"لاہورسے فرار" نامی ڈرامہ کرنے کے بعد جب میں بڑے بھائی کے از حد اصرار کے بعد کوئٹہ پہنچا تو وہاں اپنا ذاتی بزنس ہونے کے باوجود نوکری تلاش کرنے کی جدو جہد میں لگ گیا ۔ چھوٹا سا شہر ، بزنس سیکٹر محدود تو ایسے میں نوکری ملنا مشکل امر تھا۔
کچھ عرصہ تو بھائی نے برداشت کیا۔ پھر اکثر یار دوستوں رشتہ داروں میں کہتے پائے گئے کہ بدر کا کام کرنے کو دل نہیں ۔ جب یار دوست حقارت بھری نظروں سے دیکھنے لگے اور ایک دن دوستوں کے سامنے ہی عزت افزائی کر دی گئی تو دست بستہ عرض کی حضرت بڑے بھائی جان یہ تو بتائیے کہ کام کہتے کسے ہیں۔ کیا آپ اُسے کام کہتے ہیں جو آپ کرتے ہیں؟
مزاج نازک کو یہ گستاخی بُری لگی اور گرم ہو کر فرمایا ہاں تو میں کام کرتا ہوں ۔کوئی تمہاری طرح جھک تھوڑا ہی مارتا ہوں۔
میں نے مزید مودب ہو کر فرمایا کہ حضور دعائیں دیجیے پاکستان کو کہ وہ ایسا کام برداشت کرتا ہے۔ صبح اٹھنا ، ناشتہ کر کے موٹر بائیک کو کک لگانا اور آفس پہنچ جانا، آفس آ کر سب سے پہلے چائے پینا۔ پھر دوست احباب کے ساتھ گپ شپ لگانا، پھر دوپہر کا کھانا کھانا، پھر دوبارہ چائے پینا، پھر ایک گروپ کے ساتھ بیٹھ کر دوسرے کی غیبت کرنا ، پھر شام کو گھر آ جانا۔ اگر یہ کام کہلاتا ہے تو خدا گواہ ہے میں اس کام کے لائق ہی نہیں۔

اس پر مزاج مزید برہم ہوا: تاہم میں نے اپنی گفتگو جاری رکھی کہ حضور والیٰ ویسے اگر دیکھا جائے تو میں بھی بعینہ یہی کام کرتا ہوں ۔ میرے روزانہ کے شیڈول اور آپ کے شیڈول میں چنداں فرق نہیں۔ چناچہ مجھ پر یہ الزام کیوں کہ میں کام نہیں کرتا؟

بڑے بھائی گرجے : کہ میں پیسہ کماتا ہوں اور تم اجاڑتے ہو۔
میں نے عرض کی جناب والیٰ کوئی شک نہیں اس پیمانے کی رُو سے میں ناکام ہوں۔ لیکن پیسا تو چور اور ڈکیت بھی کماتے ہیں۔ اگر تو کام کا یہی پیمانہ ہے تو پھر اس حساب وہ آپ سے زیادہ اچھا کام کرتے ہیں۔ لیکن آپ انکو تو اپنے گھر میں گھسنے نہیں دیتے۔ اور جو پیسہ میں اجاڑتا ہوں وہ میرا اپنا کمایا ہوا ہوتا ہے۔

کہنے لگے : تم کو کہا تھا کہ میڈیسن والا بزنس کر لو ۔ تم نے انکار کر دیا تھا۔ تمہاری نیت ہی نہیں کام کرنے کی۔ میں نے ٹھنڈی آہ بھری کہ جناب والیٰ کیوں آپ چاہتے ہیں کہ میں دو نمبر دوائیاں بیچ کر غریبوں کی آہ لوں۔ کام بھی بتانا ہے تو دو نمبر کام ۔ مجھے یہ کیوں نہیں کہہ دیتے کہ برگر کی ریڑھی لگا لو۔فلانی جگہ مزدوری کر لو۔ فلانے آفس میں چپراسی کی جگہ خالی ہے وہاں نوکری کر لو۔ یہ کہہ کر دیکھیں میں انکار کروں تو میری گردن کاٹ دینا۔ آپ بھی تو مجھے دو نمبر کام کا کہتے ہیں صرف اس لیے کہ پیسہ آئے۔

پیسہ پیسہ پیسہ

آپ لوگ چاہتے ہیں کہ انسان اُس بندر کی طرح بن جائے جس کو جنگل کی حکمرانی مل گئی تھی اور وہ کام ہوتا دکھانے کے لیے ادھر اُدھر چھلانگیں لگاتا پھرتا تھا۔ یہ صرف میرے بھائی کا المیہ نہیں کہ وہ چند مہینوں میں ہی برا فروختہ ہو گیا بلکہ ہمارے پاکستانی معاشرے میں یہ ذہنیت فروغ پا چُکی ہے کہ تم محض اُسی وقت کار آمد ہو جب کُچھ پیسہ کماؤ گے۔پیسہ نہیں کما رہے تو تم سے بڑا کوئی نکما نہیں۔ تم اس دھرتی پر بوجھ ہو۔،
میں نے جب ایک چھوٹے سے گاؤں روجھان مزاری کے ایک چھوٹے سے سکول میں ٹیچنگ کی نوکری کی تو بعینہ یہی مسئلہ دوبارہ کھڑا ہو گیا۔ چونکہ یہ نوکری لش پش نہیں تھی، اس میں پیسہ نہیں تھا تو سبھی برادران عزیز مجھے سعودی عرب بھیجنے کے درپے ہو گئے کہ وہاں شاہ سعود کی جگہ خالی ہو رہی ہے بس جاؤ اور فرمانروائی کرو۔ چناچہ انہوں نے میرے اس نظریے کو مزید پختہ کیا کہ کام وہ نہیں کہ جو تم کر رہے ہو بلکہ کام وہ ہے جس میں پیسہ آتا نظر آئے۔ میں تو یہ کہہ کر کنارہ کش ہو گیا کہ جو اِدھر نکمے وہ مکے میں بھی نکمے۔

