صدر آصف زرداری کا یہ بیان سو فیصد درست ہونے کے باوجود سو فیصد غلط ہے کہ …”عوام جان لیں، پاکستان حالت جنگ میں ہے،“ یہ بیان ملکی صورتحال کو بری طرح”اوور سمپلی فائی“کرنے کے مترادف ہے کیونکہ ایک وقت میں ایک جنگ کا سامنا تو کوئی سانحہ نہیں بلکہ میں تو یہاں تک کہنے کو تیار ہوں کہ ایک ہی وقت میں چار مختلف سمتوں اور محاذوں پر جنگ یعنی چومکھی لڑائی بھی کوئی ایسی لڑائی نہیں جسے لڑایا جیتا نہ جاسکے یا کم از کم انتہائی باوقار طریقہ سے ہارانہ جاسکے، کیونکہ دنیا کے بے شمار جنگی ہیروز ایسے ہیں جوجنگیں ہارنے کے باوجود لیجنڈز کے مقام پر فائز کئے گئے کیونکہ کچھ شکستیں فتوحات سے بڑھ کر ہوتی ہیں لیکن پاکستان کا تومسئلہ ہی کچھ اور ہے کہ اس کے بدن پر جہاں ہاتھ رکھو وہیں ایک گہرا زخم بلکہ ناسور موجود ہے۔ اس ملک کے”لاٹری مارکہ“ حکمران طبقات نے گزشتہ ساٹھ سالوں میں جو گند ڈالا ، جھک ماری…وہ سارے گناہ صغیرہ و کبیرہ … وہ ساری غلطیاں اور سارے جرائم اکٹھے ہوکر سامنے آگئے ہیں۔ حماقتوں، خود غرضیوں، لالچوں، اقتدار پرستیوں، مہم جوئیوں کا اک کوہ گراں ہے اور ٹانگیں مفلوج ،یعنی رینگ رینگ کر یہ کوہ گراں عبور کرنا ہوگا اور اگر کسی معجزے کے تحت ایسا کرنے میں کامیاب ہوبھی گئے تو آگے جہالت، جذباتیت، منافقت اور خباثت کی جہنمی آگ سے دہکتا ہوا اک دریا ہے … ”اک آگ کا دریا ہے اور تیر کے جانا ہے“ جبکہ ہمارے پاس فائر پروف کشتیاں تو کیا سادہ کشتیاں بھی موجود نہیں اور دوسری بات یہ کہ اول تو ہم صدیوں سے تیراکی ہی بھول چکے اور اگر تھوڑا بہت ہاتھ پاؤں مارنا یاد بھی ہو تو یاد رہے کہ ہاتھ پاؤں مارنے کے لئے ”آزاد “ہاتھ پاؤں بہت ضروری ہیں کیونکہ بندھے یا کٹے ہوئے ہاتھوں پیروں کے ساتھ تواچھے سے اچھا تیراک بھی غوطے کھاتا اور بالآخر ڈوب جاتا ہے۔ پاکستان صرف حالت جنگ میں نہیں بلکہ غور کریں تو دائیں سے بائیں ،اوپر سے نیچے سوائے جنگ اور جنگی کیفیات کے اور ہے ہی کچھ نہیں۔ دہکتے ہوئے کوئلوں پر ماتم کے دوران صرف پاؤں کے نیچے ہی انگاروں کا فرش ہوتا ہے لیکن یہاں توالامان الحفیظ…افقی و عمودی اور ان کے درمیانی وقفوں کے ایک ایک سینٹی میٹر سے بھی شعلے لپک رہے ہیں اور کچھ بدبخت اس حالت میں بھی اس آگ کو”بجھانے“ کے لئے پٹرول اور مٹی کا تیل چھڑک رہے ہیں۔
امریکہ کی وجہ سے بھی جنگ
امریکہ کے ساتھ بھی جنگ
نام نہاد اپنوں سے بھی جنگ
غیروں سے بھی جنگ
