آج میری نظر سے یہ دھاگہ " اردو تحریر، بول چال میں انگریزی الفاظ کا استعمال " گزرا جہاں زبان و بیان کی بات ہو رہی ہے تو میرے ذہن میں بھی ایک سوال نے سر اٹھا لیا ۔ کہ ہماری اردو زبان میں " تم" اور" آپ" ( پنجابی زبان میں " تو " اور " تسی " ) تشریع سے قطع نظر کہاں اور کیونکر استعمال میں آتا ہے ۔ کیا یہ امارت اور غربت ، طاقت ور اور کمزور ، حاکم اور محکوم ، باس اور ملازم میں فرق واضح نہیں کرتی ۔
مثلا
بچہ ماں ، باپ یا کسی بھی بڑے یا بزرگ کو تم کہہ کر نہیں پکار سکتا ۔ ماسوائے نوکر ۔ مالی ۔ چوکیدار مطلب غربت کے ہاتھوں پریشان انسان ۔
دفتر میں چپڑاسی ،کلرک ، آفیسر رتبہ کے لحاظ سے تم اور آپ کا استعمال کرتے ہیں ۔ مطلب اپنے سے سیاسی ، معاشی ، معاشرتی برتری رکھنے والوں کو تم کہنے میں اخلاقی بندشیں حائل ہیں‌ ۔
دوسرے الفاظ میں تم دوستوں یا اپنے سے کم تر کے لئے استعمال کیا جاتا ہے ۔ جہاں تکلف برطرف نہ ہوا ہو ۔
برابری رکھنے والے ایک دوسرے کو آپ جناب اور فلاں " صاحب " کے صیغے کے ساتھ پکارتے ہیں ۔
اگر کہیں ہم دو افراد کو گفتگو کرتے پائیں ۔ دیکھنے میں دونوں میں فرق کرنا مشکل ہو تو "آپ " کہہ کر مخاطب کرنے والا یقینا ماتحت ہوتا ہے ۔ اور " تم " کہہ کر پکارنے والا آفسر یا معاشرتی لحاظ سے برتری کا حامل ہو گا ۔
سبھی شوہر بیویوں کو "تم" کہہ کر پکارتے ہیں ۔ شوہر" آپ" کہلاتے ہیں چند ایک کو چھوڑ کر ۔ جہاں بیوی طاقتور ہو ۔ یا شوہر برابری کا قائل ہو ۔
پنجابی زبان میں یہی لفظ " تو " اور " تسی " کے استعمال میں آتے ہیں ۔ اور یقینا دوسری علاقائی زبانوں میں بھی ان کا ستعمال مختلف نہیں ہو گا ۔ کہنے کا مطلب یہ ہے کہ یہ اہل زبان کا انداز تکلم نہیں رہ گیا بلکہ اردو سے لے کر علاقائی زبانوں میں بھی رائج ہو چکا ہے ۔ اور معاشرتی بالا دستی اور طبقاتی نظام کی علامت بن چکا ہے ۔
تیس سال پہلے ہمارے گاؤں کے ایک بزرگ نے اپنی بیگم سے کہا کہ مجھےتم " تو " کی بجائے "تسی " کہہ کر پکارا کرو ۔ وہ سیدھی سادھی دیہاتن بولی " تسی " تو بہت سے لوگوں کو کہتے ہیں ۔ اور تم تو اکیلے ہو ۔
سوال یہ ہے کیا زبان کےیہ اتار چڑھاؤ معاشرتی ، سماجی مساوات کی علامت قرار دئیے جا سکتے ہیں ۔ اگر نہیں تو پھر اس معاشرتی طبقاتی نظام کی تقسیم کو برابر کیسے کیا جا سکتا ہے ۔

ارشاد باری تعالی ہے:

يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنثَى وَجَعَلْنَاكُمْ شُعُوباً وَقَبَائِلَ لِتَعَارَفُوا إِنَّ أَكْرَمَكُمْ عِنْدَ اللَّهِ أَتْقَاكُمْ إِنَّ اللَّهَ عَلِيمٌ خَبِيرٌ. (الحجرات 49:13)

اے انسانو! ہم نے تمہیں ایک مرد اور ایک عورت سے پیدا کیا۔ اس کے بعد تمہیں قومیں اور قبیلے بنا دیا۔ بے شک اللہ کے نزدیک عزت والا وہی ہے جو اس سے زیادہ ڈرنے والا ہے۔ بے شک اللہ (ہر ظاہر و پوشیدہ چیز) کا علم رکھنے والا اور خبردار ہے۔

إِنَّمَا الْمُؤْمِنُونَ إِخْوَةٌ. (الحجرات 49:10)

بے شک مسلمان تو بھائی بھائی ہیں۔

رسول اللہ صلی اللہ علیہ واٰلہ وسلم نے خطبہ حجۃ الوداع میں یہی بات واضح طور پر ارشاد فرما دی
اے لوگو! سنو تمہارا رب ایک ہے، کسی عربی کو عجمی پر کوئی فوقیت نہیں اور نہ ہی کسی عجمی کو کسی عربی پر کوئی فضیلت ہے۔ نہ کوئی کالا کسی گورے سے بہتر ہے اور نہ گورا کالے سے۔ فضیلت صرف اور صرف تقویٰ کے سبب ہے۔


آپ کی کیا رائے ہے اس بارے میں ؟

__________________
شائد میرا سفر یہیں تک تھا