ہم کیسی بدنصیب قوم ہیں کہ ہمیں غیر بھی باور کروانے چلے آتے ہیں کہ ہمارا وجود خطرات سے دوچار ہے۔ کس دِل سے ہم یہ سن اور سہہ لیتے ہیں کہ آنے والے وقتوں میں خدانخواستہ ’’ہماری داستان تک نہ ہو گی داستانوں میں‘‘یہ اُس مملکتِ خداداد کے متعلق ہرزہ سرائی ہے، جس کی بنیادوں میں لاکھوں مسلمانوں کے لہو کی سرخی بھی ماند نہیں پڑی۔ ابھی تو وہ آنکھیں کھلی ہیں جو مسلمان بیٹیوں کو نوچنے والے درندوں کی شناخت رکھتی ہیں ابھی تو بڑی بوڑھیوں کے وہ بین بھی زندہ ہیں جو ہر شام کی منڈیر سے پھوٹتے ہیں۔

تین شینہہ جوان بھائی کرپانوں میں پروئے گئے۔ دو تلے کی تاریں بیٹیاں امرتسر کے بازاروں میں رُل گئیں۔ چلے تو دس ہزار کا قافلہ تھا، پہنچے تو ہم تین ہی بچے تھے۔ ابھی تو ہماری پہلی پہلی نسلیں غلامی کے ذائقے سے ناآشنا ہوئی ہیں۔ ابھی تو اذان اور نماز کے اوقات میں پٹتے ڈھول پتاشے اور گائے کے زبیحہ پر درجنوں قتال کے مناظر دیکھنے والے حیات ہیں، ابھی تو بنیئے کی غلامی اور سود کے چنگل سے جان چھڑا کر کاروبار کی شدھ بدھ ہی حاصل کی ہے ہم نے کہ ہمیں پھر غلامی کے حشر دے سنائے جا رہے ہیں۔

پاکستان کی بساط پر اپنے اپنے مہرے کھیلے جا رہے ہیں۔ صوبائی خودمختاری کے بیٹے ملکی آزادی و حرمت کی قیمت پر لگا کر اپنی اپنی بازیاں ماری جا رہی ہیں۔ان قماربازوں کو ان زہر اُگلتی دیسی بدیسی زبانوں کو روکنے والا کوئی آئین کوئی قانون کوئی ہاتھ نہیں ہے کیا؟ جس کا جی چاہتا ہے اپنے مذموم مقاصد کی خاطر ارضِ پاک کی سالمیت پر سوالیہ اُنگلیاں کھڑی کر دیتا ہے۔

ہمارا پڑوسی 25ریاستوں کا وفاق ہے، جہاں 360مذاہب ہیں اور 380زبانیں بولی جاتی ہیں وہاں علیحدگی کے نعرے لگانے کی اجازت کیوں نہیں دی جاتی کسی کو۔۔۔ سپرپاور پچاس ریاستوں کا مجموعہ ہے جس میں کالی و پیلی گوری سب اقوام موجود ہیں۔ اُس کے ٹوٹنے کی صدائیں میڈیاپر کیوں نہیں سنائی دیتیں۔

ہم کل ملا کر چار ہیں جن کا مذہب سے ثقافت تاریخ سے تمدن تک ایک ہے، پھر بھی جس کا جی چاہتا ہے اس کی سالمیت پراستفہامیہ علامتیں لگانے لگتا ہے۔ ان ہرزہ سراؤں کو یہ جرات ہماری اپنی ہی غلطیوں اور کمزوریوں نے ردّی کہیں دنگافساد ہو جائے۔ مہنگائی ہو۔ پہاڑی نہ ملے۔ ناجائز کام نہ ہو سکے تو وہی زہرآلود جملہ اُگل دیا جاتا ہے، جیسے ادا کرتے ہوئے زبان لڑکھڑا جاتی ہے وجود کانپ جاتا ہے۔
دُشمنوں سے تو گلہ ہی کیا کہ وہ تو روزِ اوّل سے انھی سازشوں اور کاوشوں پر برسرِعمل ہیں۔ صدحیف کہ ہم خود یہ جملہ دہرانے لگے ہیں۔ اُس وقت ہمارے وجود جو پرورش دینے والا اس دھرتی کا اناج ہمارے لیے زہر میں تبدیل کیوں نہیں ہو جاتا۔اس وطن کی مان مریادہ کو چھوڑیئے۔