معلوم سے بھی جنگ
نامعلوم سے بھی جنگ
وہاں کی روشنیوں نے بھی ظلم ڈھائے بہت
میں اس گلی میں اکیلا تھا اور سائے بہت
حریف سے بھی جنگ
اپنے آپ سے بھی جنگ
بارودی گولوں سے بھی جنگ…اور”روشنی کے بے ضرر“گولوں سے بھی جنگ۔ بھکاری بننے پر بھی مجبور اور خود مختاری کابھی شوق، جس ”کوبرے“سے ڈسے گئے اس سے کوبرا ہیلی کاپٹرز ملنے پر بغلیں بھی بجارہے ہیں…جس سے سرحدوں کا تقدس بچارہے ہیں…اسی سے اور اس کے پروردگان سے معیشت بچانے کی التجائیں بھی ہورہی ہیں … کیا کبھی کسی نے کوئی ایسا گداگر دیکھا جس نے اپنا کشکول ڈانگ کے ساتھ باندھ رکھا ہو؟خیر خیرات کے لئے پھیلے ہوئے ہاتھ …اٹھ نہیں سکتے، اسی لئے ابتدائی ایام کے اک بزرگ چودھری محمد علی نے وارننگ دی تھی۔ ”قرضہ کلچر سے پرہیز کرو ،ورنہ اک ایسا وقت آئے گا کہ تمہیں قرضے چکانے کے لئے قرضے لینے پڑیں گے“۔ (مفہوم)ہم خوش ہیں کہ فرینڈز آف پاکستان نے کنسورشیم بنادیا کہ اب ہمارے لئے بین الاقوامی سطح پر ”چندہ“ اکٹھا کیاجائے گا۔
”تو شاہیں ہے بسیرا کر پہاڑوں کی چٹانوں پر“
لیکن کیا کریں بھائی!عملی زندگی میں شاہینوں اور انسانوں میں بڑا فرق ہوتا ہے۔ شاہین کپڑے لتے اور پانچ مرلہ سکیم سے بے نیاز، مارپیٹ کے بعد کمزور پرندوں کا قتل کرکے اپنا پیٹ بھر لیتا ہے…انسانوں کو سو جتن کرنے پڑتے ہیں، ان کے لئے UNO بھی ہے،IMF بھی، ورلڈ بینک بھی…WTO بھی اور کنسورشیم بھی کہ شاہینوں کے درمیان ایسے کوئی تکلفات نہیں ہوتے اور یہ بھی انسان ہی ہے جسے بین الاقوامی برادری کے کسی معزز کی بیش قیمت گاڑی کا بند شیشہ کھٹکھٹا کر”امداد“ کی درخواست کرنی پڑتی ہے۔مختصراً یہ کہ پاکستان صرف حالت جنگ میں نہیں …سرتاپا جنگ ہے اور ہر جنگ کی جڑیں اور پنیریاں ہم نے خود لگائی ہیں۔ غربت کے خلاف جنگ، بے روزگاری کے خلاف جنگ، انرجی کرائسز کے خلاف جنگ،جہالت جذباتیت کے خلاف جنگ، پانی اور زراعت کی بحالی کے لئے جنگ، نمود و نمائش ،اسراف، رشوت، اقرباء پروری اور حصول انصاف کے لئے جنگ، مردہ اداروں کو از سر نو زندہ کرنے کی جنگ، مہنگائی ،ملاوٹ، ذخیرہ اندوزی اور دو نمبری کے خلاف جنگ، سیاسی اجارہ داریوں کی جنگ وغیرہ وغیرہ وغیرہ۔
ایک ملک اور اتنی جنگیں؟
جنگجو کو ن ہے؟
سامان حرب کہاں ہے؟
سپاہ کیسی ہے؟
سپہ سالار کون ہے؟
میر سپاہ نارسا لشکریاں شکستہ صف
ہائے وہ تیر نیم کش جس کا نہ ہو کوئی ہدف

از حسن نثار

__________________