ہندوستان کے زیر انتظام جموں و کشمیر میں اپنی نوعیت کے پہلے واقعہ میں مشتعل ہجوم نے ایک لڑکی کے ساتھ مبینہ طور پر جنسی زیادتی کرنے کی کوشش پر فوج کے دو جوانوں کو برہنہ پریڈ کروائی ہے۔
ریاستی پولیس نے فوج کے دونوں جوانوں کو گرفتار کر لیا ہے۔ ضلع بانڈی پورہ کے پولیس سربراہ وپلو کمار نے بی بی سی کو بتایا کہ دونوں فوجیوں کے خلاف جنسی زیادتی کی کوشش کرنے کا مقدمہ درج کیا گیا ہے۔

تاہم فوج کے ایک ترجمان کرنل منجندر سنگھ کا کہنا ہے کہ دونوں فوجی گاؤں میں خفیہ معلومات حاصل کرنے کے لیے گئے تھے۔ بقول ان کے بعض سخت گیر افراد ان دونوں جوانوں پر غلط الزام لگا کر مقامی آبادی کو مشتعل کرنے کوشش کی کر رہے ہیں۔

مقامی افراد نے الزام عائد کیا ہے کہ سادہ لباس پہنے ہوئے فوج کے دو جوانوں نے باندی پورا شہر کے قریب کنان گاؤں کے ایک گھر میں زبردستی داخل ہونے کی کوشش کی۔

ان کا یہ بھی کہنا تھا کہ وہ لوگ شدت پسندوں کی طرح گھر والوں سے خوراک اور پناہ کا مطالبہ کر رہے تھے اور اسی دوران انہوں نے ایک لڑکی کے ساتھ زبردستی جنسی زیادتی کی کوشش کی لیکن اس لڑکی نے شور مچانا شروع کر دیا جس پر آواز سن کر اس کے پڑوسی لڑکی کی مدد کرنے وہاں پہنچ گئے۔

مشتعل گاؤں والوں نے پہلے تو فوجی جوانوں کو پیٹا اور پھر برہنہ کرنے کے بعد منہ کالا کر کے ان کے بال کاٹ دیے اور بازار میں پریڈ کروائی۔ ہزاروں افرادنے فوج کے خلاف نعرے لگاتے ہوئے شہر میں مارچ کیا۔ مشتعل ہجوم کو منتشر کرنے اور فوج کے دونوں جوانوں کو اپنے قبضے میں لینے کے لیے پولیس کو آنسو گیس کے گولے اور ہوا میں گولیاں چلانی پڑیں۔ پولیس ایکشن میں تیس سے زائد شہری زخمی ہوگئے ہیں۔

ضلع میں لوگوں کی ایک بڑی تعداد، جن میں اکثر خواتین اور بچے ہیں، فوج کے خلاف مطالبہ کرتی رہی ہے کہ ضلع کی ایک بستی سے متصل ایک فوجی کیمپ کو ہٹایا جائے۔
بی بی سی