احتیاط افسوس سے بہتر ہے

جب بھی کسی شخص نے اپنی مقررہ حد کو پار کیا وہ لازمی طور پر برے انجام کا شکار ہوا۔
نیتین والیا ایک تین سالہ بچہ ہے ۔ وہ اپنے والدین '' وجے پال والیا اور سونیتا'' کے ساتھ شاہد رہ
میں رہتا ہے ۔ بچہ کو چڑیا گھر دیکھنے کا شوق تھا اس کے والدین اس کو دہلی کا چڑیا گھر
دکھانے کے لئے لے گئے۔مختلف جانوروں کو دیکھتے ہوئے یہ لوگ وہاں پہنچےجہاں سفید شیر
کا پنجرہ ہے۔ وہ شیر اور اسکے بچے کو دیکھنے کے لئے رکے ۔ یہاں نیتین ریلنگ کے اندر داخل
ہوگیا اور پنجرہ میں اپنا ہاتھ ڈال دیا۔شیرنی نے جھپٹ کر اس کا ہاتھ اپنے منہ میں لے لیا ۔
لوگوں نے اس کو لکڑی سے مار مار کر ہٹایا مگر اس دوران وہ بچے کا ہاتھ کندھے تک چبا
چکی تھی ۔آپریشن کے بعد وہ بچہ زندہ ہے مگر وہ ہمیشہ کے لئے اپنے ہاتھ سے محروم ہوچکا ہے۔
ٹائمز آف انڈیا کے رپورٹر کے مطابق بچہ کے والدین نے اس حادثہ کی ذمہ داری چڑیا گھر
کے کار کنوں پر ڈالی ہے انہوں نے کہا کہ اس وقت پنجرہ کے پاس کوئی چوکیدار موجود نہ تھا۔
اکثر لوگوں کا یہ حال ہے کہ جب ان کے ساتھ کوئی حادثہ پیش آتا ہے تو وہ فورا اپنے
سے باہر کسی کو تلاش کرتے ہیں جس پر حادثہ کی ذمہ داری ڈال سکیں ۔ مگر موجودہ دنیا
میں اس قسم کی کوشش سراسر بے فائدہ ہے ۔ یہاں حادثات سے صرف وہ شخص بچ سکتا ہے
جو اپنے آپ کو قابو میں رکھے ۔ جو شخص خود بے قابو ہوجائے وہ لازما حادثہ سے دوچار ہوگا
خواہ دوسروں کو ذمہ دار ٹہرانے کے لئے اس نے ڈکشنری کے تمام الفاظ ہی کیوں نہ دہرا ڈالے ہوں۔
چڑیا گھر میں خونخوار جانوروں کے کٹہرے سے چار فٹ کے فاصلہ پر ریلنگ لگی ہوتی ہے
اس کا مقصد یہ ہے کہ جانور کے مقابلہ میں آدمی کو ایک محفوظ فاصلہ پر رکھا جائے ۔
اسی طرح زندگی کے ہر موڑ پر ایک ریلنگ کھڑی ہوتی ہے ۔ جو شخص ریلنگ کو حد سمجھ کر
وہاں ٹہر جائے وہ محفوظ رہے گا اور جو شخص ریلنگ کو پار کر جائے وہ اپنے آپ کو حادثات
سے نہیں بچا سکتا نہ چڑیا گھر کے اندر اور نہ چڑیا گھر کے باہر۔