اس سیم و زر کا تو خیال کیجیے جو آپ اسی وطن کے وجود سے کشید کی ہے کہ آج ایک ایک محل نما کے پارکنگ ایریا میں چار چار بی ایم ڈبلیو کھڑی ہیں۔ صنعت کاروں جاگیرداروں، افسروں، حکمرانوں کا یہ شاہانہ ٹھاٹھ باٹھ جو عربی شہزادوں کو شرماتا ہے۔ اسی دھرتی کے طفیل ممکن ہوا ہے۔ وطن کی محبت، مٹی کی باس، دھرتی کی خرمت سب، رہنے دیجیے۔ اُس لوٹ کھسوٹ کی خاطر ہی رحم کیجیے، جو روئے زمین پر واقع اور کسی ریاست میں کبھی ممکن ہی نہیں ہے، جس نے جتنا چاہا لوٹا اور کنگال کیا کہ آج بچے بھی اس مٹی کو بے آبرو اور گلیوں میں گاتے پھرتے ہیں۔

پاکستان کا مطلب کیا۔ میں بھی کھاؤں تو بھی کھا۔

اس لیے کہ آج اُنھیں پاکستان کا مطلب سمجھانے والا کوئی نہیں رہا کہ ہماری پوری تاریخ ان تینوں لفظوں میں سمٹ گئی ہے۔ لوٹا، سمیٹا اور فرار کہتے ہیں جیسا راجاویسی پر جا، آج عوام بھی حصولِ زر کے چکر میں ربورٹ بن چکے ہیں۔ اب نئی نسلوں کو کون بتائے کہ یہ ملک کیوں اور کیسے بنا کہ بتانے والے تو حسرتِ تعمیر لیے رخصت ہوئے۔

تعمیر کا عہد دینے والے ان حسرتوں کا ماتم کرتے بتدریج خاموش ہوئے تاریخ کے اوراق سکولوں کالجوں میں دُھندلا دیئے گئے۔ بچے گیم بوائے، پلے اسٹیشن، انٹرنیٹ میں اپنے گمشدہ وجود ڈھونڈنے لگے نوجوان یورپی سفارت خانوں کے سامنے لگی۔ ویزہ کی لمبی لائنوں میں اپنی شناخت گم کرنے لگے۔ بے روزگاری کا اژدھا انسانی ضابطۂ اخلاق بھی نگل گیا۔ملک کی قیمتی املاک کوڑیوں کے مول نیلام ہونے لگیں۔ خود ہی فروخت کشدہ خود ہی خریدار اربوں کھربوں کے قرضے سیاسی رشوتوں کی صورت میں معاف ہوئے اور ملک کا زرہ زرہ بیرونی قرضوں کے جال میں جکڑ دیا گیا۔

برسوں ملک و قوم کی دولت لوٹنے والے منٹوں میں باہر اور اُن کے احتساب کا سوچنے والے محبس خانوں میں بند ہوئے، جس بے حسی، خودغرضی اور بے بسی کا ایندھن آج یہ ارضِ پاک بنی ہوئی ہے۔ زندہ قوموں میں اس کی مثال نہیں ملتی وطن کی مٹی ماں کی گود جیسی ہوتی ہے۔ ماں دھرتی کی محبت سینوں میں ایسے ہی بستی ہے جیسے ماں کی محبت سے پورا وجود مہکتا ہے اس کا رزق اس طرح جسم و جاں کی آبیاری کرتا ہے جیسے ماں کا دُودھ، جس کا قرض فرزندانِ زمین پر ایسے ہی رہتا ہے، جیسے بتیس دھاروں کا تقدس اسی لیے تو اس کی حفاظت اس کی حرمت اس کے وجود کی بقا کا احساس اس کے بیٹیوں کے رگ و پے میں خون کی گردش کی مانند جاری و ساری رہتا ہے، جہاں کہیں ماں دھرتی کے تقدس کو پامال کیا گیا غاصبوں نے استعمال حربے اختیار کیے تو وطن کی آزادی اور سالمیت کے لیے فون کے نذرانے پیش کیے گئے۔

ایسی ہی قربانیوں اور جذبوں کے ساتھ ہمارے بزرگوں نے دُنیا کی شاطر ترین طاقتوں سے لڑ کر پاکستان بنایا۔ آج اسی دھرتی کے بیٹے کس حوصلے سے اُس کے وجود پرتہمتیں اور تبرے برداشت کر رہے ہیں۔ شاید اس لیے کہ آج ہم میں یا خدا، پشاور ایکسپریس، کھول دو اور ہم وحشی ہیں جیسی تحریریں پڑھنے کا جذبہ ختم ہو چکا ۔

