یہ ایک مہینہ پہلے کی بات ہے۔

انٹرویو کا وقت تو 9 بجے تھا لیکن سبھی کینڈیڈیٹس 8:20 تک آچکے تھے۔ ان میں 2 لڑکیاں اور 6 لڑکے تھے۔ اس دوران فارمیلیٹی پوری کرنے کیلئے اُن سے رِٹن ٹیسٹ اورپھر ٹائپنگ ٹیسٹ لیاگیا۔ اُسکے بعد سب انٹرویو کا انتظارکرنے لگے۔ تقریباً 11:15 کے آس پاس گروپ کیپٹن آئے، چائے وغیرہ پی اوراِن کاموں میں بیس منٹ لگ گئے۔

انٹرویولینے کیلئے کل پانچ لوگ تھے یعنی میں، پرنسپل، دوٹیچرزاورگروپ کیپٹن اورسبھی سیٹوں پربراجمان ہو چکے تھے لیکن اچانک میرا دھیان گیا تو دیکھا کہ انٹرویو دینے والے کیلئے کوئی چیئرنہیں رکھی تو میں نے کہاکہ ایک چیئررکھوا دی جائے۔ پرنسپل نے بیک کی اورآیا کوکہاکہ ایک چیئر لے آؤ۔ گروپ کیپٹن نے کہا رہنے دیں کیاضرورت ہے چیئرکی وہ آپ کے کورڈینیٹرہوں گے اُنکا عہدہ آپ سے کم ہےایسے ہی کھڑے ہو کر دیں گے انٹرویو۔ ماریہ نے بھی اُنکی بات کی حامی بھری لیکن مجے یہ چیزاچھی نہیں لگی میں خاموش رہی لیکن انکی ذات کا جوبت بنا تھا وہ اُنکی اس سوچ کی وجہ سے پل میں چکنا چورہوگیا۔ بہرحال پہلا لڑکا آیا۔ اُس سے نام و تعلیم پوچھی، اُس نے کہا میں نے ماسٹرزکیا ہے پولٹیکل سائنس میں۔ اتنا سُنتے ہی گروپ کیپٹن نے کہا آپ جا سکتے ہیں۔ اُنکاکہنے کا اندازانتہائی بُرا تھا۔ اب کی بار پرنسپل نے مداخلت کی کہ پوچھ تو لیں ایک بار بھائی۔ اُنہوں نے کہا آپکی تعلیم اچھی ہے جبکہ آپ ایل ڈی سی کیلئے اپلائی کر رہے ہیں یہ جاب آپکی تعلیم کے لحاظ سے بہتر نہیں لہذٰا آپ جاسکتے ہیں۔ وہ لڑکا چپ چاپ باہرآگیا۔

پرنسپل نے بیل کرنے سے پہلے کہا کہ بھائی مناسب نہیں لگتا کہ کھڑے ہوکرانٹرویو دیا جائے۔ اُنکو بولتا دیکھ میں نے بھی ایک بارپھرکہا کہ سرواقعی اسطرح اچھا نہیں لگ رہا۔ آپ چیئررکھوادیں۔ مجھے لگا میری مثال اس شعرصادق آتی ہے،

