درجہ بندی: (1 votes - 4.00 average)

وفاقی دارالحکومت میں لال مسجد اور اس سے منسلک مدرسوں کے طلبہ اور طالبات ایک مرتبہ پھر ایکشن میں آئی ہیں اور سنیچر کی رات ایک چینی بیوٹی اور مساج سینٹر پر چھاپے میں نو افراد کو جن میں چھ غیرملکی لڑکیاں بتائی جاتی ہیں اغوا کر لیا ہے۔
تاہم مسجد و مدرسے کے طلبہ اور طالبات کی جانب سے جاری کیئے گئے ایک مختصر بیان میں کہا گیا ہے کہ انہیں اغوا نہیں کیا گیا بلکہ مساج سینٹر میں موجود چھ غیرملکی لڑکیوں اور تین مردوں کو سمجھانے کے لیئے لے کر آئے ہیں۔ البتہ انہوں نے ان افراد کے بارے میں مزید کوئی تفصیل نہیں بتائی۔

طلبہ کے چار سطور کے اس بیان میں الزام لگایا کہ اس سینٹر میں غیرملکی لڑکیاں نامحرم مردوں کو مساج کی آڑ میں گناہ کراتی تھیں۔ ان کا کہنا تھا کہ یہ عمل فحاشی و عریانی کے خلاف ان کا فطری ردعمل ہے۔

پولیس کے مطابق چینی خواتین نے ایف ایٹ کے اس مکان میں آکوپنکچر اینڈ ہیلتھ سینٹر کھول رکھا تھا۔

اسلام آباد پولیس حکام کا کہنا ہے کہ وہ اس کارروائی کے بعد مسجد انتظامیہ سے رابطے کی کوشش کر رہے ہیں۔ تاہم اسلام آباد پولیس کے سربراہ چوہدری افتخار کا کہنا ہے کہ وہ پہلے تو ان افراد کی رہائی کی اپیل کرتے ہیں اور اگر ایسا نہ کیا گیا تو وہ قانون کی عمل داری کے لیئے کارروائی پر مجبور ہوں گے۔

ان کا کہنا تھا کہ یہ ایک انتہائی اقدام ہے جس کو کسی صورت نظرانداز نہیں کیا جاسکتا ہے۔

اسلام آباد کے ایف ایٹ سیکٹر میں واقعے اس بیوٹی سینٹر کے خلاف یہ کارروائی عینی شاہدین کے مطابق رات ساڑھے بارہ بجے کے بعد ہوئی۔ لاٹھیوں سے مسلح تیس طلبہ اور طالبات تین گاڑیوں میں وہاں پہنچنے اور اس سینٹر میں گھس کر انہوں نے ان افراد کو یرغمال بنا لیا۔ بعض اطلاعات کے مطابق طلبہ نے ان افراد کو مارا پیٹا بھی۔

اس تازہ کارروائی کے بعد تاہم لال مسجد کے باہر کوئی غیرمعمولی سکیورٹی انتظام نہیں دیکھا گیا ہے۔ نہ تو پولیس کی کوئی تازہ نفری وہاں تعینات کی گئی ہے اور نہ مسجد کے طلبہ کی جانب سے اپنی سکیورٹی کے لیئے کوئی قدم اٹھایا گیا ہے۔
طلبہ کی جانب سے جاری کی گئی ایک پریس ریلیز میں دلچسپ بات یہ تھی کہ جامعہ فریدیہ، مدرسہ حفصہ کے علاوہ اس کارروائی میں ایک معروف پرائیویٹ انگریزی میڈیم سکول بیکن ہاوس کے طلباء بھی شریک تھے۔

اس تازہ واقع کو صدر جنرل پرویز مشرف کے لیئے ایک نئی مشکل قرار دی جا رہی ہے۔ اس سے قبل بھی لال مسجد انتظامیہ کی جانب سے ایسے اقدامات پر ان کی حکومت نے مذاکرات کو ترجیع دی ہے۔ دیکھنا اب یہ ہے کہ اس مسئلے کے حل کے لیئے وہ کون سی تدبیر اختیار کرتے ہیں۔

حکومت اور لال مسجد انتظامیہ کے درمیان اس سال کے آغاز سے کشیدگی چل رہی ہیں۔ اس کشیدگی کا آغاز مسجد کے طلبہ کی جانب سے چند مساجد کو گرائے جانے کے سرکاری اقدام کے خلاف احتجاج سے ہوا تھا۔

بی بی سی