پس چہ باید کرد۔۔۔

سماجی مسائل میں سے اہم ترین” پسند کی شادی مسئلہ“ پاکستانی معاشرے میںکافی حد تک سرایت کر چکا ہے ۔آئے روز ایسے واقعات سامنے آرہے ہیں جن میں گھروں سے بھاگ کر شادیوں کا رجحان بڑھ رہا ہے اور اسکے نتیجے میں ان گنت مسائل سر اٹھا رہے ہیں. پسند کی شادی اور اسکے لئے لڑکی لڑکے کے گھرو ں سے بھاگنے کی شرح میں تشویشناک حد تک اضافہ معاشرے کے لئے انتہائی افسوسناک ہے ۔
اگر شرعی نقطہ نظر سے دیکھا جائے تو اسلام جہاں بالغ مرد اور عورت کو پسند اور ناپسند کا اختیا ر دیتا ہے وہیں والدین کو بھی اولاد کو مجبور نہ کرنے اور انکی خواہش کا احترام کرنے کا پابند بناتاہے ۔والدین کو اول تو اپنی ذمہ داری کا احساس کرتے ہوئے اولاد کی تربیت اس نہج پر کرنی چاہیے اور گھر میں ایسا ماحول پیدا کرنا چاہیے کہ اس طر ح کے واقعات کی نوبت ہی نہ آئے اور ساتھ ہی اس طرح کے حساس معاملات میں بچوں کی مرضی ضرور معلوم کرنی چاہیے اور زبردستی کسی قسم کا فیصلہ مسلط کرنے سے گریز کرنا چاہیے ۔
تاہم اولاد کا بھی یہ فرض بنتا ہے کہ"خود سری " پر مبنی فیصلے کرنے کی بجائے عقل و ہوش سے کام لیتے ہوئے افہام وتفہیم سے معاملے کو حل کریں اور عمر بھر کی رسوائی اور والدین کی نافرمانی سے بچنے کی کوشش کریں ؎
اللہ ہم سب کو ہدایت نصیب کرے؎ امین