یااللہ میرے شہر پر رحم کر ، یااللہ کراچی پر رحم کر ۔
کبھی ہم نے سوچا کہ ہماری دعائیں بھی کتنی تعصب کا شکار ہیں ۔ ہمارا دل اسی وقت روتا ہے جب ہماری اپنی جان خطرے میں ہوتی ہے ۔
جب قبائلی علاقوں پر ڈرون حملے ہورہے ہوں تو ہم خواب خرگوش میں ہوتے ہیں‌ ۔ ان ڈرون حملوں میں مرنے والوں کے لیے رونے کے بجائے یہ کہتے ہیں کہ ان لوگوں کا قصور یہ ہے کہ ان لوگوں نے دہشت گردوں کو اپنے گھروں میں پناہ کیوں دی ۔
تو میں کہتی ہوں کہ کراچی والوں کا قصور یہ ہے کہ انہوں نے قاتلون کو ووٹ کیوں دیا ۔ اج نہیں بلکہ آج سے بیس سال پہلے ، پورا کراچی ایم کیو ایم کا دیوانہ تھا ۔ ایم کیو ایم غرور سے کہتی کہ اگر ہم کھمبے کو بھی کھڑا کردیں تو وہ بھی جیت جائے ۔
میں کہہ رہی تھی کہ ہماری دعائیں بھی تعصب ذدہ ہیں۔
اج سے گیارہ سال پہلے جب امریکہ نے افغانستان پر حملہ کیا رمضان کے مہینے میں بمباری کی اور کنٹینڑوں میں ہزاروں مسلمان مارے گئے تب ہماری آنکھ سے ایک آنسو نا نکلا ۔ سب سے پہلے پاکستان کا نعرہ تو پرویز مشرف نے لگایا لیکن ہمارے دل کے کسی گوشے میں بھی ایک اطمئنان سا تھا کہ ہم تو بچ گئے ۔ اللہ تو دلوں کے حال جانتا ہے ۔
تو اج گیارہ سال بعد رمضان کے مہینے میں اس اطمئنان کی سزا ہم کو ملی ۔
پورے شہر میں موت کے راج کی صورت میں ۔
ہم کب تک اپنے شہر ، اپنے ملک اور اپنے گھر کا ہی رونا روتے رہیں گے ۔
حدیث نبوی صلی اللہ علیہ وسلم ہے ۔ جس کا مفہوم ہے
جو شخص اپنے مسلمان بھائی کی مصیبت دور کرتا ہے اللہ اس کی مصیبت دور کردیتا ہے ۔
ہم کب اپنے مسلمان بھائیوں جن کا تعلق نا کراچی سے ہو اور نا پاکستان سے ہو ، تکلیف میں ان کی مصیبتوں کودور کرکے اللہ سے دعا کریں ، تب اللہ ہمارے شہر اور ملک کو بھی امن کا گہوارہ بنادے گا ۔ انشاءاللہ
کب تک ہم خود غرضی کی زندگی گزارتے رہے گے ۔
ہماری سوچ بہت مثبت ہوجائے تب بھی ہم پاکستان کی حد سے آگے نکل نہیں‌پاتے ہیں ۔ ہم مسلمان ہوکر کبھی سوچتے ہی نہیں ۔ تو کوئی ہم کو مسلمان سمجھ کر رحم کیوں کرے ۔
جہاں تک اس سوال کی بات ہے کہ ہم کیا کریں یا ہم کیا کرسکتے ہیں ۔ باتوں کے علاوہ
ہاں ہم باتیں کریں لیکن انصاف پر مبنی باتیں ، کیونکہ ہمارا ایک ایک لفظ ہماری گواہی ہے۔
اللہ تعالیٰ انسان کی وسعت سے ذیادہ اس پر بوجھ نہیں ڈالتا
مطلب اللہ ہم سے یہ نہیں پوچھے گا کہ تم نے کیوں کلاشنگ کوف اٹھا کر ٹارگٹ کلر کو قتل نہیں کیا ۔
بلکہ اللہ ہم سے یہ ضرور پوچھے گا کہ جب میرا فرمان تمھیں معلوم تھا کہ مایوسی گناہ ہے تو کیوں تم خود مایوس ہوئے اور دوسروں میں بھی مایوسی پھیلائی ۔
کیوں اسلام کی غلط تصویر لوگوں کے سامنے پیش کی ۔ کیوں انصاف کی بات نہیں کی ۔ کیوں ظلم کے خلاف نا بولے ۔ کیوں غلط کو غلط اور صحیح کو صحیح نہیں بولا ۔ کیوں ایک کا گناہ دوسرے کے سر ڈالا ۔ کیوں بغیر تحقیق کیے کفار کی خبروں پر یقین کیا اور آگے پھیلایا ۔ کیوں سنی سنائی بات پر یقین کیا ۔ کیوں ایک ظالم اور قاتل کو ووٹ دیا صرف اس وجہ سے کہ وہ تمھارے قبیلے سے تعلق رکھتا تھا ۔
ہم اگر اپنا احتساب کریں ۔ کہ جو باتیں ہم کرتے ہیں کیا ہمارا دل ان باتوں کے ساتھ ہے ۔ کیا واقعی ہم دوسروں کے مر نے پر دکھی ہوتے ہیں ۔ (دوسروں میں پوری دنیا شامل ہے )کیونکہ اللہ دلوں کے حال جانتا ہے ۔
ہم ایسے لوگوں کی پشت پناہی کرتے ہیں جو صحابہ رضی اللہ عنہ کو برا بھلا کہتے ہیں ۔ ہم ان لوگوں کی عزت کرتے ہیں جو اسلام کی نصوص پر حملہ کرتے ہیں ۔
کیا ہماری محبتیں اللہ کے لیے ہیں ۔ اور نفرتیں بھی اللہ کے لیے ہیں ۔
عمل کی بات تو بہت بعد کی ہے کیا ہمارا دل ، ہماری سوچ اور ہماری زبان حق کا ساتھ دیتی ہے ۔
ذرا سوچئے !

__________________
اے اللہ
میرے ہر فیصلے میں تیری رضا ہو شامل
جو تیرا حکم ہو وہ میرا ارادہ کردے