ہمارے ملک میں جہاں اور بہت سی باتیں ہو رہی ہیں نئی نئی جو ہمیں خوفزدہ بھی کر رہی ہیں اور حراساں بھی وہیں ایک اور وباء ( ہم تو اسے وباء ہی کہینگے ) نے بھی زور پکڑا ہوا ہے ۔وہ ہے کمیٹی ۔
جب بھی کوئی حادثہ یا واقعہ رونما ہوتا ہے فوراَ ایک کمیٹی بنا دی جاتی ہے ۔اور شاید آج کل ہمارے ملک میں اتنی کمیٹیاں بن چکی ہیں کہ ادارے کم ہونگے ۔

ہم نے اپنے بچپن اور لڑکپن میں یہ کمیٹی کا لفظ سنا تھا اور وہ کمیٹی ہوتی تھی محلے کی کچھ خواتین کی جو اپنے پیسے جمع کر کے کمیٹی ڈال لیتی تھیں ۔اور پھر ہر ماہ اس سے کسی ایک خاتون کی کوئی ضرورت پوری ہوجاتی تھی ۔اس میں اگر کبھی ہم نے جھگڑا سنا تھا تو وہ آخری کمیٹی لینے کے لئے ہوتا تھا کیونکہ زیادہ تر کمیٹی ممبر خواتین چاہتی تھیں کہ انہیں آخری کمیٹی ملے تاکہ انہیں آگے کمیٹی کے لئے پیسے نہ دینے پڑیں ۔لیکن یہ معاملہ کو ئی بھی بذرگ خاتون حل کر دیتی تھیں ۔یہاں تک تو ہمیں کمیٹی کے فائدے مند ہونے میں کوئی کلام ہی نہیں ہے ۔کہ کمیٹی اس وقت کی معصوم خواتین یا شاید آج کل بھی کچھ محلوں میں خواتین نے یہ سسٹم رواج دے رکھا ہو اپنے فائدے کے لئے تا کہ ان کی بچت ان کے کام آجائے ۔اس لئے ہمارے ذہن میں کمیٹی کا ایک اچھا رتبہ تھا کہ یہ مدد گار ہوتی ہے ۔

آج کل کمیٹیاں اور خاص کر ان ساڑھے تین سالوں میں بننے والی کمیٹیاں اور قرار دادیں جس حساب سے بنی ہیں ان کا کوئی شمار ہی نہیں ہے ۔بلکہ شاید اگر گنا جائے تو ایک ریکارڈ ہو جائے ۔ملک پر جب بھی کوئی آفت کوئی مصیبت آتی ہے یا کوئی اہم مسئلہ سامنے ہو فوراَ ہر طرف سے شور اُٹھتا ہے خاص کر حزب ِ مخالف کی طرف سے کہ کمیٹی بنائی جائے حکومتی ارکان بالکل تیار ہوتے ہیں اور بیان آجاتا ہے کہ کمیٹی بنا دی گئی وہ اس بات کی چھان بین کرے گی ۔اورسب سکھ کا سانس لے لیتے ہیں ،کہ کمیٹی بن گئی ۔

ہم نے ہمیشہ ہر معاملے پر اپوزیشن یعنی حزب اختلاف کو یہ ہی دھاڑتے پایا کہ کمیٹی بنائی جائے جو چھان بین کرے ،اب وہ کمیٹی کیا چھانتی ہے یہ تو ہمیں آج تک نظر نہ آیا اور ہم ترستے ہی رہے لیکن بین سب ہی بہت اچھی بجاتے ہیں چاہے وہ کسی بھی حرف تہجی سے تعلق رکھتے ہوں عوام بیچاری ( معاف کیجئے گا یہ لفظ ہم بہت زبردستی لکھ رہے ہیں کہ اگر یہ بیچاری ہوتی تو ہم صبر کر لیتے ۔مگر جو ظلم سہتے چلے جائیں وہ بیچارے نہیں ہوتے بے حس ہوتے ہیں ،معذرت کے ساتھ ) کے منہ میں بالکل اسی طرح انگوٹھا دے دیا جاتا ہے جیسے چھوٹے معصوم بچے اکثر بلکہ زیادہ تر ہر کڑے وقت میں چوستے چوستے سو جاتے ہیں ۔شائد اسی طرح ہماری عوام اور حذب مخالف ، سیٹوں پر بیٹھے لوگ اُونگھ جاتے ہیں کہ چلو کمیٹی بن گئی ،حکومت نے ہماری لاج رکھ لی کم از کم اتنا تو کہنے کو ہوگا کہ ہمارے کہنے پر کمیٹی بنی یہ اعزاز تو ہمارے حصے میں آئیگا ۔

