عدنان سے میرا تعلق ذاتی ہے۔ وہ مجھ سے عمر میں کوئی آٹھ سال چھوٹا ہے۔ اس نے میرا ایسے خیال رکھا ہے جیسے کوئی ذمہ دار چھوٹا بھائی ایک لاابالی اور پرعیب بڑے بھائی کو دنیا سے بچاتا ہے، اسے سنبھالتا ہے، اس کی غلطیوں کی تلافی کرتا ہے اور ان پر پردہ ڈالتا ہے۔ اس کی خدمت کرتا ہے اور سب سے بڑھ کر اسے بے پناہ عزت اور محبت سے سرفراز کرتا ہے۔
فارسی کی کہاوت ہے ’سگ باش برادر خورد مباش‘ غازی صلاح الدین صاحب نے اس میں ترمیم کی ہے اور ترمیم شدہ کہاوت میرے اور عدنان کے تعلق پر صادق آتی ہے، ’سگ باش برادر سگ مباش‘۔ ایک وقت وہ آیا کہ جب میرے پاس سر چھپانے کو ٹھکانہ نہ تھا۔ عدنان کے کتب خانے میں جا براجمان ہوا اور ہفتوں گزار دئے۔

میری اچھی بری انگریزی نظموں کا انتخاب کرکے اسی نے چھپوانے کا انتظام کیا۔ مشکل دنوں میں جذباتی سہارا دیا۔ بنیادی طور پر نہایت کم گو اور کم آمیز ہونے کے باوجود مجھ پر اپنے اندرون کے کچھ درد ضرور وا کر دئے، اعتماد کیا۔

8 اکتوبر 2005 کو آنے والے ہیبت ناک زلزلے کے بعد ایک روز اس کے گھر میں بیٹھے بیٹھے میں نے پریشان حال بچوں کے ساتھ کام کرنے کا مبہم سا خیال پیش کیا۔ عدنان نے ایک سال تک کلی طور پر رضاکارانہ کام کیا اور محنت شاقہ کے ذریعے اس مبہم خیال کو ایسا عملی جامہ پہنایا جو مثال بنا۔

29 ستمبر 2007ء سے پہلے میں نے یہ سب اس طرح سے نہیں سوچا تھا۔ اس دن عدنان نے جو تکلیف اٹھائی اس سے مجھ میں اس کے لیے خاص احساس تشکر نے جنم لیا۔ اب میں ببانگ دہل یہ اعلان کر سکتا ہوں کہ میرا چھوٹا بھائی عدنان ستار ایک اعلٰی مقصد کے حصول کے لیے، پاکستان کے مفلوک الحال عوام کے لیے، جمہوریت، انصاف اور انسانی حقوق کے لیے اپنی ذات کو پہنچنے والے کسی بھی نقصان کو برداشت کر سکتا ہے۔ مجھے اس پر ناز ہے۔

9 مارچ کو ایسا کیا ہوا تھا کہ اس جیسا کم سخن گلا پھاڑ کر نعرے لگانے لگا۔ منصف اعلٰی کی بحالی کی تحریک میں اس نے عملاً حصہ لیا اور ان سے لڑ پڑا جو اسے روکتے تھے۔ اس نے جلوسوں میں شرکت کی، نعرے لگائے، بھوکا، پیاسا سڑکوں پر دیوانہ وار پھرتا رہا۔

جب جمہوریت اور شہری حقوق کے متقاضی پرامن اور نہتے مظاہرین پر اسلام آباد پولیس حملے کے نتیجے میں عدنان کے ہاتھ اور پاؤں کی ہڈیاں ٹوٹیں تو اس کو غم صرف اس بات کا تھا کہ اگلے دن نکلنے والے جلوس میں اس کی شرکت مشکل ہے۔

واضح رہے کہ اس کے کوئی سیاسی عزائم نہیں، وہ کسی سیاسی جماعت، کسی غیرسرکاری تنظیم، کسی ادارے یا گروہ سے وابستہ نہیں۔ وہ اب کئی برس سے پیشہ ور صحافی بھی نہیں رہا۔ اسے اچھی طرح معلوم ہے کہ اس کی کوئی خبر، کوئی تصویر یا کسی جلسے سے خطاب کا دعوت نامہ اگلے دن نہیں آئے گا۔ پھر اس کو کیا پڑی تھی؟

عدنان ستار پہلے صرف شاعری کرتا تھا، اخباری مضمون کبھی کبھار لکھتا تھا، کتابیں پڑھتا تھا اور فلمیں دیکھتا تھا۔ زیادہ تر چپ رہتا تھا۔ اب وہ چیخ اٹھا ہے۔ اس کی چیخ مفاد پرست سیاستدانوں اور موقع پرست سماجی رہنماؤں کی تقریروں پر بھاری ہے۔ یہ چیخ ایک بے لوث پاکستانی کی چیخ ہے۔ مجھے یقین ہے کہ یہ چیخ ارباب اقتدار، تاجر پیشہ سپہ سالاروں اور ان کے لیے کرائے پر کام کرنے والے منشیوں کے ایوانوں کو زمیں بوس کر دے گی۔

عدنان ستار اور اس جیسے لاکھوں سادہ دل لوگوں کی اس چیخ کے بطن سے ایک نئی سیاسی تحریک اور سماجی تبدیلی کا جنم ہوگا۔ یہ کھری، بے باک اور نڈر چیخ، عدنان ستار کا نعرہ مستانہ، اہل ہوس اور اہل ستم کے لیے سب سے بڑا خطرہ ہے۔


بی بی سی