مصنف رﺅف طاہر بشکریہ وماخذ: نوائے وقت
لنک
دانشورانِ شہر کے ساتھ اس نشست میں لیاقت بلوچ سے عمران خان کے دھرنا میں شرکت سے متعلق استفسار کیا گیا تو انہوں نے کہا، اعجاز چوہدری نے اس کے لئے باقاعدہ دعوت دینے منصورہ آنا تھا لیکن ہمیں انتظار ہی رہا۔ (پھر ہنستے ہوئے) ریمنڈ ڈیوس کے خلاف احتجاج میں تحریک انصاف، جماعت اسلامی اور جماعت الدعوہ کا اشتراک شاید کسی زور آور کو ناگوار گزرا ہو اور اب یہی چیز جماعت سے گریز کا سبب بن گئی ہو۔ لیاقت صاحب کا دعویٰ تھا کہ کئی اور کاموں کی طرح پاکستان میں لانگ مارچ اور دھرنا سیاست بھی جماعت اسلامی ہی نے متعارف کرائی تھی۔ اس پر ہمیں 1996ءکے وسط میں، کرپشن کے خلاف قاضی صاحب کا دھرنا یاد آیا، جب راولپنڈی میں پولیس کے ساتھ تصادم میں جماعت کے 2 کارکن بھی جاں بحق ہو گئے تھے لیکن ہر نیک کام میں کیڑے نکالنے (بلکہ کیڑے ڈالنے) والے اس موقع پر بھی باز نہ آئے۔ حالانکہ یہ محض اتفاق تھا کہ یہی وہ دن تھے جب فاروق لغاری (مرحوم) کے ایوان صدر اور بے نظیر صاحبہ کے پرائم منسٹر ہاﺅس میں کشیدگی انتہا کو پہنچ گئی تھی۔ جناب صدر حکومت کی برطرفی کا فیصلہ کر چکے تھے اور اس کے لئے ساز گار ماحول کا انتظار تھا۔ ”نااہل، کرپٹ اور سیکورٹی رسک“ حکومت سے نجات کے لئے ایوانِ صدر کو اسٹیبلشمنٹ کی تائید بھی حاصل تھی۔ ان ہی دنوں جناب صدر کے ساتھ قاضی صاحب کی ملاقات کی خبر بھی آئی تھی۔ ایوان صدر کے کسی غیر ذمہ دار ترجمان نے جس کی تصدیق لیکن خود قاضی صاحب نے اس کی بھرپور تردید کر دی تھی۔
لیاقت بلوچ کا کہنا تھا، کیونکہ ڈرون حملوں کے خلاف ہمارا کاز مشترک ہے اس لئے مرکزی سطح پر تو نہیں، لیکن مقامی طور پر جماعت ضرور اس میں شرکت کرے گی (علامتی شرکت)۔ اور پھر ٹی وی سکرینوں پر جماعت کے صوبائی امیر سینیٹر پروفیسر ابراہیم خان سٹیج پر، عمران خان کے ساتھ نظر تو آئے، لیکن تحریک انصاف والوں کا کہنا ہے کہ وہ جن دو اڑھائی سو کارکنوں کے ساتھ آئے تھے، تقریر کے بعد ان ہی کے ساتھ واپس چلے گئے۔
ڈرون حملوں کے خلاف پوری قوم یک آواز ہے، یہ بلاشبہ ایک قومی کاز ہے چنانچہ بعض ناقدین کا کہنا ہے کہ عمران خان کو اس کے لئے دیگر جماعتوں کی قیادت سے بھی باقاعدہ رابطہ کرنا چاہیے تھا تاکہ اس موقع پر عوامی جذبات اور قومی احساسات کا تاریخی اظہار ہوتا لیکن خان نے اسے اپنی مقبولیت اور سیاسی طاقت کا اظہار کا ذریعہ بنانے کی کوشش کی اس کے لئے پنجاب اور خیبر پی کے میں کئی روز سے مہم جاری تھی۔ تو کیا وہ اپنی سیاسی طاقت کا بھرپور مظاہرہ کر پائے؟ (جاری ہے)
