نہ امتحان لو دہشت گردوں اس قوم کا

ایشیاء کے جنوب مغرب میں ایک چھوٹا سا خطّہ ہے جسے بر صغیر کہا جاتا ہے۔ اس خطّے میں مختلف قومیں بستی ہیں اور اس خطّے کی خاص بات یہ ہے کہ اس خطّے میں تہزیب و تمدّن کا خاص خیال رکھا جاتا ہے۔ اس خطّے کے باشندے دنیا کے کسی بھی حصّے میں ہوں، اپنی تہزیب سے، افکار سے اور روایات سے لوگوں کے دل موہ لیتے ہیں۔ اس خطّے میں سر سبز و شاداب وادیاں بھی ہیں ، بر و بحر بھی ہیں، صحرا اور پربت بھی ہیں یا بس یوں کہیے کہ خالق کے مصّوراتی حسن کا ایک اعلی نمونہ اسی ہی حصّے میں پایا جاتا ہے۔

اس خطّے میں فرنگی سامراج نے 1857 میں اپنی کمپنی کے لیے 90 سال کی انتھک محنت کی لیکن آخر کار ان کی حکومت یہاں کے غیور، عارف اور عادل عوام کے آگے اپنے گھٹنے ٹیکنے پر مجبور ہو گئی اور اقتدار کو دو بڑی قوموں کے مابین تقسیم کر کے واپس اپنے ملک چلی گئی۔ اس خطّے کے باشندوں نے دنیا کو بتا دیا کہ وہ ان ہاتھوں کو کاٹ دیں گے جو ان کی بقاء کو للکارے گی۔

اس قوم کی ایک خاص بات یہ ہے کہ اس قوم کے عزم کے سامنے کوئی ٹھہر نہیں سکا۔ یہ قوم دوستوں کی وہ دوست ہے جس کی مثال انصار نے مہاجرین کے ساتھ برتی تھی لیکن یہ قوم اپنے اس دشمن کو معاف نہیں کرتی جو اس کے اثاثوں کو نقصان پہنچائے، آستین میں پلے ہوؤ سانپوں کو یہ قوم ایسا سبق سکھاتی ہے کہ سانپ بھی پناہ مانگے۔ یہ قوم سب کچھ برداشت کر سکتی ہے ، نہیں کر سکتی ہے تو کسی کی اجارہ داری نہیں برداشت کر سکتی ہے

اس قوم پر آجکل کچھ ایسے گھٹا ٹوپ بادل چھائے ہوئے ہیں کہ باوجود روشنی کے، اندھیرے کا گماں ہوتا ہے۔ اس قوم کی راہوں میں ایسے کانٹے بچھائے جا رہے ہیں جہاں دو گام بھی چلنا محال ہے، آزمائش ہے۔ اس قوم اے مقدر پر ایسی لکیریں کھینچی جا رہی ہیں ، جو اس کا مقدر نہیں ہے۔ یہ قوم ایک ایسی ‏ دلاور اور شجاع قوم ہے جو باوجود ان تکلیفوں کے زندگی سے پل پل لڑ رہی ہے اور دنیا میں اپنے ٹھوس کردار کی وہ مثال قا‍ئم کر رہی ہے کہ پردیس میں رہنے والا اپنا ناک دو انج اوپر کر کے ہی جاتا ہے۔


یہ قوم پر عزم قوم ہے جو ان سب تکلیفوں کو زندگی کا تلخ لیکن حقیقی حصّہ سمجھتی ہے۔ اس قوم کے باشندے جتنے پر وقار ہیں اتنے ہی جوشیلے اور سر تا پا محنتی ہیں ۔ اس قوم کو خوش قسمتی ہے کہ اس قوم میں دوسری قومیں بغیر کسی ڈر اور خوف کے رہتی ہیں اور یہ قوم اپنے کردار سے ان کی سالمیت کی ضامن ہوتی ہیں۔

یہ خواب میں نے کل دیکھا تھا، گو کہ خواب مکمل تھا لیکن اس میں ایک چیز نہیں جانج سکا۔ یہ قوم کون سی قوم تھی ؟ اس قوم کا تعلق کس ملک سے تھا؟ اس کے باشندے کیسے تھے؟ اس قوم کی نت نئی تعمیرات کیسی تھیں؟ اور اس قوم کو کس کی دعاوں نے حفظ و اماں میں رکھا ہوا تھا؟ کیا یہ قوم اسلام کے خلاف تھی یا اسلام کے ساتھ؟

ذرا میرے اس خواب کی تعبیر تو بتائیں، اگر ہو سکے