السلام علیکم !
ایک اخبار میں شائع ہونے والی خبر میں حالیہ سروے کے مطابق پاکستان میں امریکہ کی مقبولیت محض 11 فیصد تک رہ گئی ہے۔
موجودہ صورت حال میں پاکستان کی عوام دو انتہاؤں میں بٹی ہوئی ہے۔ ایک انتہا کا کہنا ہے کہ امریکہ پاکستان کا دشمن ہرگز نہیں ہے بلکہ وہ پاکستان میں استحکام لانے کی کوشش کر رہا ہے جبکہ طالبان و دیگر پاکستان کو تباہ کرنے کے مضموم ارادے رکھتے ہیں۔ امریکہ کا پاکستان میں رہنا یا نا رہنا پاکستان کو کوئی نقصان نہیں دے رہا۔ اس کے برعکس دوسرے گروہ کی رائے کے مطابق پاکستان میں جاری دہشت گردی کی لہر و دیگر واقعات کےپیچھے یا تو براہ راست امریکہ کا ہاتھ ہے یا پھر اس سے ملتا جُلتا استدلال یہ پایا جاتا ہے کہ جب سے امریکہ اس خطے میں آیا ہے تو اسکی وجہ سے ہزاروں لاکھوں جانوں کا اتلاف ہو گیا ہے۔ اگر وہ اس خطے سے چلا جائے تو خطے میں امن و سکون دوبارہ واپس آ جائے گا۔

ایک دینی جماعت طویل عرصے سے "گو امریکہ گو" کی تحریک بھی چلا رہی ہے۔ ابھی ایک سیاسی جماعت بھی معروف سابق کرکٹر کی زیر نگرانی نیٹو سپلائی کے خلاف دھرنے دیتی دکھائی دے رہی ہے۔کہ اگر امریکہ اس خطے سے چلا جائے تو امن و سکون واپس آ جائے گا۔

تو اس تناظر میں سوال یہ ذہن میں اُبھرتا ہے کہ کیا واقعی مجرد امریکہ کے واپس چلے جانے سے ملک میں یا خطے میں امن و سکون آ جائے گا۔ روز افزوں خود کش حملے، سیکیورٹی فورسز پر حملے، معصوم جانوں کا اتلاف، یہ سب ختم ہو جاےئ گا محض امریکہ کے چلے جانے سے؟

اس سلسلے میں اگر کوئی اپنی رائے کا اظہار کرنا چاہے تو اُسے خوش آمدید کہا جائے گا۔ اگر فواد صاحب سرکاری موقف دینا چاہیں تو انکو بھی خوش آمدید کہا جائے گا۔

تاہم چند باتیں ذہن میں رکھنے کے قابل ہیں
1: یہاں پر امریکہ بمقابلہ طالبان کی بات نہیں۔ یہ محض امریکہ کے چلے جانے سے امن واپس آنے کی بات ہے۔
2: ایک دوسرے پر ذاتیات کی حد تک بات کرنے سے گریز کریں۔ تاکہ گفتگو کو اچھے طریقے سے بڑھایا جا سکے۔