“دیکھوجوجیسا ہے ویسا ہی ٹریٹ کرو۔ اُنکا عہدہ کم ہی ہوگا بہترہے جیسا چلتا ہے چلنے دیں“۔ اُنکے جواب نے میرا منہ بند ہوگیا کہ ان پرکوئی اثرہونے والا نہیں کیونکہ وہ صحراکی مانند تھے جہاں سب تھا لیکن وہاں بھولے بھٹکے سے کسی “انسان“ کا گزر نہ و ہواتھا۔ اورمیں چپ کر کے بیٹھ گئی لیکن میرے دماغ میں سورۃ لقمٰن کی آیت آرہی تھی کہ، “اللہ کسی خودپسند اورفخرجتانے والے شخص کو پسند نہیں کرتا“۔ وہ بے شک خود پسند نہیں تھے لیکن مغرورتھے اپنے عہدے پر۔ اس کے بعد جتنے بھی کینڈیڈیٹس آئے میں نے غیردماغی سے سوال پوچھے یہاں تک کہ میں جو دن میں بارہ پندرہ بار چائے پیتی تھی، میرے سامنے چائے کا کپ ٹھنڈا ہو گیا لیکن میرا دل نہ کیاچائے پینے کو۔ مجھے افسوس ہورہا تھا کہ ان لوگوں کو معلوم بھی نہیں اورصاحبِ اقتدارنے انکے عہدوں کا تعین بھی کر لیا ہے۔ میرے دماغ میں اُنکی باتیں بیٹھی ہوئی تھیں اورمیں سوچ رہی تھی کہ عہدہ ورُتبہ کیا ہے؟ عزت کیا ہے؟ اِتنا پڑھ لکھ کر بھی وہ نہ سمجھ پائے جو آقاصلی اللہ علیہ والہ وسلم نے کہا تواِنکی ایسی زندگی کا فائدہ؟ اِسی دوران پرنسپل نے کہا، زاراآپکی چائے ٹھنڈی ہو رہی ہے۔ میں نے کہا میں پی لیتی ہوں۔ گروپ کیپٹن نے طنزیہ کہا، “اسکو کرُسی نہ رکھنے کا دُکھ لگ گیا ہے“، اتنا کہہ کر خود ہی قہقہہ لگا کر ہنسنے لگے۔ میں نے کہا ایسی کوئی بات نہیں ہے اورمنہ نیچے کرکے بیٹھ گئی جیسے اب کی باروہ میری بات مان لیں گے۔ اِسی طرح انٹرویوختم ہو گیا لیکن میری چائے کا کپ جوں کا توں پڑارہا جو میری ذہنی کیفیت اورجذبے کی غمازی کر رہا تھا۔

اسی دوران ایل ڈی سی رکھنے کیلئے ہم نے اپنی اپنی رائے رکھی اورباہرآگئے۔ اب ہماری رائے کو دیکھتے ہوئے فیصلہ گروپ کیپٹن نے پرنسپل کیساتھ ملکر کرنا تھا۔ کسکو سیلیکٹ کیا وہ فیصلہ سُنے بغیر2 بجے میں کالج سے نکل آئی اور ساتھ ہی امی کا سکول تھااُنکولیااورہم لوگ گھرکی طرف چل پڑے۔ امی نے بار بار پوچھا کیاہواخاموش کیوں ہو لیکن میں ٹال گئی مگرگھرجاکرضبط نہ ہواتو امی کو پوری بات بتائی۔ اُنہوں نے کہا کہ ضروری نہیں جیسا تم سوچتی ہوویسا سب سوچیں ہرکوئی اپنی سوچوں کو لیکرآزاد ہے۔ میں چپ تھی لیکن میرا موقف اپنی جگہ قائم تھا کہ کسی عربی کو عجمی پر، کسی گورے کو کالے پرفوقیت حاصل نہیں جب یہ بات کہہ دی گئی ہے تو اسکو ہم لوگ اپلائی کیوں نہیں کرتے؟ کیا اچھی باتیں کتابوں کی زینت بنانے کیلئے کہی گئیں ہیں؟ کیاحدیث اور قرآن کی آیات صرف پڑھنے کیلئے ہیں عمل کرنے کیلئے نہیں؟ اُسی پریشانی کی حالت میں 3 بجے جاب پرچلی گئی لیکن عصرکی نماز کے وقت آنسوتھے کہ رُکتے نہیں تھے اوراُس وقت میرے ذہن میں وہ لڑکے لڑکیاں تھیں جو عزت کی روٹی کمانے گھرسے نکلے تھے لیکن اُنکو معلوم بھی نہ تھا کہ اُنکی “اوقات“ کا تعین ایک عہدے دار نے کرلیاہے۔ اسلام کی نظرمیں تو سب برابر ہیں لیکن ان لوگوں کی نظرمیں وہ برابرہے جواِنکا ہم پلہ ہے۔ زات پات، اُونچ نیچ کو لیکرایسا فرق کب تک ہوتا رہے گا؟

آپ مجھے بتائیں کیا آپ بھی اُن جیسا سوچتے ہیں؟ کیا میری سوچ کے ہمنواء ہیں یامیری سوچ ہی غلط ہے؟

__________________