میں تو سعودیہ نہیں گیا۔لیکن بڑے بھائی سعودی تشریف لے گئے۔ سُنا ہے کہ تین مرتبہ مطالبہ کر چُکے ہیں کہ "میں نے کام نہیں کرنا"۔ گزشتہ ایک ماہ سے کام چھوڑ کر کمرے میں سوئے ہوئے ہیں کہ پاکستان جانے کی چھٹی دو۔ میرے اور انکے اعمال میں فرق صرف اتنا ہے کہ وہ پیسہ کمانے میں بہت کامیاب ہیں۔ (حالانکہ اعمال میں بہت فرق ہے )

میرا ایک واقف ہے ۔ اس نے ایم اے اسلامیات تھرڈ ڈیویژن میں پاس کی۔ نکما ترین شخص تھا۔امیر آدمی تھا۔ہر وقت گاڑی پر سیر سپاٹے، ہوٹلنگ ۔ اس کو نہ جانے کہاں سے قرآن کا چسکا لگ گیا۔ سول ٹھیکیداری کرتا تھا چناچہ اوپر کی آمدنی خوب تھی۔اور ایسا چسکا لگا کہ سب کچھ چھوڑ چھاڑ کر قرآن کا ہی ہو گیا۔ NUMLیونیورسٹی سے انگلش کا کورس کیا تاکہ انگلش میں قرآن کے تحقیقی موضوعات پڑھ سکے۔ پھر کسی نے بتایا کہ عربی کا دامن بہت وسیع ہے ۔ اس نے عربی پر کمال کا عبور حاصل کیا۔ پھر فارسی سیکھ ڈالی اور یہ تینوں زبانیں اہل زبان کی طرح بولتا ہے۔ اسکو درس قرآن دینے کا شوق ہے۔
محض دو یا تین سال کے عرصے میں اس نے ان تمام چیزوں پر عبور حاصل کیا۔ ظاہر سی بات ہے اس کے لیے اسکو بن باس لینا پڑا ہوگا۔
ایک دن مجھے بھی قرآن کا چسکا لگانے کی کوشش کر رہا تھا۔ اسکا ایک دوست آیا ۔
دوست نے اُس سے پوچھا: ہور شاہ جی اجکل کی ہو ریا اے؟( اور شاہ جی آجکل کیا کام ہو رہا ہے؟)
شاہ جی: بس یار یہی قرآن ہی اپنا اوڑھنا بچھونا ہے ۔ درس قران دیتے ہیں
دوست: ہاں وہ تو ٹھیک ہے لیکن کام کیا ہو رہا ہے۔
میری ہنسی چھوٹ گئی کہ ان صاحب کے نزدیک قران کی تعلیم دینا کوئی کام ہی نہیں۔ اُن صاحب کا بائیو ڈیٹا معلوم کیا تو معلوم ہوا کہ وہ صاحب خاصے امیر کبیر ہیں اور جب تک کسی فعل سے پیسہ آتا محسوس نہ ہو اسکو کام نہیں سمجھتے۔

میں سمجھتا ہوں کہ کوئی شک نہیں زندگی کی گاڑی چلانے کے لیے پیسہ کمانا بہت ضروری ہے ۔ لیکن یہ ذہنیت انتہائی غلط ہے کہ کام محض وہی ہے جس سے پیسہ آئے۔اور مزے کی بات یہ ہے کہ جب مجھ جیسے نکمے کسی "کام" پر لگ جاتے ہیں تو پھر وہ دوسرے نکموں کو حقارت کی نظروں سے دیکھنے لگ پڑتے ہیں۔ ایک بچپن کا دوست کوئی تین سال بیروزگار رہا۔اسکی ہر دامے سخنے درمے سپورٹ کی۔ ہر وقت ٹھنڈی آہیں بھرتا تھا ۔ پھر اسکی دوستی کسی "کام والے بندے" سے ہو گئی۔ اُس نے بھاگ دوڑ کر کے اُس کی نوکری ایک کالج میں لیکچرر کی کروا دی۔ اب وہ ٹانگ پر ٹانگ رکھ کر مدبرانہ انداز میں نقطہ چینیاں کرتا ہے۔ شاید وہ بھول گیا کہ وہ تین سال بیروزگار رہا جبکہ میری پوری کیرئیر ہسٹری میں محض 8 ماہ بیروزگاری کے ہیں۔

پیسہ کیسے کمایا جاتا ہے ؟
کیا اسکا کوئی کورس ہوتا ہے؟
کیا کوئی انسٹیٹیوٹ اسکی ٹریننگ کرواتا ہے؟
کیا کوئی طریقہ بتا سکتا ہے کہ کس طرح اُس بندر کی طرح چھلانگیں مارنا سیکھ جاؤں تاکہ مجھ سے توقعات رکھنے والوں کی توقعات پوری ہو سکیں؟
کوئی ایسا طریقہ ہو سکتا ہے کہ میں پیسے پر مرنا شروع ہو جاؤں ؟
کوئی ایسا طریقہ کہ مجھے پائی پائی کی اہمیت کا اندازہ ہو جائے اور میں پائی پائی کمانے کے لیے پاگل ہو جاؤں؟

پیسہ پھینک ۔تماشہ دیکھ