آنلائن جنگ ایڈیشن دیکھتے ہوئے یہ رپورٹ نظر سے گزری جسے عنوان " عوام کا فیصلہ" دیا گیا ہے ۔کیا ایک مخصوص فورم پر کیے گئے سروے کو عوامی فیصلہ قرار دیا جاسکتا ہے جس میں اگر چہ فریقین کا نقطہ نظر پیش کیا گیا ہو لیکن فورم میں موجود رائے دہندگان تو مختلف نقطہ ہائے نظر سے تعلق نہیں رکھتے ہوں گے بلکہ مشاہدہ یہ ہے کہ عموما اسی مخصوص نقطہ نظر سے تعلق رکھتے ہیں ۔اگر یہی سروے کسی اسلامی سوچ رکھنے والی فورم پر کی جائے تو آپ کے خیال میں " مذکورہ " نتیجہ ظاہر ہوگا یا برعکس بھی ہوسکتا ہے کیونکہ رائے دہندگان کی اکثریت اسلامی سوچ سے تعلق رکھتی ہوگی۔ آپ کی سوچ کیا ہے ؟؟
نوٹ:؛ اس رپورٹ کو خبروں کے سیکشن میں اس لیے پوسٹ نہیں کیا کہ ایک عمومی بحث اگر ہوسکے تو کچھ نچوڑ ظاہر ہو۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔
مسلم اُمّہ کا ٹھیکیدار بننے کے بجائے اپنے گھر کی فکر کرنی چاہئے، عوام کا فیصلہ16 جنوری 2012ء
لاہور (جنگ نیوز) جیو کے پروگرام ”عوام کی عدالت“ میں جیوری کے سامنے مقدمہ پیش کیا گیا کہ 'ہمیں مسلم اُمّہ کے مسائل کا ٹھیکیدار بننے کی بجائے اپنے گھر کی فکر کرنی چاہئے!'۔

ہال میں موجود عوام کی جیوری نے فریقین کے دلائل سننے کے بعد 79فیصد کی واضح اکثریت سے مقدمہ منظورکرلیا۔
ڈاکٹر جاوید اقبال،لیاقت بلوچ ،ساجد میر اور وجاہت سعید کے جیو نیوزکے پروگرام’ عوام کی عدالت‘ میں دلائل، میزبان افتخار احمد تھے ۔

قبل ازیں مقدمہ کے حق میں دلائل دیتے ہوئے معروف دانش ور ڈاکٹر جاوید اقبال نے کہا کہ ہم نے بطور مسلمان اسرائیل کی مخالفت اور فلسطینیو ں کی حمایت کی ہے اور فلسطینی بھی اس بات کو تسلیم کرتے ہیں۔انہوں نے کہا کہ یہود ی ہم سے آکرکہتے تھے کہ یہ جھگڑا اسماعیل اور اسحاق کا ہے ۔جنہیں ہم اسلامی ممالک کہتے ہیں۔ ان کے اپنے مفادات ہیں اور ہر کوئی اپنے مفادکے لئے سوچتا ہے۔

مقدمہ کی مخالفت کرتے ہوئے جمعیت اہل حدیث کے امیر پروفیسر ساجد میر نے کہا ہمارا دین اسلام ،حبّ وطن یا وطنیت کی نفی نہیں کرتا بلکہ اس کی حوصلہ افزائی کرتا ہے ،وطن بہت کچھ ہے مگر ملت کو نظرانداز نہیں کیا جاسکتااور امّت مسلمہ سے اپنے آپ کو الگ رکھنا کامن سینس کے خلاف اور بطور مسلمان سوچ اور نظرئیے کے بھی خلاف ہے۔انہوں نے کہا جب ہم نے ایٹمی دھماکہ کیا تو مسلمان ممالک نے اسے اپنا ایٹم بم سمجھا اور ہمیں کھل کر امداد دی جبکہ امریکہ اور مغربی ممالک نے ہم پر اقتصادی پابندیاں مسلط کردیں۔انہوں نے کہا کہ سعودی عرب نے ہمیں مفت تیل دیا ۔

مقدمہ کی حمایت کرتے ہوئے کالم نویس وجاہت سعید خان نے کہا کہ پاکستان اسلام کا قلعہ ہے اور ہمیشہ رہے گا،لیکن حقائق کچھ اور بھی ہیں۔انہوں نے کہا کرنل قذافی کی ا یک تنظیم نے چند سال قبل کشمیر کے دونوں اطرف سروے کروایا جس کے مطابق مقبوضہ کشمیر کے 74فیصد لوگوں نے خودمختاری کی بات کی جبکہ محض 8فیصد نے کہا کہ لائن آف کنٹرول کو ختم کیا جا ئے، اس سے صاف ظاہر ہوتا ہے کہ ہم کہاں کھڑے ہیں۔انہوں نے کہا کہ57اسلامی ممالک میں سے کوئی پاکستان کے کسی شہری کو بغیر ویزا کے اپنے ملک آنے نہیں دیتا، سعودی اور متحدہ عرب امارات تو ہمارے وہ برادر ملک ہیں جن پر ہم فخر کرتے ہیں۔ ہمارے ساتھ جو سلوک وہ کرتے ہیں وہ کسی سے پوشیدہ نہیں۔ ہم اپنے مسائل چھوڑ کر دوسروں کے مسائل میں کیوں کودتے ہیں ۔

جماعت اسلامی کے سیکرٹری جنرل لیاقت بلوچ نے مقدمہ کی مخالفت کرتے ہوئے کہا کہ استعمار کا اصل ہدف اسلام ہے اور استعماری طاقتوں نے ہمیں ٹکڑوں میں بانٹ دیا ہے پاکستان عالم اسلام کا دھڑکتا ہوا دل ہے اور آئین پاکستان کے آرٹیکل 40میں واضح طور پر لکھا ہوا ہے کہ تمام مسلمان ممالک کے درمیان برادرانہ تعلقات کو فروغ دیا جا ئے گا۔انہوں نے کہا کہ ہم امت مسلمہ سے لاتعلق نہیں رہ سکتے اور عالم اسلام کو متحرک کرنے میں ہی ہماری بھلائی ہے ۔