ کا شکر ہے کہ شعیب ثانیہ کی اس سب کے باوجود شادی ہو گئی۔ اب دیکھنا یہ ہے کہ آیا میڈیا اس بندھن کو قائم و دائم رہنے دیتا ہے کہ اپنی خبر اور سنسنی کی خاطر ان دونوں کا پیچھا کرتا رہے گا۔ شعیب ثانیہ کے ساتھ جو ہو رہا ہے اس کو دیکھ کر مغربی میڈیا سے تعلق رکھنے والے ان Paparazzi( فوٹو گرافر، کیمرہ مین) کا خیال آتا ہے جن کی وجہ سے اور جن سے بھاگتے ہوئے برطانیہ کی لیڈی ڈیانا اور اس کے دوست ڈوڈی الفائد کو 1997ء میں فرانس میں اس ٹریفک حادثہ کا سامنا کرنا پڑا جس نے دونوں کی جان لے لی۔ پوری دنیا میں اس نوعیت کی صحافت کو سخت تنقید کا نشانہ بنایا گیا اور نئے اصول وضع کئے گئے۔ مگر ہم شاید ابھی تک ان حدود کا تعین نہیں کر پا رہے جو ایک خبر، سنسنی اور پھر پاگل پن کے درمیان تفریق کے لئے ضروری ہے۔ جس طرح دہشت گردی کے واقعات کو دکھاتے ہوئے اب ہمارے الیکٹرانک میڈیا نے لاشوں کو دکھانا بند کر دیا ہے اسی انداز میں کچھ دوسری خبروں میں سنسنی اور بے جا Repetition (بار بار دہرانا) کو روکنے کی ضرورت ہے۔ کچھ عرصہ قبل پاکستان کے تمام ٹی وی چینلز نے پاکستانی جیل میں قید سزا یافتہ ایک بھارتی جاسوس کشمیر سنگھ کی رہائی اور ہندوستان کے حوالے کئے جانے کی خبر کو اس انداز میں پیش کیا جیسا کہ کوئی بہت بڑا ہیرو جیل سے رہائی پا کر اپنے ملک واپس جا رہا ہے۔ تقریباً دو روز تک ٹی وی اسکرینز پر کشمیر سنگھ چھایا رہا۔ بار بار گھنٹوں تک اس کی جیل سے نکلتے ہوئے فلم دکھائی جاتی رہی۔ بھارت میں موجود اس کے گھر والوں کے انٹرویوز دکھائے گئے۔ کئی بار کشمیر سنگھ کو حکومت پاکستان اور پاکستانی عوام کا شکریہ ادا کرتے دکھایا گیا اور یہ بھی بتایا گیا وہ مسلمان ہو چکا ہے۔ سر پر سفید ٹوپی پہنے کشمیر سنگھ جونہی اس وقت کے ایک پاکستانی وزیر کے ساتھ اپنے ملک ہندستان پہنچا تواس نے نہ صرف یہ اعلان کیا کہ وہ سکھ تھا، سکھ ہے اور سکھ رہے گا بلکہ اس بات کا بھی اعتراف کیا کہ اس کو جاسوسی کے لئے پاکستان بھیجا گیا تھا۔ یہ سب سن کر ہمارے میڈیا کی سٹی گم ہو گئی اور کچھ شرمندہ شرمندہ انداز میں یہ خبریں سرسری انداز میں چلائی گئیں۔ یہ ایک اور المیہ تھا کہ بھارتی جاسوس کی ایک ہیرو کی طرح پاکستان سے ہندوستان واپسی کے چند روز کے اندر اندر بھارتی جیل میں قید ایک پاکستانی کی لاش پاکستان کے حوالے کی گئی۔ اس پاکستانی قیدی کو تشدد کر کے مارا گیا تھا مگر اس واقعہ کی کوریج کو کشمیر سنگھ کی کوریج کے مقابلہ میں کوئی زیادہ اہمیت نہ ملی۔ یہی کچھ گزشتہ سال سوات سے متعلق مبینہ اس ویڈیو کیساتھ ہوا جس میں ایک لڑکی کو سرعام کوڑے مارتے ہوئے دکھایا گیا۔ عوامی نیشنل پارٹی کی حکومت نے سپریم کورٹ آف پاکستان کو یہ لکھ کر دیا کہ وہ ویڈیو جعلی تھی۔ یہی کچھ اس وقت کے کمشنر سوات نے لکھا اور کہا مگر اس متنازعہ فلم کو کئی روز کئی ہفتے چلایا جاتا رہا جیسا کہ وہ ایک اٹل حقیقت اور مکمل سچ پر مبنی تھی۔ حال ہی میں اس وڈیو کے جعلی ہونے کی پھر خبریں شائع ہوئیں اگرچہ ابھی اس کی تصدیق ہونا باقی ہے۔

اس بات میں کوئی شبہ نہیں کہ پاکستان کے الیکٹرانک میڈیا نے گزشتہ سات آٹھ سالوں میں عوام میں زبردست آگاہی پیدا کی اور پاکستان میں جمہوریت کی واپسی، کرپشن کے خاتمہ اور آزاد عدلیہ کے حصول کے لئے ایک ایسا کردار ادا کیا کہ عوام نے ڈراموں، فلموں اور غیرملکی چینلز کو دیکھنے کی بجائے اپنے ملک کے نیوز چینلز کو دیکھنا شروع کر دیا۔ مگرپاکستان کے موجودہ حالات کی بہتری، عوام کے مسائل اور نت نئے جنم لینے والے سیاسی اور سماجی بحرانوں کے حل کے لئے پاکستانی میڈیا کو ابھی بہت اہم کردار ادا کرنا ہے تاکہ لوگوں کی زندگیوں کو آسودہ حال بنایا جا سکے، کرپشن کا خاتمہ کیا جا سکے، گڈگورننس کا حصول ممکن بنایا جا سکے، اداروں کو مضبوط بنایا جا سکے اور ایک ایسی جمہوریت کا نفاذ ممکن بنایا جا سکے جس کے ثمرات ایک مخصوص طبقہ اور چند خاندانوں کی بجائے عوام کو حاصل ہو سکیں۔ اس کے لئے میڈیا پر عوام کے اعتماد کا قائم رہنا نہایت ضروری ہے۔ ایسا نہ ہو کہ عوام عمران ظفر کی طرح چیخ اٹھیں کہ خدا کے لیے میڈیا سرکس بند کرو۔

روزنامہ جنگ۔

__________________


http:// haroonazam.wordpress.com

ھارون اعظم کا بلاگ۔