ہمیں یاد ہے جب سری لنکا کی ٹیم پر حملہ ہوا تھا کہا گیا کمیٹی بنا دی گئی ہے ۔
جب ایک فائیو اسٹار ہوٹل پر حملہ ہوا اعلان ہوا کمیٹی بنا دی گئی ہے ۔
اس کے بعد مزاروں ،مسجدوں ،کلیساؤن پر حملہ ہوا اعلان ہوا کمیٹی بنا دی گئی ہے۔
جی ایچ کیو پر حملہ ہوا کہا گیا بلکہ مژدہ سنایا گیا کہ کمیٹی بنا دی گئی ہے ۔
چیک پوسٹ کو اڑا دیا گیا کمیٹی بنا دی گئی ۔
ریمنڈ ڈیوس کو کس نے رہا کیا ؟ کمیٹی بنادی گئی ۔

بس اب آرام سے خراٹے لیجئے کہ کمیٹی بن گئی
کسی نے بھی نہیں پوچھا کہ بتا ؤ کمیٹی کی رپورٹ کیا ہے ۔کمیٹی نے کیا کارنامہ انجام دیا ہے ،کمیٹی نے کون سے شواہد دئے ہیں ؟

دو مئی کو ہم ایک اور اندوہناک حادثے سے گزر گئے ۔بھونچکا رہ گئے کہ ہمارے اندر آکر ہمارے اعتماد کو ٹھیس پہنچاکر ہمارے ملک میں داخل ہوکر اتنا بڑا آپریشن کر دیا گیا اور ہمیں پتہ نہ چلا ۔
لیکن کمیٹی بہت دھڑلے اور زور شور سے بنا دی گئی ۔

ابھی ان حادثوں کی دھمک بھی کم نہ ہوئی تھی کہ ایک اور اذیت ناک حادثے سے گزرنا پڑا ، شاہراہ فیصل جس سے ہم سالوں گزرے اور ہمیشہ دائیں ہاتھ دیکھ کر خوش ہوتے تھے کہ یہ ہماری نیول بیس ہے ہماری نیوی کا سر مایہ اسے بھی دھشت گردوں نے ہلا دیا ،جانی نقصان ہوا ، مالی نقصان ہوا ۔ساکھ خراب ہوئی ، اعتماد اُٹھا ،جوانوں کی لاشیں اُٹھا ئیں ۔
اور پھر ایک کمیٹی بنا دی گئی کہ اس کی بہت ضرورت تھی ۔

مگر اس سے پہلے نیوی کی بسوں پر حملے پر بنی ہوئی کمیٹی نے کیا کیا ؟
یہ کسی نے نہ پوچھا ،یا شاید سوال کرنا ہماری عادت نہیں رہی اور خاص کر ایسی باتوں کی پوچھ تو کوئی کر ہی نہیں سکتا ۔
ہمیں یہاں میڈیا سے بھی شکایت ہے وہ کیوں نہیں تلاشتی کہ کیا کیا کمیٹی نے ؟

آخر میں ہمارا مطالبہ ہے کے ان کمیٹیوں کی کارکردگی جانچنے کے لئے ایک اور کمیٹی بنائی جائے
نتیجہ آئے نا آئے لیکن کسی کی کمیٹی تو" کھل" جائے

__________________
(اے پروردگار) ہم تیری ہی عبادت کرتے ہیں اور تجھ ہی سے مدد مانگتے ہیں