پرواز رحمانی
ایڈیٹر دعوت دہلی

طالبان اور پاکستان

’’انتہا پسند گروپ اب اپنا جال ملک کے دوسرے حصوں تک پھیلا رہے ہیں۔ اب ہمارے سامنے دو راستے ہیں ،یا تو ملک کو طالبان کے حوالے کردیں یا ان کا مقابلہ کریں۔‘‘ پاکستانی وزیر داخلہ رحمان ملک نے یہ بات 30مارچ کی شام اسلام آباد میں میڈیا کے رپورٹروں سے کہی۔ (دی ہندو31مارچ) گویا وزیر نے تسلیم کرلیا کہ صبح واگھا بارڈر کے قریب پاکستان کی پولیس اکیڈمی پر ہونے والے حملے کے لئے طالبان ذمہ دار ہیں۔ ویسے ہندوستانی میڈیا سمیت عالمی میڈیا نے دنیا کو یہ بات پہلے ہی بتا دی تھی اور اس تیزی کے ساتھ بتائی تھی کہ کسی کا ذہن کسی اور طرف جاہی نہیں سکتا تھا۔ رحمان ملک نے صرف اس کی تصدیق کی۔ اور یہ تصدیق امریکی منصوبے کے عین مطابق تھی اس لئے کہ امریکہ نے طالبان کے نام سے ایک نیا دشمن تیار کرلیا ہے۔ عراق کو تباہ کرنے کے بعد اپنی پوری قوت پاک افغان سرحد پر جھونک دی ہے تاکہ ان دونوں ملکوں کو بین الاقوامی سازشوں کا مرکز بنانے کے ساتھ ساتھ پورے ایشیا کو کنٹرول کرسکے۔ اسامہ بن لادن، القاعدہ اور اس کے فرضی ٹیپ دیکھنے سے دنیا عاجز آرہی تھی۔ اس لئے طالبان کی صورت گری کی گئی ہے۔

یہ وفاداری قابل فہم ہے

امریکہ کے ساتھ پاکستان کی یہ وفاداری اچانک یا غیر متوقع نہیں ہے، اس کی پالیسی کے مطابق ہے۔ ۱۱ستمبر 2001ء کو نیویارک پر’’القاعد کے حملوں‘‘ کے بعد امریکہ نے دہشت گردی کے خلاف عالمی جنگ کا بگل بجایا تھا اور پاکستان اِس جنگ میں اس کا ’’حلیف‘‘ بن گیا تھا یہ جانتے ہوئے بھی کہ دہشت گردی سے امریکہ کی مراد کیا ہے۔ یعنی اصلاً یہ جنگ کس نظریہ حیات کے خلاف ہے۔ اس کے ساتھ ہی پاکستان اپنی ، علاقائی سالمیت اوراقتدار کی حمیت سے دستبردار ہوگیا تھا۔ پاکستانیوں نے امریکہ کے محض اِس وعدے کے عوض کے وہ ان کی ایٹمی تنصیبات کی حفاظت کرے گا، اپنی قومی غیرت کو امریکہ کے ہاتھ گروی رکھ دیا تھا۔ اس کے بعد سے وہ امریکہ کی ہر جارحیت برداشت کرتے چلے آرہے ہیں۔ اس کی ہر بات پر آمنا وصدقنا کہہ رہے ہیں۔ وہ جو جرم قبول کرنے کو کہتا ہے، کرلیتے ہیں۔ پاکستانی سرحدوں کا حال یہ ہے کہ کوئی بھی روک ٹوک جاکر کچھ بھی کرسکتا ہے۔ پاک ۔افغان سرحد پر ہزاروں امریکی فوجی موجود ہیں جن میں موساد کے ایجنٹوں کی موجودگی ہر شبہ سے بالاتر ہے۔ یہ ایجنٹ مقامی بدقماشوں کو پاکستان میں کہیں بھی استعمال کرسکتے ہیں۔

طالبان کون ہیں

اور طالبان کا قصہ یہ ہے کہ یہ افغانستان کے دینی مدارس کے طلبہ تھے جنہوں نے سوویت یونین کے انخلا کے بعد اقتدار کے لئے مسلم تنظیموں کی رسہ کشی کو دیکھتے ہوئے مداخلت کی تھی اور اقتدار پر قبضہ کرلیا تھا۔ چونکہ یہ طالبان اسلامی اجتماعیت کے قائل اور ہر اخلاقی برائی کے خلاف تھے، مغرب کی آبروباختہ تہذیب کو برداشت نہیں کرتے تھے اس لئے امریکہ ان کا دشمن بن گیا تھا۔ امریکی دشمنی میں شدت اُس وقت پیدا ہوئی جب طالبان نے بن لادن کو بغیر کسی ثبوت کے امریکہ کے حوالے کرنے سے انکار کردیا۔ امریکہ ابتداء میں تو طالبان کو القاعدہ کے ساتھ جوڑ کر چیخ پکار کرتا تھا۔ اب اس نے القاعدہ کی جگہ طالبان کو دے دی ہے اور طالبان کے نام پر تمام باعمل مسلمانوں کی کردار کشی کی عالمگیر مہم چلا رہا ہے۔ باعمل اور غیور مسلمانوں کے خلاف امریکہ کا یہ پروپیگنڈا اتنا طاقتور اور موثر ہے کہ دنیا کے اَن پڑھ اور سیدھے سادے عوام ہی نہیں تعلیم یافتہ اور منصب دار افراد بھی اس سے متاثر ہیں۔ اس کی تازہ ترین مثال ہندوستانی سپریم کورٹ کے جج مارکنڈے کاٹجو کا وہ ریمارک ہے جو انہوں نے ایک مسلم طالب علم کی ڈاڑھی کے مقدمہ میں دیا ہے ’’ہم اِس ملک میں طالبان نہیں چاہتے۔‘‘ پاکستانیوں کو مبارک ہو، ان کے طالبان کے خلاف ماحول بن رہا ہے۔

__________________