السلام علیکم و رحمۃ اللہ
آج کچھ جرائد کی ورق گردانی کرتے ہوئے ایک مضمون نظر سے گزرا۔ میرے لئے چونکہ نیا تھا اس لئے پڑھ کر حیرت ہوئی۔ اس سے قبل میں نے ایسی بات نہ کہیں پڑھی تھی اور نہ سنی تھی۔
قائداعظم کے اس خواب کا ذکر تھا جو انہوں نے لندن قیام کے دوران دیکھا جب وہ حالات سے دلبر داشتہ ہو کر لندن چلے گئے تھے۔ علامہ اقبال، لیاقت علی خان اور دیگر نے بارہا خطوط لکھے اور واپسی کے لئے قائل کرتے رہے۔
اس دوران انہوں نے ایک خواب دیکھا جس میں نبی کریم صلی اللہ علیہ و سلم نے انہیں کہا کہ ’’جناح! بر صغیر کے مسلمانوں کو تمہاری ضرورت ہے، اور میں تمہیں حکم دیتا ہوں کہ تحریک آزادی کا فریضہ سر انجام دو۔ میں تمہارے ساتھ ہوں تم بالکل فکر نہ کرو، ان شاء اللہ تم اپنے مقصد میں کامیاب رہو گے۔‘‘
اس واقعہ کی تاریخی صداقت کے بارے میں مجھے زیادہ علم نہیں اس لئے اس پر کلام ہمارا موضوع بحث نہیں ۔۔
اس واقعہ کے بعد مضمون نگار لکھتا ہے کہ
’قائد اعظم کا ایک مخلص و معتمد ساتھی بیان کرتا ہے کہ حضور صلی اللہ علیہ و سلم نے انگریزی زبان میں کلام کیا تھا‘

یہ بات میرے لئے نئی تھی اس لئے مجھے حیرت ہوئی ۔ لیکن مضمون نگار کو بھی اس بات کا بخوبی اندازہ تھا کہ ہر پڑھنے والا یہاں ضرور رکے گا ۔۔ اس لئے اس نے اپنے تئیں کچھ مستند روایات نقل کی ہیں جو اس بات کو ثابت کرتی ہیں کہ نبی صلی اللہ کو ساری زبانیں آتی ہیں اور آپ ہر قوم سے ان کی زبان میں خطاب کرتے تھے۔
اس ضمن میں دو حوالہ جات ذکر کئے گئے ہیں
1۔۔ تفسیر جمل، جلد دوم، صفحہ 512
و ھُو صلی اللہ علیہ و سلم کان یخاطب کل قوم بلغتھم
حضور صلی اللہ علیہ و سلم ہر قوم سے ان کی زبان میں بات کرتے تھے
2۔۔۔۔ نسیم الریاض، جلد دوم ، صفحہ: 387
انہ صلی اللہ تعالی علیہ و سلم لجمیع الناس علمہ جمیع اللغات
اللہ نے چونکہ حضور اکرم صلی اللہ علیہ و سلم کو تمام لوگوں کی طرف بھیجا ہے تو اللہ تعالی نے تمام زبانیں بھی سکھا دیں ۔

یہ باتیں میرے لئے نئی اور باعث حیرت ہیں۔ شاید اور بھی کئی لوگوں کے لئے یہ بات نئی ہو۔
پھر جو دو حوالے نقل کئے گئے ہیں ان کے مستند ہونے کے بارے میں یقینا ایک سے زیادہ آراء ہوں گی۔
اس حوالے سے اگر کسی صاحب علم کے پاس کچھ معلومات ہوں تو علمی انداز میں شیئر کریں۔


نوٹ: اس دھاگے کو کشت زعفران بننے سے بچایا جائے ۔۔ شکریہ
و السلام علیکم

__________________
محتاج اصلاح و دعا