حضرت شیخ سعدی اپنی کتاب ’’گلستان ‘‘ میں ایک بہت ہی خوبصورت حکایت بیان کرتے ہوئے لکھتے ہیں کہ ’’ایک بادشاہ نے اپنے درباریوں سے کسی مسئلے پر رائے طلب کی ، چنانچہ ہر شخص نے پوری ایمانداری سے اپنی اپنی رائے کا اظہار کیا ، سب کی رائے سننے کے بعد بادشاہ نے بھی اُس مسئلے پر اپنی رائے دی ، جس پر وزیر نے فوراً ہی بادشاہ کی رائے کی تائید کرتے ہوئے اُسے درست قرار دے دیا، حالانکہ وہ اچھی طرح جانتا تھا کہ بادشاہ کی رائے کی اصابت مشکوک ہے ،دربار برخاست ہونے کے بعد لوگوں نے وزیر سے پوچھا کہ یہ جاننے کے باوجود کہ بادشاہ کی رائے غلط ہے، تم نے بادشاہ کی رائے کی حمایت کیوں کی ،وزیر نے درباریوں کو جواز پیش کرتے ہوئے کہا کہ ’’جو لوگ بادشاہ سے اختلاف کرتے ہیں ،وہ اپنے ہی خون میں ہاتھ دھوتے ہیں ‘‘۔

گویا مطلب یہ تھا کہ اگر بادشاہ دن کو رات کہے تو عقلمند آدمی کو چاہیے کہ وہ فوراً بادشاہ کی بات کی تائید کرتے ہوئے کہے کہ ’’حضور والا دیکھیں آسمان پر چاند بھی نکلا ہوا ہے اور ستاروں بھری کہکشاں بھی موجود ہے،یہ مصلحت کوشی اور حکمرانوں کی چاپلوسی اور کاسہ لیسی کی وہ بیماری ہےجس میں ہمیشہ سے ہی اہل ہوس مبتلا ہیں

یہ درست ہے کہ ہر معاشرے میں کچھ لوگ ایسے بھی ہوتے ہیں کہ جن کی زندگی میں اصول قاعدے اور ضابطوں کا کوئی عمل دخل نہیں ہوتا،وقت اور حالات کا بہاؤ یا اُن کی اپنی طبیعت کا میلان اور مادی لالچ و فوائد کا حصول انہیں جدھر چاہتا ہے ، با آسانی بہا کر لے جاتا ہے ، بالفاظ دیگر ہم کہہ سکتے ہیں کہ جدھر انہیں اپنا فائدہ نظر آتا ہے ،وہ اُسی طرف کے ہوجاتے ہیں،زندگی میں اصول ،قاعدوں اور ضابطوں سے محروم ہونے کی یہ بیماری عوام الناس سے زیادہ ملک کی اعلیٰ انتظامیہ ،بیوروکریسی ،سیاستدانوں اور بالخصوص مذہبی لبادوں میں ملبوس ان مذہبی لیڈروں میں زیادہ پائی جاتی ہے،جن کے لب صبح و شام اسلام اور اسلامی نظام کے نفاذ کی بات کرتے نہیں تھکتے،اِن کی تمام سیاسی بصیرت،معاملہ فہمی اور دور اندیشی صرف اور صرف ذاتی فائدے اور ابن الوقتی پر مبنی ہوتی ہے۔
اور آج قوم کسی طور بھی ان نام نہاد مذہبی رہنماؤں پر بھروسہ کرنے کو تیار نہیں جوہر حاکم وقت کا ساتھ دینے کو اپنے ایمان کا حصہ سمجھتے ہیں،حضرت قتادہ فرماتے ہیں کہ معاشرے میں علماء نمک ہیں ،نمک سے ہر چیز خوش ذائقہ ہوتی ہے ،لیکن جب نمک ہی بد مزہ ہوجائے تو کون سی چیز درست رہ سکتی ہے۔‘‘آج ہمارے تمام معاشی ،معاشرتی، اخلاقی اور سیاسی مسائل اورقومی تنزلی کا اصل سبب ہے

یہ ہے کہ ہمارے حکمران،سیاستدان اور مذہبی رہنماء اچھے نہیں ،اگر یہ درست ہوتے تو ملک و قوم کے تمام معاملات اور مسائل بھی درست ہوتے ،سچ فرمایا ہے اللہ کے رسول نے کہ’’میری امت کے دو آدمی ’’ حکام اور علماء ‘‘ ٹھیک رہے تو امت بھی ٹھیک رہے گی ‘‘