آج میڈیا تو آزاد ہے لیکن اپنی ثقافت و معاشرت پر یورپی و انڈین کلچر کا چہرہ تھوپ لیا ہے، کبھی شاہین اور آخری چٹان جیسے ڈراموں کے اوقات میں سڑکیں سنسان ہو جایا کرتی تھیں۔ آج انڈین چینلز اپنی تاریخ ثقافت و مذہب اور زبان، دلچسپی و تجسّس کے ..........میں لپیٹ کر ہمارے بچوں کے گلے سے اُتار رہے ہیں۔

خود ہم نے سکولوں کے نصاب سے تحریکِ پاکستان اور دفاعِ پاکستان سے متعلق مضامین تک حذف کر دیئے ہیں۔ تاریخی واقعات کی یاد محو کرنے کے لیے قومی دِنوں کی تعطیلات بھی ختم کر دی گئیں۔ آج تعلیمی اداروں میں یومِ دفاع، یومِ پاکستان، یومِ آزادی، یومِ اقبال، یومِ قائداعظم منانے کی رسم ترک ہو چکی ہے۔

آج ہم ادیبوں میں الفاروق المامون اور تلوار ٹوٹ گئی جیسی کتابیں لکھنے والا کوئی نہیں رہا۔ آج جیوے جیوے پاکستان جیسے ترانوں کا خالق کوئی نہیں ہے۔ اے وطن کے سجیلے جوانو میرے نغمے تمہارے لیے ہیں۔ گانے والا کوئی نہیں۔ حد یہ کہ دِل دِل پاکستان جان جان پاکستان گنگنانے والی نسل کا بچپنا گزرے بھی مُدّتیں ہوئیں لیکن پھر کسی نغمہ نگار کسی مفتی نے وطن کی محبت میں سرشار کر دینے والاکوئی نغمہ تخلیق نہ کیا۔

عوام نہ بے حس ہوتے ہیں اور نہ ہی وطن کی محبت سے عاری لیکن آنے والی نسلوں کو پرانی نسلیں اپنے آباؤاجداد کا ورنہ منتقل کرتی ہیں اُن کے کارناموں اور قربانیوں سے روشناس کرواتی ہیں۔ ملک و ملت کی اہمیت سے باخبر کرتی ہیں۔ آج والدین خود بے خبر ہیں تو بچے گلوبل ولیج اور نیوورلڈآڈر کی اصطلاحیں ہی ازبر کریں گے نا کچھ عرصہ بیشتر جناح فلم دِکھائی گئی تو لوگ دیوانہ وار دیکھنے کو لپکے لیکن ہم نے خود کبھی کوئی فلم یا ڈاکومنٹری بنا کر اپنے بزرگوں کے کارناموں سے قوم کو روشناس کروایا۔

لوٹو اور بھاگو کا ماٹو رکھنے والے کارپردازان کی اقتدار بچاؤ مہم سے کبھی کوئی پیسہ وقت یا قومی جذبہ بچا ہی نہیں کہ آنے والی نسلوں کو قیام پاکستان کی وجوہات، مقاصداور اہمیت بنا کر حبِ وطن کا جذبہ پیدا کیا جاتا، مجھے وہ پرانا لطیفہ یاد آتا ہے کہ کئی اقوام کے نمائندہ افراد کہیں اپنے اپنے ملک کی برتری ثابت کر رہے تھے کہ سب سے آخر میں ایک پاکستانی بولا کہ امریکی کا پوری دُنیا پرغلبے کا دعویٰ درست، جاپانی کی ٹیکنالوجی کی برتری بھی۔ تسلیم ہندوستانی کا جمہوریت کا تفاخر بھی قبول لیکن پاکستان کے پاس ایک ایسی برتری ہے جو کسی کو آج تک نہیں ملی سب نے حیران ہو کر پوچھا کہ بھئی وہ کیا؟ تو پاکستانی نے شرما کر جواب دیا اسے ساٹھ برس سے لوٹا جا رہا ہے لیکن ابھی بھی باقی ہے۔

ہاں یہ باقی رہے گا کیونکہ کہ اسے قائم رکھنے والی ہستی باقی رہنے والی ہے اور تمام تر خباثتوں اور سازشوں کے باوجود یہ انشاء اللہ زندہ رہے گا کیونکہ اس مملکتِ خداداد کا وجود اسلام کے نام پہ عمل میں آیا اور اس کے نام کا مطلب ہی اسے قائم و دائم رکھنے کا باعث ہے۔
پاکستان کا مطلب کیا’’لا الٰہ الا اللہ
عالمی اخبار - پاکستان کا مطلب کیا ؟ از۔ طاہرہ اقبال