میڈیا میں خان کے پروموٹر کی شہرت رکھنے والے کالم نگار کے مطابق، خان کو 40 ہزار افراد کی توقع تھی، لیکن شرکاءکی تعداد کے جو تخمینے لگائے جا رہے ہیں، وہ تین سے دس ہزار کے لگ بھگ ہیں، جبکہ تحریک انصاف کے ایک صداقت شعار رہنما نے اسے فون پر بتایا کہ رات کو، جب موسم ٹھنڈا ہو گیا تھا، شرکاءکی تعداد آٹھ ہزار تک پہنچ گئی تھی۔ ایک سینئر مبصر کے خیال میں شرکاءمیں 60 فیصد وہ تھے جو قبائلی علاقوں سے آئے تھے، تو کیا خان پورے پنجاب اور خیبر پی کے سے صرف تین، ساڑھے تین ہزار لوگوں کو نکال پایا؟ حالانکہ ہمارے دوست فاضل کالم نگار تو اپنے ہر کالم اور ٹاک شو میں خان کی مقبولیت کے غبارے میں ہوا بھرتے رہتے ہیں اور خیبر پی کے میں تو ان کی مقبولیت کو بے حد و حساب بتاتے ہیں۔ ایک رائے یہ ہے، خاصی معقول اور صائب رائے، کہ کسی لیڈر یا جماعت کی مقبولیت کا حقیقی پیمانہ تو انتخابات ہی ہوتے ہیں اور اس حوالے سے حقائق یہ ہیں کہ1997ءکے الیکشن میں، جب تحریک انصاف نے قومی اسمبلی کی بیشتر نشستوں پر اپنے امیدوار کھڑے کئے اور خان خود بھی کوئی درجن بھر نشستوں سے امیدوار تھے، ملک بھر میں تحریک کے ووٹوں کی مجموعی تعداد (متناسب نمائندگی کی صورت میں) اسے ایک نشست بھی نہیں دلا سکتی تھی۔
اکتوبر2002ءکے الیکشن میں جب دونوں بڑی سیاسی جماعتوں کی قیادت جلاوطن تھی، ڈکٹیٹر کی سرپرستی کے باوجود خان صاحب صرف اپنی ایک نشست نکال پائے۔ 2008ءکے عام انتخابات کا انہوں نے بائیکاٹ کیا لیکن ضمنی انتخابات کے میدان میں کود پڑے۔حلقہ55 (راولپنڈی) میں ان کے امیدوار کو صرف سوا تین ہزار ووٹ ملے۔ (حالانکہ عام انتخابات میں، آزاد امیدوار کے طور پر اس نے دس، بارہ ہزار ووٹ حاصل کر لئے تھے) یہاں مسلم لیگ (ن) کے شکیل اعوان کو 61 ہزار اور شیخ رشید کو ایوانِ صدر اور پیپلزپارٹی کی بھرپور حمایت کے ساتھ تقریباً 40 ہزار ووٹ ملے۔ لاہور کے حلقہ 123کے ضمنی انتخاب میں تحریک انصاف کے میاں حامد معراج کو 14 ہزار ووٹ ملے۔ ان میں عمران خان اور ان کی تحریک انصاف کا کتنا حصہ تھا اور میاں حامد معراج کی برادری اور ان کے مرحوم والد کے طویل سیاسی کیریئر کا کتنا حصہ؟ یہاں مسلم لیگ (ن) کے پرویز ملک نے 40 ہزار سے زائد ووٹ حاصل کئے۔ لاہور میں صوبائی اسمبلی کے جس ضمنی انتخاب کو خان کی ٹھاٹھیں مارتی ہوئی مقبولیت کے ثبوت کے طور پر پیش کیا جاتا ہے، یہاں بھی مسلم لیگ (ن) جیتی، البتہ خان کے امیدوار نے بھی یہاں قابل ذکر تعداد میں ووٹ حاصل کئے(شاید سولہ، سترہ ہزار)۔ اس کے لئے خود خان نے گلی گلی مہم چلائی۔ انہیں چھوٹی چھوٹی کارنر میٹنگز سے خطاب میں بھی عار نہ تھی۔ یہاں ان کے امیدوار 2002ءکا قومی اسمبلی کا الیکشن پیپلز پارٹی کے ٹکٹ پر جیتے تھے اور بے وفائی کرکے مشرف کے ”پیٹریاٹ“ ہو گئے۔ 2008ءکے الیکشن میں گھر بیٹھے رہے۔ صوبائی اسمبلی کے ضمنی انتخاب میں تحریک انصاف کے امیدوار بنے تو انہیں پیپلز پارٹی کی بھرپور تائید حاصل تھی۔ ان کے سسر ملک کرامت علی کھوکھر2008ءکے الیکشن میں (پیپلز پارٹی کے ٹکٹ پر) یہاں دوسرے نمبر پر تھے اور اب وہ اپنے داماد کو مکمل سپورٹ کر رہے تھے۔ ہمیں یہ اعتراف کرنا چاہیے کہ مسلم لیگ (ن) جیت تو گئی لیکن اس کے حق میں پہلے جیسا جوش و خروش نظر نہیں آیا جس کے اسباب پر مسلم لیگ کی قیادت کو یقینا غورو خوض کرنا چاہیے۔ ہمیں یاد نہیں پڑتا کہ ان چند نشستوں کے سوا تحریک انصاف نے کسی اور ضمنی انتخاب میں قسمت آزمائی کی ہو۔
کہا جاتا ہے اور اس میں حقیقت بھی نظر آتی ہے کہ خان کی اصل مقبولیت نوجوانوں میں ہے۔ اس موقع پر ہمیں مولانا امین اصلاحی (مرحوم) سے منسوب ایک بات یاد آتی ہے۔ کسی نے مولانا سے پوچھا، آپ نے جماعت اسلامی کیوں چھوڑ دی حالانکہ یہ انسان کو عقل اور شعور دیتی ہے؟ مولانا نے جواب دیا، جی ہاں! اور جب عقل آ جاتی ہے تو آدمی جماعت کو چھوڑ دیتا ہے۔ تو کیا خان کا معاملہ بھی کچھ ایسا ہی ہے کہ جب نوجوان ووٹ دینے کی عمر کو پہنچتے ہیں تو وہ خان کے ووٹر نہیں رہتے۔
بعض نکتہ چینوں کے خیال میں، ڈرون حملے تو ایک عرصے سے ہو رہے ہیں۔ زرداری، گیلانی حکومت کے ان تین برسوں میں تو ان کی تعداد سینکڑوں تک پہنچ گئی، تو پھر خان کو ان کا خیال اب کیوں آیا؟ وہ اسے آرمی چیف جناب اشفاق پرویز کیانی کے اس تندوتیز بیان سے بھی جوڑتے ہیں جو انہوں نے ریمنڈ ڈیوس کی رہائی کے فوراً بعد قبائلی جرگے پر ڈرون حملے پر دیا۔ ڈرون حملوں کے خلاف یہ پاکستانی سپہ سالار کا پہلا بیان تھا۔ اور اب تو آئی ایس آئی اور امریکی سی آئی اے میں اعصابی کشمکش محاذ آرائی میں بدل چکی ہے۔ پس پردہ معاملات جو بھی ہوں، اس قومی کاز پر پوری قوم کو اتحاد و اتفاق کا بھر پور مظاہرہ کرنا چاہیے۔ کاش! عمران خان بھی پولیٹیکل پوائنٹ سکورنگ اور اپنی طاقت (؟) کے مظاہرے کی بجائے سب کو ساتھ لیکر چلنے کا اہتمام کرتے۔
............

__________________