السلام علیکم،

ذیل میں کچھ تاثرات ہیں، جو حاصل ہیں‌ میری اپنے کچھ دوستوں‌ سے ہوئی گفتگو کا، عمومی بحث میں اس لئے لگا رہا ہوں‌کہ یہ میرے اور کچھ دوستوں کے ذاتی مشاہدات ہیں، اگر آپ بھی تبادلہ کرنا چاہیں تو سو بسم اللہ

ہماری گفتگو کا حاصل یہ تھا کہ نماز میں خشوع و خضوع کے لیئے ہمیں محنت کرنی چاہیے، اور اس کے لیے ہم ان باتوں‌ پر عمل کر سکتے ہیں

1۔ سب سے اہم تو وہی بات جو حضور پاک صلی اللہ علیہ و آلہ وسلم نے سکھائی جس کا مفہوم ہے، کہ یوں نماز پڑھو جیسے اللہ کو دیکھ رہے ہو، یہ نہ ہو پائے تو یہ یقین رکھو کہ اللہ تم کو دیکھ رہا ہے۔

2۔ نماز کا ترجمہ اچھے سے یاد کرنا چاہیے، اور عربی الفاظ ادا کرتے ہوئے آپ کے دماغ میں الفاظ کا ترجمہ یا مفہوم چل رہا ہو۔

3۔ ایک دوست نے بڑی خوبصورت بات کی کہ نماز کے الفاظ پر غور کریں اور ان کو ایسے ادا کریں جیسے آپ خود اللہ کو وہ مناجات پیش کر رہے ہیں، جیسے اس نے مثال دی کہ سجدے میں ہم کہتے ہیں "سبحان ربی الاعلی "‌ یعنی اے میرے پاک رب تو سب سے اعلی ہے۔ اگر غور کریں تو ہم اپنے رب کو پکار کر کہہ رہے ہیں کہ تیری ذات سب سے اعلی و افضل ہے، اس بات پر بار بار غور کریں ، جس چاہت سے آپ کہیں گے 'میرے رب' ، 'میرے اپنے پیارے رب'، آپ کو اتنا ہی لطف آئے گا ۔۔۔

4۔ کوشش کریں کہ جماعت کی امامت کرایا کریں، جیسے دو یا دو سے زیادہ دوست اکٹھے ہوں تو ایک جماعت کرائے اور دوسری بار موقعہ ملے تو دوسرا دوست جماعت کرائے، اس طرح ہر ایک کو موقع ملے گا جماعت کا اور فائدہ یہ ہوگا کہ امام کو بہت زیادہ توجہ سے جماعت کرانی ہوتی ہے چونکہ سارے نمازیوں کے آپ امام ہوتے ہو، تو نماز میں توجہ کی مشق ہو جاتی ہے۔

5۔ جب اکیلے نماز پڑھ رہے ہوں تو ہلکی سی آواز سے پڑھیں، جو صرف آپ کو سنائی دے۔

یہ محض‌ کچھ مشاہدات ہیں کچھ دوستوں کے ، اگر آپ بھی تبادلہ کریں تو خوشی ہوگی

اللہ سب کو نماز قائم کرنے کی توفیق دے۔